ប្រទេសរុស្ស៊ីបានចាប់ផ្តើមបេសកកម្មលើកដំបូងរបស់ខ្លួនទៅកាន់ឋានព្រះចន្ទ បន្ទាប់ពីខកខានក្នុងរយៈពេលជិត៥០ឆ្នាំ ដែលជាការប្រណាំងប្រជែងអវកាសជាមួយប្រទេសឥណ្ឌាដែលមានគម្រោងចុះចតនៅក្នុងខែនេះផងដែរ។
ការបាញ់បង្ហោះយាន Luna-25 ទៅកាន់ឋានព្រះចន្ទកាលពីថ្ងៃសុក្រ គឺជាលើកទីមួយរបស់រុស្ស៊ី ចាប់តាំងពីឆ្នាំ ១៩៧៦ នៅពេលដែលរុស្ស៊ីជាផ្នែកមួយនៃសហភាពសូវៀត ហើយការបោញ់បង្ហោះនេះត្រូវបានធ្វើឡើងដោយគ្មានជំនួយពីទីភ្នាក់ងារអវកាសអឺរ៉ុបដែលបានបញ្ចប់កិច្ចសហប្រតិបត្តិការជាមួយរុស្ស៊ីបន្ទាប់ពីការលុកលុយមកលើប្រទេសអ៊ុយក្រែន។
ការបាញ់បង្ហោះចេញពីយាន Vostochny Cosmodrome នៅតំបន់ Far East បានធ្វើឡើងនៅម៉ោង ២និង១០ នាទីព្រឹកថ្ងៃសុក្រ (ម៉ោងនៅទីក្រុងម៉ូស្គូ)។នេះបើយោងតាមរូបភាពផ្សាយផ្ទាល់ដោយទីភ្នាក់ងារអវកាសរុស្ស៊ី Roscosmos។
យានចុះចតជើងបួនមានទម្ងន់ប្រហែល៨០០ គីឡូក្រាម ហើយនឹងត្រូវទៅដល់គន្លងព្រះចន្ទក្នុងរយៈពេល៥ថ្ងៃ។បន្ទាប់មកវានឹងចំណាយពេលចន្លោះពី៣ទៅ ៧ថ្ងៃដើម្បីជ្រើសរើសកន្លែងត្រឹមត្រូវ មុនពេលចុះចតនៅតំបន់ប៉ូលខាងត្បូងតាមចន្ទគតិ។
លោក Alexander Blokhin មន្ត្រីជាន់ខ្ពស់ Roscosmos បាននិយាយនៅក្នុងបទសម្ភាសន៍នាពេលថ្មីៗនេះថាវាជាលើកដំបូងក្នុងប្រវត្តិសាស្ត្រការចុះចតតាមចន្ទគតិ នៅលើប៉ូលខាងត្បូង។យាននេះត្រូវបានគេរំពឹងថានឹងទៅដល់ផ្ទៃព្រះចន្ទនៅថ្ងៃទី២៣ ខែសីហា ស្របពេលជាមួយនឹងយានឥណ្ឌាដែលត្រូវបានបាញ់បង្ហោះកាលពីថ្ងៃទី ១៤ខែកក្កដា។
ម៉ូឌុលរបស់ប្រទេសទាំងពីរគឺឆ្ពោះទៅប៉ូលខាងត្បូងតាមចន្ទគតិដែលជាតំបន់ដែលគ្មានយានអវកាសណាមួយបានចុះចតដោយរលូនមានតែរដ្ឋាភិបាលបីប៉ុណ្ណោះដែលគ្រប់គ្រងការចុះចតឋានព្រះចន្ទដោយជោគជ័យគឺអតីតសហភាពសូវៀត សហរដ្ឋអាមេរិក និងចិន។
Roscosmos បាននិយាយថា ម៉ូឌុលនេះនឹងដំណើរការរយៈពេលមួយឆ្នាំដោយនាំយក និងវិភាគសំណាកដីនិងធ្វើការស្រាវជ្រាវវិទ្យាសាស្ត្ររយៈពេលវែងលើសម្ភារៈផ្ទៃព្រះចន្ទ និងបរិយាកាស៕