ប្រធានាធិបតីអាមេរិកលោកចូ បៃឌិន បាននិយាយកាលពីថ្ងៃសុក្រថាកិច្ចខិតខំប្រឹងប្រែងគ្រប់គ្រងកាំភ្លើង នាពេលបច្ចុប្បន្នមិនមែនសំដៅលើការដកកាំភ្លើងរបស់បុគ្គលណាម្នាក់នោះទេប៉ុន្តែត្រូវអនុវត្តន៍អោយមានប្រសិទ្ធភាពក្នុងការគ្រប់គ្រងអាវុធ។ការលើកឡើងបែបនេះក៏ដោយសារតែលោកបានកត់សម្គាល់ថាកន្លែងជាច្រើន នៅក្នុងសហរដ្ឋអាមេរិកបានក្លាយទៅជាវាលពិឃាត។
ថ្លែងពីសេតវិមានលោកប្រធានាធិបតីបាននិយាយថា គ្មានអ្វីត្រូវបានធ្វើបន្ទាប់ពីការបាញ់ប្រហារទ្រង់ទ្រាយធំ ជាច្រើនលើកនាពេលថ្មីៗនេះ ប៉ុន្តែលើកនេះយើងត្រូវតែធ្វើអ្វីមួយ។
លោកបានជំរុញសមាជិកសភាហាមប្រាមអាវុធវាយប្រហាររបស់ឯកជន និងអាវុធដែលមានសមត្ថភាពខ្ពស់ ដើម្បីទប់ស្កាត់ការបាញ់ប្រហារដ៏ធំដែលកំពុងញាំញីប្រទេសនេះ។
លោកបានលើកជាសំណួរថា«តើយើងសុខចិត្តទទួលយកការធ្វើឃាតប៉ុន្មានទៀត?» លោក បៃឌិនបានបញ្ជាក់ថាការហាមឃាត់អាយុសម្រាប់ការទិញអាវុធគួរតែត្រូវបានដំឡើងពី ១៨ ទៅ២១ឆ្នាំ។ លោកបានបន្តថាយើងគួរតែមានច្បាប់បម្រុងទុកស្តីអំពីសុវត្ថិភាព និងការទទួលខុសត្រូវផ្ទាល់ខ្លួនសម្រាប់ការមិនចាក់សោកាំភ្លើង។វាដល់ពេលដែលព្រឹទ្ធសភាត្រូវធ្វើអ្វីមួយហើយ។ សមាជិកសភាមិនអាចធ្វើឲ្យប្រជាជនអាមេរិកបរាជ័យទៀតឡើយ។
ជាមួយគ្នានេះដែរលោកក៏បានទាក់ទាញការយកចិត្តទុកដាក់ចំពោះបញ្ហាផ្លូវចិត្តនៅក្នុងសហរដ្ឋអាមេរិកដោយនិយាយថា មានវិបត្តិសុខភាពផ្លូវចិត្តធ្ងន់ធ្ងរនៅក្នុងប្រទេស។យើងត្រូវការសេវាសុខភាពផ្លូវចិត្តបន្ថែមទៀតដើម្បីដោះស្រាយបញ្ហា៕
