ញត្តិថ្មីៗចំនួនបួនរួមជាមួយនឹងសំណើសុំរំលាយគណបក្ស ឆ្ពោះទៅមុខ(MFP)ត្រូវបានច្រានចោលដោយគណៈកម្មាធិការរៀបចំការបោះឆ្នោត(EC)ដោយគ្មានមូលដ្ឋាន និងគ្មានហេតុផលសម្រាប់ការរំលាយ ។គណៈកម្មការរៀបចំការបោះឆ្នោតទាំងប្រាំមួយរូប បានសម្រេចជាឯកច្ឆ័ន្ទ ច្រានចោលបណ្តឹងរបស់លោក រួង គ្រី (Ruangkrai)ក្រោមហេតុផលថាគ្មានភស្តុតាងគ្រប់គ្រាន់បន្ទាប់ពីECបានបញ្ចប់ការពិនិត្យលើលក្ខណៈសម្បត្តិបេក្ខជនបោះឆ្នោត។
ប្រភពពីបាងកកប៉ុស្តិ៍បាននិយាយថា អគ្គលេខាធិការរបស់EC លោក Sawaeng Boonmee ក្នុងតួនាទីរបស់គាត់ជាមន្ត្រីចុះបញ្ជីគណបក្សនយោបាយបានច្រានចោលពាក្យបណ្តឹងចំនួនបួនដែលបានធ្វើឡើងប្រឆាំងនឹងគណបក្សឆ្ពោះទៅមុខដោយគូប្រជែងរបស់ខ្លួនថាគណបក្សនេះបានរំលោភច្បាប់គណបក្សនយោបាយ។ប្រភពដដែលបានបន្តថាបណ្តឹងចំនួនបីបានចោទប្រកាន់ថាបំពានច្បាប់ដែលការពាររបបរាជានិយម។
គណបក្សនយោបាយត្រូវបានហាមប្រាមមិនឱ្យធ្វើអ្វីដែលប៉ះពាល់ដល់ការសម្រេចតាមរដ្ឋធម្មនុញ្ញដែលមានព្រះមហាក្សត្រជាព្រះប្រមុខរដ្ឋ ឬអ្វីដែលមើលឃើញថាជាអំពើអរិភាពចំពោះរាជាធិបតេយ្យអាស្រ័យរដ្ឋធម្មនុញ្ញ យោងតាមច្បាប់។ពាក្យបណ្តឹងទាំង៤រួមមាន៖
បណ្តឹងទី១លោក Patipat Santipada សមាជិកបក្សឆ្ពោះទៅមុខត្រូវបានចោទប្រកាន់ថាបានវាយប្រហារគម្រោងអភិវឌ្ឍន៍មួយក្រោមការផ្តួចផ្តើមរបស់ស្តេចរាមាទី៩ក្នុងព្រឹត្តិការណ៍ឃោសនាបោះឆ្នោតកាលពីថ្ងៃទី ៥ខែមីនា។
បណ្តឹងទី២ មេដឹកនាំចលនាឆ្ពោះទៅមុខលោក Pita Limjaroenrat ត្រូវបានចោទប្រកាន់ពីបទបង្ហាញអរិភាពរបស់គាត់ចំពោះរបបរាជាធិបតេយ្យដោយផ្តល់បទសម្ភាសន៍បង្ហាញពីការគាំទ្ររបស់គាត់ចំពោះវិសោធនកម្មមាត្រា ១១២នៃក្រមព្រហ្មទណ្ឌ ឬច្បាប់ប្រមាថព្រះមហាក្សត្រ។
បណ្តឹងទី៣ លោក Amornrat Chokepamitkul នាយកប្រតិបត្តិនៃគណបក្ស ឆ្ពោះទៅមុខត្រូវបានចោទប្រកាន់ពីបទបង្ហាញអរិភាពប្រឆាំងនឹងរបបរាជានិយមដោយបង្ហាញការគាំទ្រនៅលើFacebookចំពោះការកែប្រែមាត្រា ១១២។
បណ្តឹងទី៤ គណបក្សឆ្ពោះទៅមុខត្រូវបានចោទប្រកាន់ពីបទអនុញ្ញាតិឱ្យអ្នកខាងក្រៅមានឥទ្ធិពលលើកិច្ចការរបស់ខ្លួន ដោយអនុញ្ញាតឱ្យលោក Thanathorn Juangroongruangkit និង Phannikar Wanit ដែលជាអតីតមេដឹកនាំនិងជាអតីតនាយកប្រតិបត្តិនៃគណបក្សអនាគតអនាគតដែលត្រូវបានរំលាយនិយាយនៅក្នុងកិច្ចការរបស់បក្សខ្លួន។
ប្រភពដដែលបានបន្តថា លោក Sawaeng បានច្រានចោលបណ្តឹងទាំងបួនដោយសារតែខ្វះភស្តុតាង។កាលពីថ្ងៃសុក្រ បណ្តឹងប្រឆាំងនឹងមេដឹកនាំ គណបក្សលោក Pita ដែលធ្វើឡើងដោយសកម្មជននយោបាយ លោកRuangkrai Leekitwattana ក៏ត្រូវបានច្រានចោលដែរ។
លោក Ruangkrai បានចោទប្រកាន់ថាលោក Pitaមិនមានសិទ្ធិចូលរួមប្រកួតប្រជែងការបោះឆ្នោតថ្ងៃទី១៤ខែឧសភា ដោយសារតែគាត់កាន់កាប់ភាគហ៊ុនចំនួន 42,000នៅក្នុងITVPlcដែលជាក្រុមហ៊ុនប្រព័ន្ធផ្សព្វផ្សាយ។
ទោះជាយ៉ាងណាក្តីEC នឹងបន្តស៊ើបអង្កេតថាតើ Pita បានដាក់ពាក្យជាបេក្ខជនសមាជិកសភាក្នុងបញ្ជីគណបក្សបើទោះបីជាដឹងថាគាត់ប្រហែលជាមិនមានសិទ្ធិឈរឈ្មោះសម្រាប់កៅអីសភាក៏ដោយ។
អ្នកសង្កេតការណ៍មួយចំនួនបាននិយាយថា ការចោទប្រកាន់នេះគឺធ្ងន់ធ្ងរជាងការចោទប្រកាន់ពីការកាន់កាប់ភាគហ៊ុនព្រោះវាជាបទចោទប្រកាន់ព្រហ្មទណ្ឌ ហើយវាអាចចំណាយពេលយូរជាងនេះសម្រាប់ Pita ដើម្បីបញ្ជាក់ថាគាត់មិនមានកំហុស៕