យោងតាមមន្ត្រីរដ្ឋបាលម្នាក់របស់លោកបៃឌិនដែលនិយាយក្នុងលក្ខខណ្ឌសុំមិនបញ្ចេញឈ្មោះ បានឱ្យដឹងថា សហរដ្ឋអាមេរិកចក្រភពអង់គ្លេសនិងអូស្ត្រាលីគ្រោងនឹងធ្វើការរួមគ្នាតាមរយៈសម្ព័ន្ធសន្តិសុខដែលទើបបង្កើតថ្មីហៅកាត់ថា AUKUS ដើម្បីអភិវឌ្ឍមីស៊ីលលឿនជាងសំឡេង។
ចំណាត់ការនេះកើតឡើងចំពេលមានការព្រួយបារម្ភកាន់តែខ្លាំងឡើងដោយសហរដ្ឋអាមេរិកនិងសម្ព័ន្ធមិត្តអំពីការកើនឡើងឥទ្ធិពលយោធារបស់ចិននៅក្នុងតំបន់ប៉ាស៊ីហ្វិក។
សហរដ្ឋអាមេរិករុស្សីនិងចិនសុទ្ធតែបានសម្លឹងរកការអភិវឌ្ឍន៍បន្ថែមទៀតនូវមីស៊ីលល្បឿនលឿនជាងសំឡេង ដែល មិនអាចស្ទាក់ចាប់បានដោយប្រព័ន្ធការពារមីស៊ីលណាមួយនាពេលបច្ចុប្បន្ន។
កាលពីខែតុលា ឧត្តមសេនីយអាមេរិកលោក Mark Milley ដែលជាប្រធានអគ្គសេនាធិការចម្រុះបានបញ្ជាក់ថា ប្រទេសចិនបានធ្វើការសាកល្បងប្រព័ន្ធអាវុធលឿនជាងសំឡេងដែលជាផ្នែកមួយនៃកិច្ចខិតខំប្រឹងប្រែងដ៏ខ្លាំងក្លារបស់ខ្លួន ដើម្បីឈានទៅមុខក្នុងវិស័យអវកាស និងបច្ចេកវិទ្យាយោធា។
រុស្ស៊ីបានប្រើមីស៊ីលលឿនជាងសំឡេងច្រើនដងក្នុងប្រទេសអ៊ុយក្រែន នេះបើតាមមេបញ្ជាការកំពូលរបស់អាមេរិកនៅអឺរ៉ុប។ យោធារុស្ស៊ីបាននិយាយថាប្រព័ន្ធ Avangard របស់វាមានសមត្ថភាពហោះហើរលឿនជាងសំឡេង ២៧ ដង និងធ្វើសមយុទ្ធយ៉ាងមុតស្រួចនៅពេលធ្វើដំណើរទៅកាន់គោលដៅ ដើម្បីគេចពីប្រព័ន្ធការពារមីស៊ីលរបស់សត្រូវ៕
