លោក Phumtham Wechayachai អនុប្រធានគណបក្សភឿថៃបាននិយាយកាលពីថ្ងៃចន្ទថា បញ្ហាសេដ្ឋកិច្ចមិនអាចរង់ចាំឱ្យគណបក្ស ឆ្ពោះទៅមុខបន្តតែងតាំងមេដឹកនាំរបស់ខ្លួនលោកភីតា លីមចារឿនរ៉ាត់ ជានាយករដ្ឋមន្ត្រីបានទេ ខណៈដែលគណបក្សភឿថៃមានបេក្ខជននាយករដ្ឋមន្ត្រីចំនួនបីរូបដែលត្រៀមរួចជាស្រេចសម្រាប់ការងារនេះ។
លោក Phumtham បាននិយាយថា លោកភីតាមិនគួរបន្តយុទ្ធនាការ ដើម្បីឲ្យខ្លួនជាប់ឆ្នោតជានាយករដ្ឋមន្ត្រី និងធ្វើវិសោធនកម្មដកហូតសិទ្ធិសមាជិកព្រឹទ្ធសភាក្នុងការបោះឆ្នោតជ្រើសរើសនាយករដ្ឋមន្ត្រីនោះទេ។ ប្រសិនបើបរាជ័យពីរដងក្នុងការបោះឆ្នោត វានឹងអនុញ្ញាតឲ្យភឿថៃអាចដឹកនាំក្នុងការបង្កើតរដ្ឋាភិបាលថ្មី។
លោក Phumtham បាននិយាយថា គោលដៅរបស់គណបក្សនយោបាយទាំងប្រាំបីគឺដើម្បីបង្កើនល្បឿននៃការបង្កើតរដ្ឋាភិបាលថ្មីដោយសំដៅទៅលើសម្ព័ន្ធភាពគណបក្សចំនួនប្រាំបី ដែលរួមមាន MFP និងភឿថៃ។អនុមេដឹកនាំបក្សភឿថៃបាននិយាយថា ការបញ្ចប់សិទ្ធិបោះឆ្នោតរបស់សមាជិកព្រឹទ្ធសភាសម្រាប់នាយករដ្ឋមន្ត្រីគឺមិនមាននៅក្នុងអនុស្សរណៈនៃការយោគយល់គ្នាដែលត្រូវបានអនុម័តដោយគណបក្សទាំងប្រាំបីនោះទេ។
ជាមួយគ្នានេះដែរលោកក៏បានព្រមានថា ប្រសិនបើសម្ព័ន្ធមិត្តទាំងប្រាំបីមិនអាចឈានដល់កិច្ចព្រមព្រៀងលើបញ្ហានាយករដ្ឋមន្ត្រីទេ គណបក្សផ្សេងទៀតអាចនឹងបង្កើតរដ្ឋាភិបាលសំឡេងភាគតិច។ លោក Phumtham បាននិយាយថា គណបក្សផ្សេងទៀតមានអាសនៈសរុប១៨៨ ហើយអាចទទួលបានសំឡេងគាំទ្រពីសមាជិកព្រឹទ្ធសភាចំនួន ២៤៩ដែលផ្តល់ឱ្យពួកគេនូវសំឡេងភាគច្រើនពីសភាទាំងពីរ។
លោក Phumtham បាននិយាយថា យើងនៅតែចង់រក្សាសម្ព័ន្ធភាពទាំងប្រាំបី ប៉ុន្តែត្រូវតែមានចម្លើយច្បាស់លាស់ ជាជាងបន្តការបោះឆ្នោត សម្រាប់នាយករដ្ឋមន្ត្រីម្តងហើយម្តងទៀត ដោយគ្មានផ្លូវចេញសម្រាប់ប្រទេស។លោកបានមានប្រសាសន៍ថា “យើងមិនអាចរង់ចាំដល់ឆ្នាំក្រោយបានទេ ដោយសារបញ្ហាជាតិឥឡូវនេះធ្ងន់ធ្ងរ។ កុំបារម្ភអំពីបេក្ខជនរបស់គណបក្សភឿថៃ។ យើងមានបេក្ខភាពបីនាក់ នៅពេលដែលអ្វីៗច្បាស់លាស់ យើងអាចធ្វើការតែងតាំងភ្លាមៗ។
បេក្ខជនរបស់គណបក្សភឿថៃទាំងបីសម្រាប់ការងារកំពូលគឺ Paetongtarn Shinawatra, Srettha Thavisin និង Chaikasem Nitisiri។
ដោយសួរដើម្បីធ្វើអត្ថាធិប្បាយលើការសន្យារបស់សមាជិកព្រឹទ្ធសភាក្នុងការបោះឆ្នោតឲ្យបេក្ខជនបក្សភឿថៃ ប្រសិនបើ MFP ត្រូវបានគេដកចេញពីក្រុមចម្រុះ លោក Phumtham បាននិយាយថា នោះជាកត្តាមួយទៀតសម្រាប់ការពិចារណា៕