យោងតាមការចេញផ្សាយរបស់សារព័ត៌មានរដ្ឋរុស្ស៊ី RT កាលនៅថ្ងៃសៅរ៍ ទី១២ ខែមីនា ឆ្នាំ២០២២បានអោយដឹងថារដ្ឋាភិបាលឥណ្ឌាបានចេញសេចក្តីថ្លែងការណ៍ផ្លូវការ សុំទោសចំពោះការបាញ់មីស៉ីល ដោយចៃដន្យចូលទៅក្នុងប្រទេសប៉ាគីស្ថានកាលពីថ្ងៃទី៩មីនា។
កាលពីថ្ងៃទី៩ខែមីនាឆ្នាំ២០២២នៅក្នុងអំឡុងពេលត្រួតពិនិត្យថែទាំជាប្រចាំមួយ ក៏មានបញ្ហាបច្ចេកទេសមួយបានកើតឡើង ធ្វើអោយផ្ទុះមីស៊ីលមួយគ្រាប់ធ្លាក់ទៅក្នុងទឹកដីប៉ាគីស្ថាន។ការិយាល័យបរទេសរបស់ប្រទេសប៉ាគីស្ថានបានកោះហៅ ភារធារីឥណ្ឌានៅទីក្រុងអ៊ីស្លាម៉ាបាដមកធ្វើការតវ៉ាជុំវិញអ្វីដែលខ្លួនហៅថាជាការរំលោភបំពានដែនអាកាសរបស់ខ្លួនដោយមិនបង្កហេតុ។
ក្រសួងការពារជាតិឥណ្ឌាបាននិយាយនៅក្នុងសេចក្តីថ្លែងការណ៍មួយកាលពីថ្ងៃសុក្រថាយើងមានការសោកស្តាយយ៉ាងខ្លាំងចំពោះឧប្បត្តិហេតុនេះ។ទោះជាយ៉ាងណាក៏ដោយវាបានធូរស្រាលបន្តិចដោយសារតែមិនមានអ្នកបាត់បង់អាយុជីវិតដោយសារគ្រោះថ្នាក់នេះទេ។ជាមួយគ្នានេះដែររដ្ឋាភិបាលឥណ្ឌាបានបញ្ជាឱ្យតុលាការស៊ើបអង្កេតកម្រិតខ្ពស់ឧប្បត្តិហេតុនេះ។
គួររំឭកថាឥណ្ឌា និងប៉ាគីស្ថាន គឺជាសត្រូវនឹងគ្នាតាំងពីឆ្នាំ 1947នៅពេលដែលឥណ្ឌាទទួលបានឯករាជ្យរបស់ខ្លួនពីចក្រភពអង់គ្លេសហើយត្រូវបានបែងចែកទៅជារដ្ឋដាច់ដោយឡែក។ ភាគីទាំងពីរបានប៉ះទង្គិចគ្នាផ្នែកយោធាជាច្រើនដងចាប់តាំងពីពេលនោះមក ថ្មីបំផុតក្នុងឆ្នាំ ២០១៩៕
