ប្រទេសជប៉ុននឹងចាប់ផ្តើមបញ្ចេញទឹកវិទ្យុសកម្មច្រើនជាង១លានម៉ែត្រគូបដែលត្រូវបានព្យាបាលរួចរាល់ចេញពីរោងចក្រនុយក្លេអ៊ែរFukushimaដែលរងគ្រោះដោយរលកយក្សស៊ូណាមិកាលពីឆ្នាំ២០១១ចូលទៅក្នុងមហាសមុទ្រប៉ាស៊ីហ្វិកនៅថ្ងៃព្រហស្បតិ៍បើទោះបីជាមានការប្រឆាំងពីប្រទេសជិតខាងក៏ដោយ។នេះបើយោងតាមការចេញផ្សាយរបស់បណ្តាញសារព័ត៌មានប៊ីប៊ីស៊ីកាលពីថ្ងៃអង្គារទី២២ សីហា ឆ្នាំ ២០២៣។ផែនការដែលត្រូវបានអនុម័តកាលពី២ ឆ្នាំមុនដោយរដ្ឋាភិបាលជប៉ុនថាមានសារៈសំខាន់ក្នុងការរុះរើរោងចក្រដែលដំណើរការដោយក្រុមហ៊ុនថាមពលអគ្គិសនីតូក្យូ(TEPCO)ត្រូវបានប្រឈមនឹងការរិះគន់ពីក្រុមនេសាទក្នុងស្រុកដែលភ័យខ្លាចការខូចខាតកេរ្តិ៍ឈ្មោះនិងការគំរាមកំហែងដល់ជីវភាពរបស់ពួកគេ។
នាយករដ្ឋមន្រ្តីជប៉ុនលោកហ្វូមីអូ គីស៊ីដា បាននិយាយនៅព្រឹកថ្ងៃអង្គារថាឮខ្ញុំបានស្នើឱ្យ TEPCO រៀបចំឱ្យបានឆាប់រហ័សសម្រាប់ការបង្ហូរទឹកស្របតាមផែនការដែលបានអនុម័តដោយអាជ្ញាធរគ្រប់គ្រងនុយក្លេអ៊ែរ ហើយរំពឹងថាការបញ្ចេញទឹកនឹងចាប់ផ្តើមនៅថ្ងៃទី ២៤ ខែសីហាប្រសិនបើលក្ខខណ្ឌអាកាសធាតុអនុញ្ញាត ។លោកគីស៊ីដាបាននិយាយកាលពីថ្ងៃចន្ទថា ខ្ញុំសន្យាថាយើងនឹងទទួលខុសត្រូវទាំងស្រុងក្នុងការធានាឱ្យឧស្សាហកម្មនេសាទអាចបន្តចិញ្ចឹមជីវិតរបស់ពួកគេ ទោះបីជាវានឹងចំណាយពេលច្រើនទសវត្សរ៍ក៏ដោយ។
ប្រទេសជប៉ុនបាននិយាយថា ការបញ្ចេញទឹកនេះមានសុវត្ថិភាព។ ទីភ្នាក់ងារថាមពលអាតូមិកអន្តរជាតិ (IAEA) ដែលជាអ្នកឃ្លាំមើលនុយក្លេអ៊ែររបស់អង្គការសហប្រជាជាតិ បានបំភ្លឺផែនការនេះកាលពីខែកក្កដា ដោយនិយាយថា វាបានបំពេញតាមស្តង់ដារអន្តរជាតិ ហើយថាផលប៉ះពាល់ដែលវានឹងមានលើមនុស្ស និងបរិស្ថានគឺតិចតួចណាស់ ។
ប្រទេសចិនហាមឃាត់ការនាំចូលអាហារសមុទ្រពីខេត្តចំនួន ១០ក្នុងប្រទេសជប៉ុន រួមទាំងទីក្រុង Fukushima និងរដ្ឋធានីតូក្យូផងដែរ។ការនាំចូលអាហារសមុទ្រពីខេត្តផ្សេងទៀតត្រូវបានអនុញ្ញាតប៉ុន្តែត្រូវតែឆ្លងកាត់ការធ្វើតេស្តវិទ្យុសកម្មនិងមានភស្តុតាងដែលពួកគេត្រូវបានផលិតនៅខាងក្រៅខេត្តហាមឃាត់ទាំង ១០។ចំណែកឯសកម្មជនកូរ៉េខាងត្បូងក៏បានតវ៉ាចំពោះផែនការនេះផងដែរបើទោះបីជាទីក្រុងសេអ៊ូលបានសន្និដ្ឋានពីការសិក្សារបស់ខ្លួនថាការបញ្ចេញទឹកត្រូវតាមស្តង់ដារអន្តរជាតិ និងបាននិយាយថាវាគោរពការវាយតម្លៃរបស់ IAEA ក៏ដោយ៕