អង្គការរបស់លោកបាននិយាយថា អតីតអ្នកការទូត និងជាចរចាចំណាប់ខ្មាំងរបស់សហរដ្ឋអាមេរិក លោក Bill Richardson បានទៅដល់ប្រទេសមីយ៉ាន់ម៉ាក្នុង បេសកកម្មមនុស្សធម៌ឯកជន”ខណៈដែលប្រទេសនេះឈានចូលរយៈពេលប្រាំបួនខែក្រោមរបបយោធាដែលបានឃុំខ្លួនអ្នកនយោបាយកំពូលៗនិងអ្នកកាសែតអាមេរិកម្នាក់ផងដែរ។
មីយ៉ាន់ម៉ាធ្លាក់ចូលក្នុងភាពចលាចលចាប់តាំងពីរដ្ឋប្រហារថ្ងៃទី១ ខែកុម្ភៈដោយទម្លាក់មេដឹកនាំស៊ីវិលលោកស្រី Aung San Suu Kyi។ កងកម្លាំងសន្តិសុខបានបើកការបង្ក្រាបយ៉ាងបង្ហូរឈាម ដែលបានសម្លាប់មនុស្សជាង 1,200 នាក់ ។នេះបើយោងតាមក្រុមឃ្លាំមើលក្នុងតំបន់។
នៅក្នុងសេចក្តីថ្លែងការណ៍ របស់មជ្ឍមណ្ឌល Richardson បានអោយដឹងថា អតីតឯកអគ្គរដ្ឋទូតអង្គការសហប្រជាជាតិ Richardson ដែលបានចេញដំណើរកាលពីថ្ងៃអាទិត្យ នឹងពិភាក្សាការផ្តល់ថ្នាំបង្ការ កូវីដ-១៩ បញ្ហាមនុស្សធម៌ ការផ្គត់ផ្គង់វេជ្ជសាស្ត្រ និងតម្រូវការសុខភាពសាធារណៈផ្សេងទៀត។
សេចក្តីថ្លែងការណ៍មិនបានលើកឡើងថាតើលោក Richardson នឹងលើកករណីអ្នកកាសែតអាមេរិក លោកDanny Fenster ដែលត្រូវបានឃុំខ្លួនកាលពីខែឧសភា ក្រោមបទចោទប្រកាន់លើកទឹកចិត្តឱ្យមានការប្រឆាំងនឹងយោធា និងសមាគមខុសច្បាប់។
និពន្ធនាយកនៃសារព័ត៌មានក្នុងស្រុក Frontier Myanmar លោក Fenster ត្រូវបានឃុំខ្លួននៅអាកាសយានដ្ឋានអន្តរជាតិ Yangon ខណៈដែលគាត់ព្យាយាមចាកចេញពីប្រទេស។
បច្ចុប្បន្នគាត់កំពុងស្ថិតក្នុងការកាត់ទោសនិងប្រឈមនឹងការជាប់ពន្ធនាគាររយៈពេលប្រាំមួយឆ្នាំ ប្រសិនបើត្រូវបានកាត់ទោសលើបទចោទទាំងពីរ។
ប្រព័ន្ធផ្សព្វផ្សាយក្នុងស្រុក Myanmar បានរាយការណ៍ថា លោក Richardson គ្រោងនឹងជួបមេដឹកនាំរបបយោធា និងមន្ត្រីជាន់ខ្ពស់ផ្សេងទៀត។
លោកRichardson ដែលជាអតីតអភិបាលរដ្ឋ New Mexico បានចរចា ដោះលែងចំណាប់ខ្មាំង និងទាហានអាមេរិក នៅក្នុងប្រទេសកូរ៉េខាងជើង គុយបា អ៊ីរ៉ាក់ និងស៊ូដង់។នេះបើយោងតាមគេហទំព័ររបស់មជ្ឈមណ្ឌលរបស់គាត់។
ដំណើរទស្សនកិច្ចចុងក្រោយរបស់គាត់ទៅកាន់ប្រទេសមីយ៉ាន់ម៉ាគឺនៅក្នុងឆ្នាំ 2018 ដែលជាផ្នែកមួយនៃក្រុមដែលបង្កើតឡើងដើម្បីផ្តល់ប្រឹក្សាអំពីអំពើហិង្សានៅក្នុងរដ្ឋរ៉ាឃីន ដែលជាកន្លែងនៃការបង្រ្កាបដោយកងទ័ពឆ្នាំ 2017 ដែលបណ្តាលឱ្យមានការជម្លៀសជនមូស្លីមរ៉ូហ៊ីងយ៉ាដែលគ្មានរដ្ឋជាង 700,000 នាក់៕
