ឆ្មាំសមុទ្រហ្វីលីពីនបាននិយាយកាលពីថ្ងៃចន្ទទី១៥ខែឧសភាថាប្រទេសហ្វីលីពីនបានដំឡើងឧបករណ៍ការពារដែនសមុទ្រដែលគេហៅថា Buoyនៅក្នុងតំបន់ជម្លោះនៃសមុទ្រចិនខាងត្បូង រួមទាំងថ្មប៉ប្រះទឹក ដើម្បីការពារអធិបតេយ្យភាពរបស់ខ្លួន ដែលនាវាចិនជាង១០០គ្រឿងពេលថ្មីៗនេះត្រូវបានឃ្លាំមើល ។
ឆ្មាំឆ្នេរសមុទ្រហ្វីលីពីនគ្រោងនឹងដាក់ពង្រាយBuoyចំនួនប្រាំមួយបន្ថែមទៀតនៅក្នុងសមុទ្រដែលមានជម្លោះនៅចុងឆ្នាំនេះ ដែលទីប្រឹក្សាសន្តិសុខជាតិលោក Eduardo Ano បាននិយាយថាយើងមានភាពម៉ឺងម៉ាត់ និងប្តេជ្ញាការពារ ទឹកដី និងអធិបតេយ្យភាពរបស់យើង។
Buoyដែលសម្គាល់ដោយទង់ជាតិហ្វីលីពីន និងឈ្មោះក្នុងតំបន់ ត្រូវបានដាក់ពង្រាយនៅថ្មប៉ប្រះទឹក Julian Felipe (Whitsun) កោះ Patag ថ្មប៉ប្រះទឹក Balagtas កោះ Kota និងកោះ Panata រវាង ថ្ងៃទី ១០ និង ១៣ ឧសភា។
Buoy គឺជាយុថ្កាបណ្តែតទឹកដែលមានមុខងារសម្រាប់បង្ហាញសញ្ញាអាសន្នដល់នាវារបរទេសដែលរំលោភចូលដែនទឹករបស់ប្រទេសណាមួយ។លោកបានបន្ថែមថាជាមួយនឹងឧបករណ៍នេះអ្នករាល់គ្នាដែលធ្វើដំណើរតាមផ្លូវសមុទ្រនឹងត្រូវបានប្រកាសអាសន្នថាពួកគេកំពុងចូលក្នុងទឹកដីហ្វីលីពីន។
កាលពីខែមុន នាវាចិនជាង ១០០ ត្រូវបានគេប្រទះឃើញស្នាក់នៅជុំវិញតំបន់ថ្មប៉ប្រះទឹក Julian Felipe អស់រយៈពេលជាងមួយសប្តាហ៍ ខណៈដែលនាវាចិនបានរារាំងនាវាឆ្មាំឆ្នេរសមុទ្រហ្វីលីពីនអំឡុងពេលល្បាតនៅជិត Second Thomas Shoal ៕