ប្រព័ន្ធផ្សព្វផ្សាយរដ្ឋ(KCNA)បាននិយាយនៅថ្ងៃសុក្រទី៨ខែកញ្ញាឆ្នាំ២០២៣ថាប្រទេសកូរ៉េខាងជើងបានសម្ពោធដាក់អោយប្រើប្រាស់នាវាមុជទឹកយុទ្ធសាស្ត្រវាយប្រហារនុយក្លេអ៊ែរ និងត្រូវប្រគល់វាទៅឱ្យកងនាវាដែលល្បាតដែនទឹករវាងឧបទ្វីបកូរ៉េនិងជប៉ុន។នេះបើយោងតាមការចេញផ្សាយរបស់សារព័ត៌មានរ៉យទ័។
ពិធីសម្ពោធនេះធ្វើឡើងនៅពេលដែលកូរ៉េខាងជើង គ្រោងនឹងប្រារព្ធខួបលើកទី៧៥ នៃថ្ងៃបង្កើតប្រទេសរបស់ខ្លួននៅថ្ងៃសៅរ៍ ហើយបន្ទាប់ពីមានសេចក្តីរាយការណ៍ថា លោក គីម គ្រោងនឹងធ្វើដំណើរទៅកាន់ប្រទេសរុស្ស៊ីក្នុងខែនេះ ដើម្បីជួបជាមួយប្រធានាធិបតី វ្ល៉ាឌីមៀ ពូទីន ដពិភាក្សាអំពីការផ្គត់ផ្គង់អាវុធដល់ទីក្រុងម៉ូស្គូ។
KCNA បានរាយកាណ៍ថាការដាក់អោយប្រើប្រាស់នាវាមុជទឹកស៊េរីថ្មីនេះគឺជាការចាប់ផ្តើមសករាជថ្មីសម្រាប់ការពង្រឹងកម្លាំងទ័ពជើងទឹករបស់កូរ៉េខាងជើង។លោក Kim បាននិយាយថា នាវាមុជទឹកលេខ 841 ដែលមានឈ្មោះថា Kim Kun Ok ដែលជាវីរបុរសប្រវត្តិសាស្ត្ររបស់កូរ៉េខាងជើង នឹងបំពេញបេសកកម្មប្រយុទ្ធរបស់ខ្លួនជា មធ្យោបាយវាយលុកក្រោមទឹករបស់កងកម្លាំងទ័ពជើងទឹក កូរ៉េខាងជើង។
លោកគីមជុងអ៊ុនបាននិយាយថា កូរ៉េខាងជើងគ្រោងនឹងប្រែក្លាយនាវាមុជទឹកដែលមានស្រាប់របស់ខ្លួនទៅជានាវាមុជទឹកវាយប្រហារដោយអាវុធនុយក្លេអ៊ែរ ហើយនឹងពន្លឿនការជំរុញរបស់ខ្លួនដើម្បីបង្កើតនាវាមុជទឹកដើរដោយថាមពលនុយក្លេអ៊ែរ ៕