ប្រទេសម៉ាឡេស៊ីនិយាយថា ខ្លួននឹងផ្ញើលិខិតតវ៉ាជាផ្លូវការទៅប្រទេសចិន ជុំវិញផែនទីដែលបានចេញផ្សាយថ្មីរបស់ចិន ដែលពាក់ព័ន្ធនឹងការទាមទារលើទឹកដីដែលមានជម្លោះ សមុទ្រចិនខាងត្បូង។ការតវ៉ានេះបានធ្វើឡើងបន្ទាប់ពីប្រទេសឥណ្ឌា ខណៈដែលឥណ្ឌូណេស៊ីនិយាយថា ខ្លួនកំពុងស្វែងរកព័ត៌មានលម្អិតតាមរយៈស្ថានទូតរបស់ខ្លួននៅទីក្រុងប៉េកាំង។
ក្រសួងធនធានធម្មជាតិរបស់ប្រទេសចិនកាលពីថ្ងៃចន្ទទី២៨សីហាបានចេញផែនទី China Standard Map Edition 2023ដែលបង្ហាញពីការទាមទារលើសមុទ្រចិនខាងត្បូងដែលមានជម្លោះជាមួយប្រទេសម៉ាឡេស៊ី វៀតណាម ហ្វីលីពីន និងប្រ៊ុយណេ ព្រមទាំងតំបន់ដីមួយចំនួនផងដែរនៅក្នុងប្រទេសឥណ្ឌា។
វាមានខ្សែបន្ទាត់ ពិសេស 10-dash ដែលមានបន្ទាត់បន្ថែមនៅភាគខាងកើតនៃកោះតៃវ៉ាន់ ។បន្ទាត់នេះបំបែកចេញពីខ្សែបន្ទាត់ប្រាំបួនធម្មតាដែលទីក្រុងប៉េកាំងបាននឹងកំពុងប្រើប្រាស់ក្នុងប៉ុន្មានឆ្នាំចុងក្រោយនេះ ដើម្បីកាន់កាប់ការទាមទាររបស់ខ្លួនជុំវិញសមុទ្រចិនខាងត្បូង។
ការចេញផ្សាយផែនទីនេះធ្វើឡើងនៅមុនកិច្ចប្រជុំកំពូលក្រុមប្រទេសសមាគមប្រជាជាតិអាស៊ីអាគ្នេយ៍ (អាស៊ាន) នៅប្រទេសឥណ្ឌូនេស៊ី ពីថ្ងៃទី ៥-៧ ខែកញ្ញា និងកិច្ចប្រជុំកំពូលក្រុម 20 (G20) ពីថ្ងៃទី ៩-១០ខែកញ្ញា នៅប្រទេសឥណ្ឌាដែលមេដឹកនាំចិនត្រូវបានគេរំពឹងថានឹងចូលរួមផងដែរ។
កាសែត The Star បានរាយការណ៍ថា រដ្ឋមន្ត្រីការបរទេសម៉ាឡេស៊ី លោក Zambry Abdul Kadir កាលពីថ្ងៃព្រហស្បតិ៍ ទី៣១ សីហាបាននិយាយថា ប្រទេសនេះនឹងផ្ញើលិខិតតវ៉ាមួយទៅកាន់ប្រទេសចិន បន្ទាប់ពីប្រទេសនេះបបានទាមទាលើសមុទ្រចិនខាងត្បូង ដូចដែលបានគូសបញ្ជាក់នៅក្នុងផែនទីថ្មីនេះ។
ក្រសួងការបរទេសម៉ាឡេស៊ី កាលពីថ្ងៃពុធ បាននិយាយថា ផែនទីមានថ្មីនេះដែលបង្ហាញពីការទាមទារដែនសមុទ្រជាឯកតោភាគីរបស់ចិនដែលបានរំលោភបំពានលើតំបន់ដែនសមុទ្ររបស់ប្រទេសនៅ Sabah និង Sarawak ។
ការសែតBernama បានរាយការណ៍ថា ក្រសួងបានសង្កត់ធ្ងន់ថាម៉ាឡេស៊ីតែងតែបដិសេធការអះអាងរបស់ភាគីបរទេសណាមួយចំពោះអធិបតេយ្យភាព សិទ្ធិអធិបតេយ្យភាព និងយុត្តាធិការលើលក្ខណៈដែនសមុទ្រ ឬតំបន់ដែនសមុទ្រដោយផ្អែកលើផែនទីថ្មីរបស់ម៉ាឡេស៊ីឆ្នាំ ១៩៧៩។ម៉ាឡេស៊ីក៏ចាត់ទុកបញ្ហាសមុទ្រចិនខាងត្បូងថាជាបញ្ហាស្មុគស្មាញនិងរសើបដែរ។
ឥណ្ឌាតវ៉ា
យោងតាមទីភ្នាក់ងារសារព័ត៌មានបារាំង (AFP) បានឱ្យដឹងថា អាជ្ញាធរឥណ្ឌាកាលពីថ្ងៃអង្គារបានចេញលិខិតតវ៉ាយ៉ាងខ្លាំង ទៅកាន់ប្រទេសចិន។
ផែនទីថ្មីរបស់ប្រទេសចិនតាមសេចក្តីរាយការណ៍ទាមទារកម្មសិទ្ធិលើដីដែលជាកម្មសិទ្ធិរបស់ក្រុងញូវដែលី រួមទាំងទឹកដីនៅជិតកន្លែងដែលប្រទេសទាំងពីរតែងតែប្រយុទ្ធគ្នានៅឆ្នាំ ២០២០។អ្នកនាំពាក្យក្រសួងការបរទេសឥណ្ឌា លោក Arindam Bagchi បាននិយាយនៅក្នុងសេចក្តីថ្លែងការណ៍មួយថាថ្ងៃនេះ យើងបានធ្វើការតវ៉ាយ៉ាងខ្លាំង តាមរយៈបណ្តាញការទូតជាមួយភាគីចិនលើអ្វីដែលហៅថា ផែនទីស្តង់ដារឆ្នាំ ២០២៣ របស់ប្រទេសចិន ទាមទារយកទឹកដីឥណ្ឌា។
ប្រទេសឥណ្ឌាបានប្រុងប្រយ័ត្នចំពោះការអះអាងផ្នែកយោធាដែលកំពុងកើនឡើងរបស់ប្រទេសជិតខាងភាគខាងជើងរបស់ខ្លួន ហើយព្រំដែនដែលមានចម្ងាយ៣៥០០ គីឡូម៉ែត្ររបស់ពួកគេគឺជាប្រភពនៃភាពតានតឹងយូរអង្វែង។
យើងបដិសេធការអះអាងទាំងនេះព្រោះវាគ្មានមូលដ្ឋាន។ ជំហានបែបនេះរបស់ភាគីចិនគ្រាន់តែធ្វើឱ្យស្មុគស្មាញដល់ការដោះស្រាយបញ្ហាព្រំដែនប៉ុណ្ណោះ»។
ឥណ្ឌូណេស៊ី
ឥណ្ឌូណេស៊ីមិនទាន់បានចេញការឆ្លើយតបជាផ្លូវការជុំវិញផែនទីរបស់ចិនដែលទាមទារមកលើទឹកដីលើក្រុមកូនកោះ Natuna ដែលស្ថិតនៅក្នុងតំបន់ EEZ ប្រវែងជិត៣០០គីឡូម៉ែត្រប៉ុន្តែបានទាមទារដោយទីក្រុងប៉េកាំងពិនិតខ្សែបន្ទាត់ប្រាំបួនរបស់ខ្លួននៅលើសមុទ្រចិនខាងត្បូង ដែលជាផ្លូវទឹកដ៏សំខាន់ដ៏សំខាន់សម្រាប់ផ្លូវដឹកជញ្ជូនអន្តរជាតិ និងជាតំបន់នៃការប្រកួតប្រជែងកាន់តែខ្លាំងឡើងរវាងចិន និងសហរដ្ឋអាមេរិក។
យោងតាម BBC News Indonesia ក្រសួងការបរទេសឥណ្ឌូណេស៊ីបច្ចុប្បន្នកំពុងស្វែងរក ការពិតនៃព័ត៌មានទាក់ទងនឹងផែនទីថ្មី។អ្នកនាំពាក្យក្រសួងការបរទេសលោក Teuku Faizasyah បាននិយាយកាលពីថ្ងៃពុធថាបច្ចុប្បន្នយើងកំពុងស្នើសុំព័ត៌មានពីស្ថានទូតឥណ្ឌូណេស៊ីនៅទីក្រុងប៉េកាំងអំពីភាពពិតនៃព័ត៌មាន ។ នៅពេលសួរថា តើឥណ្ឌូនេស៊ីនឹងតវ៉ាដូចឥណ្ឌាដែរឬទេ លោកបាននិយាយថា អាជ្ញាធរកំពុងតែរង់ចាំការយល់ដឹងពីស្ថានទូតឥណ្ឌូនេស៊ីជាមុនសិន៕