សេវាសន្តិសុខសហព័ន្ធ (FSB) របស់រុស្ស៊ីបានចោទប្រកាន់អតីតបុគ្គលិកស្ថានកុងស៊ុលសហរដ្ឋអាមេរិកពីបទរំលោភលើក្រមព្រហ្មទណ្ឌ ដោយបម្រើជាអ្នកផ្តល់ព័ត៌មានសម្ងាត់សម្រាប់ទីក្រុងវ៉ាស៊ីនតោន។ទីក្រុងម៉ូស្គូបាននិយាយកាលពីថ្ងៃចន្ទថា ខ្លួនបានឃុំខ្លួនពលរដ្ឋរុស្ស៊ីម្នាក់អតីតជាបុគ្គលិកស្ថានកុងស៊ុលអាមេរិកនៅប្រចាំតំបន់ Vladivostok ពីបទបញ្ជូនព័ត៌មានជម្លោះអ៊ុយក្រែនដល់មន្ត្រីការទូតអាមេរិក។សេវាសន្តិសុខសហព័ន្ធ (FSB) បាននិយាយនៅក្នុងសេចក្តីថ្លែងការណ៍មួយថាខ្លួនបានបង្ក្រាបសកម្មភាពខុសច្បាប់របស់លោកRobertRobertovichដោយចោទប្រកាន់គាត់ថាជាអ្នកផ្តល់ព័ត៌មានសម្រាប់ស្ថានទូតអាមេរិកនៅទីក្រុងម៉ូស្គូ។
លោកShonovបាននិយាយថាលោកបានធ្វើសកម្មភាពតាមការណែនាំពីបុគ្គលិកពីរនាក់នៃស្ថានទូតអាមេរិកនៅទីក្រុងម៉ូស្គូគឺលោក David Bernstein និង Jeffery Sillin បន្ទាប់ពីគាត់ត្រូវបានទាក់ទងដំបូងនៅក្នុងខែកញ្ញាឆ្នាំ២០២២ ។
លោកក៏ត្រូវបានលើកទឹកចិត្តឱ្យផ្តល់ការស៊ើបការណ៍អំពីប្រតិបត្តិការយោធាពិសេសរបស់ទីក្រុងម៉ូស្គូនៅអ៊ុយក្រែនផងដែរ។ យោងតាមFSBទាំងBernsteinនិងSillinធ្វើការនៅក្នុងផ្នែកនយោបាយនៃស្ថានទូតអាមេរិក។លោកShonov ជាជនជាតិរុស្ស៉ីហើយត្រូវបានអាជ្ញាធររុស្ស៉ីចាប់ឃុំខ្លួន តាំងតែពីខែឧសភាមក។
ស្ថានទូតអាមេរិកបាននិយាយថា ការចោទប្រកាន់ប្រឆាំងនឹងលោក Shonov គឺពុំមានមូលដ្ឋានរឹងមាំហើយតួនាទីរបស់លោកគិតត្រឹមពេលត្រូវគេចាប់ឃាត់ខ្លួនគឺត្រឹមទទួលបន្ទុកចងក្រងខ្លឹមសារព័ត៌មានសង្ខេបដែលប្រមូលមកពីប្រភពដែលចេញផ្សាយជាសាធារណៈស្រាប់ ដោយបណ្តាញព័ត៌មានរបស់ប្រទេសរុស្ស៉ីផ្ទាល់ប៉ុណ្ណោះ៕