យោងតាមប្រភពព័ត៌មានបាងកកប៉ុស្ត៍ចេញផ្សាយកាលពី ថ្ងៃអង្គារទី ៩វិច្ឆិកា ថាតុលាការរបបយោធាមីយ៉ាន់ម៉ានឹងប្រកាសសាលក្រមរបស់ខ្លួននៅខែក្រោយថាតើមេដឹកនាំដែលត្រូវបានបណ្តេញចេញពីអំណាចលោកស្រីអ៊ុងសាន ស៊ូជីបានបំពានច្បាប់ហាមឃាត់ការប្រមូលផ្តុំកូវីដ-១៩ ក្នុងអំឡុងពេលបោះឆ្នោតដែលគណបក្សរបស់លោកស្រីឈ្នះភ្លូកទឹកភ្លូកដីកាលពីឆ្នាំមុនឬយ៉ាងណា។
ប្រទេសមីយ៉ាន់ម៉ាបានស្ថិតក្នុងភាពចលាចលចាប់តាំងពីរដ្ឋប្រហារខែកុម្ភៈដែលបានបង្កឱ្យមានការតវ៉ាដ៏ធំ និងការបង្ក្រាបយ៉ាងបង្ហូរឈាមលើអ្នកប្រឆាំង។
អ្នកស្រី ស៊ូជី អាយុ ៧៦ ឆ្នាំ បានឡើងកាត់ទោសកាលពីខែមិថុនា ហើយប្រឈមនឹងការចោទប្រកាន់ពីការនាំចូលវិទ្យុទាក់ទង Walkie Talkies ដោយខុសច្បាប់រហូតទៅដល់បទចោទការបះបោរ។
ប្រព័ន្ធផ្សព្វផ្សាយត្រូវបានហាមឃាត់មិនឱ្យចូលរួមក្នុងដំណើរការកាត់ក្តីនៅតុលាការពិសេសក្នុងរដ្ឋធានី Naypyidaw ហើយថ្មីៗនេះរបបយោធាបានហាមឃាត់ក្រុមអ្នកច្បាប់របស់នាងមិនឱ្យនិយាយជាមួយអ្នកសារព័ត៌មាន។
កាលពីថ្ងៃអង្គារលោកស្រីស៊ូជីបានបង្ហាញខ្លួននៅក្នុងសវនាការចុងក្រោយក្នុងការកាត់ក្តីពីបទចោទប្រកាន់ថាបានបំពានបម្រាមហាមឃាត់កូវីដ-១៩ក្នុងអំឡុងពេលការបោះឆ្នោតឆ្នាំ 2020 ។
លោកស្រីនឹងផ្តល់សក្ខីកម្មការពារខ្លួននៅសប្តាហ៍ក្រោយ ។ដីកាចុងក្រោយដែលប្រកាសសាលក្រមរបស់តុលាការ ត្រូវបានកំណត់សម្រាប់ថ្ងៃទី 14 ខែធ្នូ។លោកស្រី ស៊ូជី ប្រឈមនឹងការជាប់ពន្ធនាគាររយៈពេល ៣ ឆ្នាំ ប្រសិនបើរកឃើញថាមានកំហុស។
តុលាការរបបយោធាក៏នឹងបើកសវនាការកាត់ក្តីដាច់ដោយឡែកមួយសម្រាប់បទញុះញង់នៅសប្តាហ៍ក្រោយ ដើម្បីបញ្ចប់នីតិវិធីដែលអាចឃើញម្ចាស់ពានរង្វាន់ណូបែលត្រូវជាប់គុកជាច្រើនទសវត្សរ៍។
កាលពីខែមុនលោក Win Htein អតីតសមាជិកសភារបស់គណបក្ស NLD និងជាជំនួយការជិតស្និទ្ធរបស់លោកស្រី ស៊ូជី ត្រូវបានកាត់ទោសឱ្យជាប់គុក 20 ឆ្នាំពីបទក្បត់ជាតិ ដែលជាសមាជិកជាន់ខ្ពស់ដំបូងគេរបស់គណបក្សដែលត្រូវបានកាត់ទោសដោយតុលាការរបបយោធា៕
