ប្រធានគណបក្សចលនាឆ្ពោះទៅមុខ លោក Pita Limjaroenrat បានប្រកាសកាលពីថ្ងៃចន្ទ ថាលោកនឹងបង្កើតរដ្ឋាភិបាលចម្រុះតាមការគ្រោងទុកដែលមានអតីតគណបក្សប្រឆាំងចំនួនប្រាំ និងគណបក្សថ្មីមួយ ដែលមានសមាជិកសភាសរុបចំនួន ៣០៩អាសនៈនិងរូបលោកជានាយករដ្ឋមន្ត្រី។នេះបើយោងតាមការចេញផ្សាយរបស់ការសែតថៃបាងកកប៉ុស្តិ៍កាលពីថ្ងៃចន្ទទី១៥ ខែឧសភាឆ្នាំ២០២៣។
លោកPitaបានធ្វើសេចក្តីប្រកាសបែបនេះបន្ទាប់ពីគណៈកម្មាធិការរៀបចំការបោះឆ្នោតបានប្រកាសថាគណបក្សឆ្ពោះទៅមុខរបស់លោក ជាអ្នកឈ្នះនៅក្នុងការបោះឆ្នោតសកលកាលពីថ្ងៃអាទិត្យជាមួយនឹងសមាជិកសភាចំនួន១៥១ ដែលក្នុងនោះ១១២មកពីមណ្ឌលបោះឆ្នោត និង៣៩ពីបញ្ជីគណបក្ស។
លទ្ធផលបឋមបង្ហាញថាគណបក្ស Move Forward ទទួលបាន ១៥១ អាសនៈ តាមពីក្រោយដោយគណបក្សភឿថៃ ដែលមាន ១៤១ អាសនៈ។ ឈរនៅលេខរៀងទី៣ គឺគណបក្ស Bhumjaithai ដែលទទួលបាន ៧០ អាសនៈ។
គណបក្ស Palang Pracharath ដែលជាគណបក្សរបស់ឧបនាយករដ្ឋមន្ត្រីប្រាវីត វង្សស៊ូវណ្ណ ទទួលបាន ៤០ អាសនៈ។
គណបក្ស United Thai Nation របស់ឧត្តមសេនីយ៍ប្រាយុទ្ធ មាន៣៦អាសនៈ ខណៈដែលគណបក្សចាស់ជាងគេរបស់ប្រទេសគឺគណបក្សប្រជាធិបតេយ្យទទួលបាន ២៥អាសនៈ។
លោកPita អាយុ ៤២ ឆ្នាំដែលបញ្ចប់ការសិក្សានៅសាកលវិទ្យាល័យ Harvard បានប្រកាសនៅលើ Twitter កាលពីវេលាម៉ោង២ល្ងាចថ្ងៃចន្ទថាសួស្តីបងប្អូនជនរួមជាតិថ្ងៃនេះខ្ញុំ Pita Limjaroenrat ច្បាស់ហើយនិងត្រៀមខ្លួនរួចរាល់ហើយដើម្បីក្លាយជានាយករដ្ឋមន្ត្រីទី ៣០ របស់ប្រទេសថៃ។
យើងចែករំលែកក្តីស្រមៃ និងក្តីសង្ឃឹមដូចគ្នា ហើយយើងជឿថាប្រទេសថៃដែលយើងស្រលាញ់អាចប្រសើរជាងនេះ។ការផ្លាស់ប្តូរអាចធ្វើទៅបានប្រសិនបើយើងចាប់ផ្តើមធ្វើវាចាប់ពីថ្ងៃនេះ… ក្តីស្រមៃ និងក្តីសង្ឃឹមរបស់យើងគឺ សាមញ្ញ និងស្មោះត្រង់។
ខ្ញុំមិនគិតថាអ្នកយល់ព្រម ឬមិនយល់ស្របជាមួយខ្ញុំទេ ខ្ញុំនឹងធ្វើជានាយករដ្ឋមន្ត្រីរបស់អ្នក។ មិនថាអ្នកបោះឆ្នោតឱ្យខ្ញុំ ឬអត់ ខ្ញុំនឹងបម្រើអ្នក។
លោក Pita បាននិយាយថា លោកបានទូរស័ព្ទទៅលោកស្រី Paetongtarn Shinawatra ដែលជាមេដឹកនាំនៃគ្រួសារភឿថៃ ហើយបានអបអរសាទរចំពោះលោកស្រីចំពោះការប្តេជ្ញាចិត្តក្នុងអំឡុងពេលយុទ្ធនាការនេះហើយបានអញ្ជើញគណបក្សរបស់លោកស្រីឱ្យចូលរួមក្នុងក្រុមចម្រុះ។ លោកស្រី Paetongtarn ក៏បានអបអរសាទរ លោក Pita ដោយនិយាយថាប្រព័ន្ធផ្សព្វផ្សាយគួរតែត្រូវបានជូនដំណឹងថាគណបក្សទាំងពីរបានពិភាក្សាគ្នា ដើម្បីផលប្រយោជន៍នៃតម្លាភាព។
អតីតបក្សប្រឆាំងបីទៀតដែលលោកបានទាក់ទងគឺថៃ សាងថៃ ប្រាឆាឆាត និងសេរីរាមាថៃ។ គណបក្សទាំងប្រាំមានសមាជិកសភាចំនួន៣០៨រូបរួមគ្នា។ លោកបានបន្តថា គណបក្សទាំងប្រាំមួយនឹងមានសមាជិកសភាសរុបចំនួន ៣០៩ រូប ដែលគ្រប់គ្រាន់ដើម្បីក្លាយជារដ្ឋាភិបាលសំឡេងភាគច្រើន។
តើលោកPita Limjaroenrat ជានណា?
លោកPita Limjaroenrat កើតនៅថ្ងៃទី ៥ ខែកញ្ញា ឆ្នាំ ១៩៨០ គឺជាអ្នកនយោបាយ និងអ្នកជំនួញរបស់ប្រទេសថៃ។លោកបានចូលស្នងតំណែងប្រធានគណបក្សអនាគតទៅមុខដែលត្រូវបានរំលាយចោល។លោកគាត់គឺជាកូនប្រុសច្បងរបស់លោក Pongsak Limjaroenrat អតីតទីប្រឹក្សារដ្ឋមន្ត្រី
ក្រសួងកសិកម្ម និងសហករណ៍ ។ លោកគឺជាក្មួយប្រុសរបស់លោក Padung Limjaroenrat ដែលជាអតីតលេខារដ្ឋមន្ត្រីក្រសួងមហាផ្ទៃនិងជាជំនួយការជិតស្និទ្ធរបស់លោកនាយករដ្ឋមន្ត្រីថាក់ស៊ីនស៊ីណាវ៉ាត្រា។
ក្រោយបញ្ចប់ការសិក្សានៅឆ្នាំ ២០០២ជាមួយនឹងកិត្តិយសថ្នាក់ដំបូង លោកទទួលបានអាហារូបករណ៍ទៅសិក្សានៅសាកលវិទ្យាល័យTexas។ក្រោយមកលោកបានទទួលអាហារូបករណ៍និស្សិតអន្តរជាតិពីសាកលវិទ្យាល័យHarvard ហើយក្លាយជានិស្សិតថៃដំបូងគេ។គាត់បានបញ្ចប់ថ្នាក់អនុបណ្ឌិតផ្នែកគោលនយោបាយសាធារណៈរួមគ្នានៅក្នុងសាលា John F. Kennedy School of Government នៃសាកលវិទ្យាល័យ Harvard និងអនុបណ្ឌិតផ្នែកគ្រប់គ្រងពាណិជ្ជកម្មនៅសាលា Sloan School of Management of Massachusetts Institute of Technology។
ក្នុងវ័យ២៥ឆ្នាំលោកPitaបានត្រលប់ទៅប្រទេសថៃវិញដើម្បីកាន់តំណែងជានាយកគ្រប់គ្រង CEO Agrifood ដែលជាអាជីវកម្មប្រេងកន្ទក់ដែលគ្រប់គ្រងដោយគ្រួសាររបស់គាត់បន្ទាប់ពីការស្លាប់របស់ឪពុកគាត់។ លោកក៏បានបម្រើការជានាយកប្រតិបត្តិ Grab Thailand ពីឆ្នាំ២០១៧ ដល់ឆ្នាំ ២០១៨។
ជីវិតនយោបាយដំបូងឡើយលោក Pita បានចូលរួមជាសមាជិកនៃ Future Forward Partyដឹកនាំដោយលោក Thanathorn Juangroongruangkit។តាមការអញ្ជើញរបស់មេដឹកនាំគណបក្ស Thanathorn Juangroongruangkitលោកបានទទួលយកការផ្តល់ជូនដើម្បីក្លាយជាបេក្ខជននៅក្នុងការបោះឆ្នោតទូទៅរបស់ប្រទេសថៃឆ្នាំ២០១៩ហើយបានឈ្នះអាសនៈក្នុងសភាតំណាងរាស្រ្តជាតំណាងគណបក្សទីបួនសម្រាប់គណបក្សរបស់គាត់៕