ក្នុងសុន្ទរកថាជាវីដេអូទៅកាន់វេទិកាសេដ្ឋកិច្ចពិភពលោកនៅទីក្រុងDavosប្រទេសស្វ៊ីសប្រធានាធិបតីអ៊ុយក្រែន លោកហ្សេឡិនស្គីបានជំរុញសហគមន៍ពិភពលោកត្រូវតែដាក់ទណ្ឌកម្ម អតិបរមាប្រឆាំងនឹងប្រទេសរុស្ស៊ី រួមទាំងការហាមឃាត់ប្រេងទាំងស្រុងផងដែរ។
លោកបញ្ជាក់ថាសហគមន៍អន្តរជាតិត្រូវតែត្រៀមខ្លួនជាស្រេចដើម្បីប្រើប្រាស់ទណ្ឌកម្មជាការការពារ មិនមែនគ្រាន់តែឆ្លើយតបនោះទេ លោកបានអះអាងថា ប្រសិនបើទណ្ឌកម្មទាំងនេះមានតាំងពីដំបូងនោះ រុស្ស៊ីនឹងមិនអាចឈ្លានពានអ៊ុយក្រែនបានឡើយហើយលោកបានអំពាវនាវឲ្យបង្កកធនាគាររុស្ស៊ី និងបញ្ឈប់ពាណិជ្ជកម្មទាំងស្រុង។
អ៊ុយក្រែនកាត់ទោសទាហានរុស្ស៊ីជាប់គុកមួយជីវិត
នៅក្នុងសំណុំរឿងឧក្រិដ្ឋកម្មសង្គ្រាមលើកដំបូងចាប់តាំងពីការឈ្លានពានរបស់រុស្ស៊ីតុលាការអ៊ុយក្រែនបានកាត់ទោសមេបញ្ជាការរថក្រោះរុស្ស៊ីម្នាក់ឱ្យជាប់គុកអស់មួយជីវិតពីបទសម្លាប់ជនស៊ីវិលម្នាក់។
ទាហានដែលត្រូវបានចាប់ខ្លួនមានឈ្មោះថាVadim Shishimarin ត្រូវបានកាត់ទោសពីបទសម្លាប់លោកOleksandr Shelipov អាយុ ៦២ឆ្នាំកាលពីថ្ងៃទី២៨ ខែកុម្ភៈ។គាត់បានសារភាពថាបានបាញ់លោក Shelipov ប៉ុន្តែបាននិយាយថាគាត់បានធ្វើតាមបញ្ជា និងបានសុំការអភ័យទោសដល់ប្រពន្ធរងគ្រោះ។ឧក្រិដ្ឋកម្មសង្គ្រាមជាច្រើនផ្សេងទៀតកំពុងត្រូវបានស៊ើបអង្កេតដោយអ៊ុយក្រែន។
ទីក្រុងមូស្គូបានបដិសេធថាកងទ័ពរបស់ខ្លួនបានកំណត់គោលដៅលើជនស៊ីវិលក្នុងអំឡុងពេលការលុកលុយ ខណៈដែលអ៊ុយក្រែននិយាយថា ឧក្រិដ្ឋកម្មសង្គ្រាមជាង ១១០០០អាចនឹងកើតឡើង។
រុស្ស៊ីត្រៀមបន្តការចរចាជាមួយអ៊ុយក្រែន
លោក វ្ល៉ាឌីមៀ មេឌីនស្គី ប្រធានក្រុមចរចារុស្ស៊ីបាននិយាយកាលពីថ្ងៃអាទិត្យថារុស្ស៊ីមានឆន្ទៈក្នុងការបន្តការចរចា ប៉ុន្តែគំនិតផ្តួចផ្តើមដើម្បីបន្តគឺជាមួយទីក្រុងគៀវ។
ជំនួយការរបស់វិមានក្រឹមឡាំង លោក វ្ល៉ាឌីមៀ មេឌីនស្គី បាននិយាយនៅក្នុងបទសម្ភាសន៍ជាមួយទូរទស្សន៍បេឡារុស ថាសម្រាប់រុស្ស៊ីយើងត្រៀមខ្លួនជាស្រេចដើម្បីបន្តការសន្ទនា។
លោកបន្តថាការផ្អាកការចរចាគឺជាគំនិតផ្តួចផ្តើមរបស់អ៊ុយក្រែនទាំងស្រុងដោយបន្ថែមថាបាល់គឺនៅជើងរបស់ពួកគេ។រុស្ស៊ីមិនដែលបដិសេធការចរចាទេ។
កាលពីថ្ងៃអង្គារ អ្នកចរចានាំមុខនៃទីក្រុងគៀវ លោក Mykhaylo Podolyak បាននិយាយថា កិច្ចពិភាក្សាជាមួយទីក្រុង មូស្គូត្រូវបានផ្អាកបន្ទាប់ពីត្រូវបានធ្វើឡើងជាទៀងទាត់នៅក្នុងដំណាក់កាលដំបូងនៃជម្លោះប៉ុន្តែមិនមានលទ្ធផលច្រើននោះទេ៕