មន្ទីរបញ្ចកោណបាននិយាយកាលពីថ្ងៃព្រហស្បតិ៍ថា កងកម្លាំងសហរដ្ឋអាមេរិកបានបើកការវាយប្រហារតាមអាកាសជាច្រើនលើកទៅលើទីតាំងយោធាដែលមិនបានបញ្ជាក់ច្បាស់លាស់នៅក្នុងប្រទេសស៊ីរីដោយអះអាងថាប្រតិបត្តិការនេះគឺជាការឆ្លើយតបទៅនឹងការវាយប្រហារនាពេលថ្មីៗនេះប្រឆាំងនឹងទីតាំងឈរជើងរបស់អាមេរិកដោយក្រុមប្រដាប់អាវុធដែលត្រូវបានចោទប្រកាន់ថា មានទំនាក់ទំនងជាមួយអ៊ីរ៉ង់។រដ្ឋមន្ត្រីការពារជាតិលោក Lloyd Austin បាននិយាយថា ការវាយប្រហារការពារខ្លួន ដែលបញ្ជាដោយលោកប្រធានាធិបតីចូ បៃដិនបានវាយប្រហារទៅលើទីតាំងពីរនៅភាគខាងកើតប្រទេសស៊ីរីដែលប្រើប្រាស់ដោយកងឆ្មាំបដិវត្តន៍អ៊ីរ៉ង់ (IRGC)និងក្រុមពាក់ព័ន្ធ។
លោកបានអះអាងនៅក្នុងសេចក្តីថ្លែងការណ៍មួយថា ការវាយប្រហារតាមបែបតូចចង្អៀតទាំងនេះ គឺមានបំណងតែមួយគត់ដើម្បីការពារ បុគ្គលិកអាមេរិកនៅក្នុងប្រទេសអ៊ីរ៉ាក់ និងស៊ីរី ។លោកបន្ថែមថាបេសកកម្មនេះគឺដាច់ដោយឡែកពីគ្នាពីអរិភាពនៅតំបន់ហ្គាហ្សាស្ទ្រីប។
ប្រមុខមន្ទីរបញ្ចកោណប្រកាសថាទីក្រុងវ៉ាស៊ីនតោន មិនស្វែងរកជម្លោះប៉ុន្តែនឹងឆ្លើយតបទៅនឹង ការវាយប្រហារដែលគាំទ្រដោយអ៊ីរ៉ង់ប្រឆាំងនឹងកងកម្លាំងសហរដ្ឋអាមេរិកដោយប្តេជ្ញាថានឹងចាត់វិធានការចាំបាច់បន្ថែមទៀតដើម្បីការពារប្រជាជនរបស់ខ្លួន។
ទាហានអាមេរិករហូតដល់១០០០ នាក់បច្ចុប្បន្នត្រូវបានដាក់ពង្រាយនៅក្នុងប្រទេសស៊ីរី ដោយកាន់កាប់តំបន់ប្រេងសំខាន់ៗ និងការឆ្លងកាត់ទន្លេ Euphratesដោយមានការគាំទ្រពីកងជីវពលដែលដឹកនាំដោយជនជាតិឃឺដ។ រដ្ឋាភិបាលក្រុងដាម៉ាសបានតវ៉ាម្តងហើយម្តងទៀតថា វត្តមានរបស់ពួកគេបំពានច្បាប់អន្តរជាតិ។
មន្ទីរបញ្ចកោណបញ្ជូនទាហាន ៩០០ នាក់ទៅមជ្ឈិមបូព៌ា
លោក Pat Ryder អ្នកនាំពាក្យបាននិយាយកាលពីថ្ងៃព្រហស្បតិ៍ថា មន្ទីរបញ្ចកោណកំពុងបញ្ជូនទាហាន៩០០ នាក់ទៅកាន់មជ្ឈិមបូព៌ា។
លោកRyderបានប្រាប់អ្នកយកព័ត៌មានថាខ្ញុំអាចបញ្ជាក់បានថា ចាប់តាំងពីការប្រកាសជំហរដំបូងរបស់យើង ទាហានប្រហែល៩០០នាក់ត្រូវបានដាក់ពង្រាយជាបន្តបន្ទាប់ ឬកំពុងស្ថិតក្នុងដំណើរការដាក់ពង្រាយទៅកាន់តំបន់បញ្ជាការកណ្តាលនៃការទទួលខុសត្រូវរបស់សហរដ្ឋអាមេរិក ។
អ្នកនាំពាក្យរូបនេះបានកត់សម្គាល់ថា ការពង្រឹងបន្ថែមមិនមែនទៅប្រទេសអ៊ីស្រាអែលទេ ហើយមានបំណងគាំទ្រដល់កិច្ចខិតខំប្រឹងប្រែងទប់ស្កាត់ក្នុងតំបន់និងពង្រឹងសមត្ថភាពការពារកម្លាំងរបស់សហរដ្ឋអាមេរិកបន្ថែមទៀត។
លោកបាននិយាយថា សហរដ្ឋអាមេរិកក៏គ្រោងនឹងផ្តល់ប្រព័ន្ធ Iron Domeរបស់សហរដ្ឋអាមេរិកចំនួនពីរដែលបច្ចុប្បន្ននៅក្នុងសារពើភ័ណ្ឌដល់អ៊ីស្រាអែលដើម្បីជួយពង្រឹងសមត្ថភាពការពារដែនអាកាសរបស់ពួកគេនិងការពារពលរដ្ឋពីការវាយប្រហារដោយគ្រាប់រ៉ុក្កែត ៕