សមាជិកសភាម៉ាឡេស៊ីជាង ១៣០នាក់បានជំរុញឱ្យរបបយោធាមីយ៉ាន់ម៉ាអនុញ្ញាតឱ្យមេដឹកនាំដែលត្រូវបានឃុំខ្លួនលោកស្រី អ៊ុងសាន ស៊ូជី ទទួលបានការព្យាបាលជាបន្ទាន់។នេះបើយោងតាមប្រព័ន្ធផ្សព្វផ្សាយម៉ាឡេស៊ី។
សមាជិកសភាសរុបចំនួន ១៣៥ នាក់ ក្នុងចំណោម ២២២ នាក់ បានចេញសេចក្តីថ្លែងការណ៍ អំពាវនាវឱ្យមានការដោះលែងលោកស្រី អ៊ុងសាន ស៊ូជី ដើម្បីឱ្យលោកស្រីទទួលបានការព្យាបាលវេជ្ជសាស្ត្រ។សេចក្តីថ្លែងការណ៍បាននិយាយថា យើងមានការព្រួយបារម្ភអំពីស្ថានភាពដ៏ផុយស្រួយ របស់លោកស្រីហើយសុំឲ្យរដ្ឋាភិបាលយោធាផ្តល់ការថែទាំសុខភាពនិងអនុញ្ញាតឱ្យគ្រូពេទ្យខាងក្រៅវាយតម្លៃនាងដោយមិនមានការពន្យារពេល។
ម្ចាស់ជ័យលាភីណូបែលអាយុ ៧៨ ឆ្នាំដែលត្រូវបានឃុំខ្លួនតាំងពីរដ្ឋប្រហារខែកុម្ភៈឆ្នាំ ២០២១ត្រូវបានគេរាយការណ៍ថាឈឺធ្មេញធ្ងន់ធ្ងរហើយមិនអាចបរិភោគបាន រួមជាមួយនឹងក្អួត និងវិលមុខ។យោងតាមវិទ្យុវីអូអេភាសាភូមាបានរាយការណ៍ថាសំណើសុំជួបពេទ្យធ្មេញរបស់លោកស្រីត្រូវបានបដិសេធដោយអាជ្ញាធរពន្ធនាគារ ប៉ុន្តែលោកស្រីបានទទួលថ្នាំមួយចំនួន។
សេចក្តីថ្លែងការណ៍កាលពីថ្ងៃអង្គារបានអំពាវនាវឱ្យអាស៊ានឈរក្នុងសាមគ្គីភាពជាមួយប្រជាជនមីយ៉ាន់ម៉ា និងអំពាវនាវឱ្យមានការដោះលែងលោកស្រី អ៊ុងស៊ាន ស៊ូជីនិងអ្នកទោសនយោបាយផ្សេងទៀតដែលត្រូវបានឃុំខ្លួនដោយមេដឹកនាំរបបលោកមីន អ៊ុងឡាំង។
អ្នកស្រី អ៊ុងសាន ស៊ូជី ត្រូវបានកាត់ទោសឲ្យជាប់ពន្ធនាគារ សរុប៣៣ឆ្នាំក្នុងបទចោទជាច្រើ។ លោកស្រីបានបដិសេធរាល់ការចោទប្រកាន់។ របបនេះបានកាត់បន្ថយទោស៦ឆ្នាំពីការកាត់ទោសរបស់លោកស្រី ជាផ្នែកមួយនៃការលើកលែងទោសទូទៅកាលពីដើមខែសីហា៕