ប្រព័ន្ធផ្សព្វផ្សាយរដ្ឋ KCNA រាយការណ៍នៅថ្ងៃព្រហស្បតិ៍ ទី១០ សីហាថា មេដឹកនាំកូរ៉េខាងជើងលោក គីម ជុងអ៊ុនបានដកតំណែងឧត្តមសេនីយកំពូលយោធា ម្នាក់ហើយបានអំពាវនាវឱ្យមានការរៀបចំបន្ថែមទៀត សម្រាប់លទ្ធភាពនៃសង្គ្រាម ជំរុញការផលិតអាវុធ និងការពង្រីកសមយុទ្ធយោធា។នេះបើយោងតាមការ ចេញផ្សាយរបស់សារព័ត៌មានរ៉យទ័រ។
របាយការណ៍ខាងលើបាននិយាយថា លោក គីម បានធ្វើអត្ថាធិប្បាយនៅក្នុងកិច្ចប្រជុំនៃគណៈកម្មាការយោធា មជ្ឈិមដែលបានពិភាក្សាអំពីផែនការសម្រាប់វិធានការទប់ទល់នឹងសត្រូវរបស់កូរ៉េខាងជើងតែមិនបានបញ្ចេញឈ្មោះនោះទេ។
KCNA បានរាយការណ៍ថា ឧត្តមសេនីយកំពូលរបស់ប្រទេស ដែលជាប្រធានអគ្គសេនាធិការលោក Pak Su Il ត្រូវបាន បណ្តេញចេញ តែមិនបានបញ្ជាក់លម្អិតទេ។ លោកបានបម្រើក្នុងតួនាទីប្រហែលប្រាំពីរខែប៉ុណ្ណោះ។លោក Pak Su Il ត្រូវបានជំនួសដោយឧត្តមសេនីយ៍ Ri Yong Gil ដែលពីមុនធ្លាប់ធ្វើជារដ្ឋមន្ត្រីការពារជាតិរបស់ ប្រទេស ក៏ដូចជាមេបញ្ជាការកំពូលនៃកងទ័ពធម្មតារបស់ខ្លួន។
Ri Yong Gil ក៏ធ្លាប់ធ្វើជាមេទ័ពដែរ។ នៅពេលដែលលោកត្រូវបានជំនួសនៅឆ្នាំ២០១៦ ការបណ្តេញរបស់គាត់ និងអវត្តមានជាបន្តបន្ទាប់ពីព្រឹត្តិការណ៍ផ្លូវការបានបង្កឱ្យមានរបាយការណ៍នៅក្នុងប្រទេសកូរ៉េខាងត្បូងថាគាត់ត្រូវបានគេប្រហារជីវិតប៉ុន្តែប៉ុន្មានខែក្រោយមក គាត់បានបង្ហាញខ្លួនម្តងទៀតនៅពេលដែលគាត់ត្រូវបានគេដាក់ ឈ្មោះឱ្យកាន់តំណែងជាន់ខ្ពស់ផ្សេងទៀត។
របាយការណ៍បាននិយាយថា លោកគីម ក៏បានកំណត់គោលដៅសម្រាប់ការពង្រីកសមត្ថភាពផលិតអាវុធ ផងដែរតែមិនបានផ្តល់នូវព័ត៌មានលម្អិត។ កាលពីសប្តាហ៍មុន លោកបានទៅទស្សនារោងចក្រសព្វាវុធ និង បានអំពាវនាវឲ្យផលិតម៉ាស៊ីនមីស៊ីល កាំភ្លើងធំ និងអាវុធផ្សេងទៀតឲ្យមានបានច្រើន។
រូបថតដែលចេញផ្សាយដោយ KCNA បានបង្ហាញថាលោក គីម ជុង អ៊ុន ចង្អុលទៅទីក្រុងសេអ៊ូលនិងតំបន់ជុំវិញ រដ្ឋធានីកូរ៉េខាងត្បូងនៅលើផែនទី។ របាយការណ៍បាននិយាយថា លោក គីម ក៏បានអំពាវនាវឱ្យយោធាធ្វើសម យុទ្ធជាមួយនឹងអាវុធ និងឧបករណ៍ចុងក្រោយបង្អស់របស់ប្រទេស ដើម្បីរក្សាកងកម្លាំងរបស់ខ្លួនត្រៀមខ្លួន សម្រាប់ការប្រយុទ្ធ។
កូរ៉េខាងជើងគ្រោងនឹងធ្វើព្យុហយាត្រារបស់កងជីវពលនៅថ្ងៃទី ៩ខែកញ្ញា ដើម្បីប្រារព្ធខួបលើកទី៧៥ នៃទិវាមូល និធិនៃសាធារណរដ្ឋ។ កូរ៉េខាងជើងមានក្រុមទាហានប៉ារ៉ាមួយចំនួនដែលខ្លួន ប្រើដើម្បីពង្រឹងកម្លាំងយោធារបស់ ខ្លួន។
សហរដ្ឋអាមេរិកនិងកូរ៉េខាងត្បូងគ្រោងនឹងធ្វើសមយុទ្ធយោធារវាងថ្ងៃទី ២១ និង ២៤ ខែសីហា ដែលកូរ៉េខាង ជើងមើលឃើញថាជាការគំរាមកំហែងដល់សន្តិសុខរបស់ខ្លួន៕