មេដឹកនាំរដ្ឋប្រហារយោធារបស់ប្រទេសនីហ្សេ(Niger) បានបិទដែនអាកាសបន្ទាប់ពីបានច្រានចោលឱសានវាទពីរដ្ឋនៅអាហ្វ្រិកខាងលិច ដែលបានដាក់សម្ពាធអោយដោះលែងប្រធានាធិបតីលោកMohamed Bazoum ដែលត្រូវបានទម្លាក់ចេញពីតំណែងបើមិនដូច្នោះប្រឈមមុខនឹងអន្តរាគមន៍យោធា។
រដ្ឋប្រហារនៅនីហ្សេកាលពីថ្ងៃទី ២៦ ខែកក្កដាគឺជារដ្ឋប្រហារលើកទី ៧ នៅអាហ្វ្រិកខាងលិចនិងកណ្តាលក្នុងរយៈពេល ៣ ឆ្នាំ។ វាបានធ្វើឱ្យកក្រើកតំបន់ Sahel នៃទ្វីបអាហ្រ្វិក ដែលកំពុងប្រយុទ្ធជាមួយក្រុមប្រដាប់អាវុធដែលមានទំនាក់ទំនងជាមួយក្រុមអាល់កៃដានិងISIL(ISIS)ហើយស្ថិតក្នុងចំណោមតំបន់ក្រីក្របំផុតមួយក្នុងពិភពលោក។
មូលហេតុនៃរដ្ឋប្រហារ មេយោធាបាននិយាយថា ខ្លួនបានដណ្តើមអំណាចដោយសារតែអសន្តិសុខ និងស្ថានភាពសេដ្ឋកិច្ចប៉ុន្តែមានការលើកឡើង ថាមេដឹកនាំរដ្ឋប្រហារហៀបនឹងត្រូវបណ្តេញចេញពីតំណែងដោយរដ្ឋាភិបាល។
ចំណាត់ការដែលបានប្រកាសកាលពីល្ងាចថ្ងៃអាទិត្យបានកើតឡើងនៅពេលដែលអ្នកគាំទ្ររដ្ឋប្រហាររាប់ម៉ឺននាក់បានប្រមូលផ្តុំគ្នានៅពហុកីឡាដ្ឋានក្នុងរដ្ឋធានីនីញ៉ាម៉េ (Niamey) របស់ប្រទេសនីហ្សេដើម្បីអបអរសាទរដល់ឧត្តមសេនីយ៍ដែលបានដណ្តើមអំណាច ឬក្រុមប្រឹក្សាជាតិសម្រាប់ការពារមាតុភូមិ (CNSP) ។លោកAmadou Abdramane អ្នកនាំពាក្យរបស់ CNSP បានលើកឡើងពីការគំរាមកំហែងនៃអន្តរាគមន៍យោធាពីសហគមន៍សេដ្ឋកិច្ចនៃរដ្ឋអាហ្វ្រិកខាងលិច (ECOWAS) ដែលជាហេតុផលសម្រាប់ការបិទដែនអាកាស។
លោកបាននិយាយថាចំពោះមុខការគំរាមកំហែងនៃការអន្តរាគមន៍ដែលកាន់តែច្បាស់តាមរយៈការរៀបចំរបស់ប្រទេសជិតខាងដែនអាកាសរបស់នីហ្សេត្រូវបានបិទចាប់ពីថ្ងៃនេះ … សម្រាប់យន្តហោះទាំងអស់រហូតដល់មានការជូនដំណឹងបន្ថែម។
នៅក្នុងសេចក្តីថ្លែងការណ៍មួយ នៅលើកញ្ចក់ទូរទស្សន៍ជាតិ លោកAbdramaneបាននិយាយថាមានការដាក់ពង្រាយកងកម្លាំងត្រៀមទុកនៅក្នុងប្រទេសអាហ្រ្វិកកណ្តាលចំនួនពីរក្នុងការរៀបចំសម្រាប់អន្តរាគមន៍ប៉ុន្តែមិនបានផ្តល់ព័ត៌មានលម្អិតនោះទេ។
ក្រុមប្រទេសអាហ្រ្វិកខាងលិច Ecowas បានព្រមានថាអាចនឹងមានការប្រើកម្លាំងប្រសិនបើប្រធានាធិបតីMohamed Bazoum មិនត្រូវបានគេដាក់ឱ្យដំណើរការឡើងវិញនៅម៉ោង ២៣យប់ថ្ងៃថ្ងៃអាទិត្យ ៕