ភ្នំពេញ ៖ បុរសម្នាក់ដែលបានបាញ់សម្លាប់សត្វកេងកងធំ រួចថតរូបភាពបង្ហោះក្នុងសង្គមហ្វេសប៊ុក បង្កឱ្យមានការខឹងសម្បា រិះគន់ថ្កោលទោសយ៉ាងខ្លាំងពីសំណាក់មហាជននោះ នៅរសៀលថ្ងៃទី១៣ ខែឧសភា ឆ្នាំ២០២០ បានចូលខ្លួនមកសុំទោសសាធារណជន និងបានធ្វើកិច្ចសន្យាឈប់ប្រព្រឹត្តកំហុសសម្លាប់សត្វព្រៃ ដូច្នេះទៀតហើយ ចំពោះមុខមន្ត្រីជំនាញនៃក្រសួងបរិស្ថាន។
បុរសដែលបាញ់សម្លាប់សត្វកេងកងធំ និងចូលខ្លួនសុំទោសជាសាធារណៈនាពេលនេះ មាន ឈ្មោះគ្រុយ ចំរើន។
លោកនេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន បានបញ្ជាក់ប្រាប់ថា បុរសឈ្មោះគ្រុយ ចំរើន បានឆ្លើយសារភាពថា ខ្លួនពិតជាបានបាញ់សម្លាប់សត្វកេងកងធំមួយក្បាលនោះមែន នៅអំឡុងពេលដែលខ្លួនទៅកម្សាន្តនៅរមណីយដ្ឋានទឹកធ្លាក់អន្លង់ក្មេងលេង ទឹកជ្រោះ៩ជាន់ ក្នុងឧទ្យានជាតិព្រះមុនីវង្ស បូកគោ ក្នុងភូមិសាស្ត្រខេត្តកំពត កាលពីថ្ងៃទី១០ ខែឧសភា ឆ្នាំ២០២០។
បុរសឈ្មោះគ្រុយ ចំរើន បានសរសេរនៅក្នុងលិខិតសុំអភ័យទោសចំពោះសាធារណជនថា “សូមទទួលស្គាល់ការពិតដែលបាញ់សម្លាប់សត្វកេងកងធំ ចំនួន១ក្បាល ស្ថិតនៅក្នុងរមណីយដ្ឋាន ទឹកធ្លាក់៩ជាន់ នៅភូមិតេជោអភិវឌ្ឍន៍ ស្រុកឈូក ខេត្តកំពត។ ខ្ញុំបាទសូមទោសប្រជាពលរដ្ឋកម្ពុជាទាំងអស់ សូមអភ័យទោសដល់រូបខ្ញុំបាទ និងឈប់ប្រព្រឹត្តកំហុសបែបនេះទៀតហើយ។ សូមបងប្អូនប្រជាពលរដ្ឋកុំយកគំរូតាមរូបខ្ញុំបាទ។ ខ្ញុំសូមសន្យានឹងប្រគល់អាវុធ ដែលបានបាញ់សត្វកេងកងនោះ មកក្រសួងបរិស្ថាន…”។
លោកនេត្រ ភក្ត្រា បានគូសបញ្ជាក់ថា បុរសម្នាក់នេះបានទទួលស្គាល់កំហុសរបស់ខ្លួន និងស្នើសុំការសណ្តោសប្រណីពីសាធារណជនដែលខ្លួនបានជ្រុលជ្រួសប្រព្រឹត្តនូវកំហុសឆ្គងនេះ។ លោកបានថ្លែងថា តាមរយៈការទទួលទោសកំហុសនេះ គឺក្រសួងបរិស្ថាន ទទួលយក និងធ្វើកិច្ចសន្យា បញ្ឈប់ការប្រព្រឹត្តនេះជារៀងរហូត។ លោកបានថ្លែងថា នេះគឺជាគំរូអាក្រក់មួយដែលអ្នកផ្សេងទៀតត្រូវចៀសវាង។
ជាមួយគ្នានេះ លោកនេត្រ ភក្ត្រា បានអំពាវនាវដល់ប្រជាពលរដ្ឋដែលទៅទស្សនាកម្សាន្ត នៅតាមរមណីយដ្ឋានធម្មជាតិនានា សូមកុំប្រព្រឹត្តបទល្មើសបរបាញ់សត្វ និងកុំបរិភោគសាច់សាច់ព្រៃ និងត្រូវចូលរួមការពារអភិរក្សសត្វព្រៃ ឱ្យបានគង់វង្សសម្រាប់បម្រើដល់ទេសចរណ៍ធម្មជាតិ និងការពារជីវៈចម្រុះ និងប្រព័ន្ធអេកូឡូស៊ីនៅកម្ពុជា។
លោកនេត្រ ភក្ត្រា បានគូសបញ្ជាក់ថា សត្វកេងកង គឺជាប្រភេទសត្វកម្រជិតផុតពូជ ហើយបច្ចុប្បន្ននេះ គេឃើញមានវត្តមាននៅក្នុងតំបន់មួយចំនួនតូចប៉ុណ្ណោះ ដូចជានៅភ្នំបូកគោ តំបន់ជួរភ្នំក្រវាញ តំបន់ភាគខាងកើតនៃប្រទេសកម្ពុជា ជាដើម។
គួរជម្រាបថា សត្វកេងកង គឺជាប្រភេទបក្សីមួយប្រភេទ ដែលនៅតែបន្តមានវត្តមាន និងដែនជម្រក នៅក្នុងប្រទេសម្ពុជានៅឡើយ រហូតមកដល់ពេលនេះ ប៉ុន្តែចំនួនរបស់វានៅតែមិនទាន់មានការសិក្សាលម្អិតឡើយ។
យោងតាមឯកសាររបស់អង្គការសង្គម អភិរក្សសត្វព្រៃ សត្វបក្សីប្រភេទនេះ ត្រូវបានគេដឹងថា គឺត្រូវបានកត់ត្រាថា វាមានដែនជម្រកនៅក្នុងប្រទេសកម្ពុជា តាំងតែពីឆ្នាំ១៩៦៤ ហើយមកដល់បច្ចុប្បន្ននេះ ទោះបីជានៅមិនទាន់មានការសិក្សាស៊ីជម្រៅពីវា ដូចជាពពួកសត្វត្មាត សត្វក្ង ចង្កំកស និងសត្វក្រៀល តែគេនៅតែដឹង និងឃើញអំពីវត្តមានរបស់វានៅកម្ពុជានៅឡើយ។
ឯកសារនោះបានឱ្យដឹងថា សត្វបក្សីប្រភេទនេះត្រូវបានគេសន្និដ្ឋានថា មាននៅបណ្តាភ្នំនៅភូមិភាគនិរតីនៃប្រទេស និងបានឃើញវត្តមានខ្លះៗនៅព្រៃ ស្ថិតនៅភូមិភាគឦសាន្ត ជាពិសេស គឺខេត្តមណ្ឌលគិរី។
បើទោះបីជាបក្សីប្រភេទនេះ នៅមានវត្តមាននៅកម្ពុជា ប៉ុន្តែវាគឺជាបក្សីនៅតែមានព័ត៌មានតិចតួច។ វត្តមានរបស់វាត្រូវបានកត់ត្រានៅក្នុងការសិក្សាអំពីជីវចម្រុះនានា ជាញឹកញាប់ គ្រាន់តែគ្មានឯកសារដែលនិយាយចំអំពីជីវសាស្ត្រ និងចំនួនរបស់ពួកវានៅក្នុងប្រទេសដដែល។
នៅក្នុងអំឡុងពេលធ្វើការអង្កេតមួយនៅតំបន់ព្រៃការពារស្នូល គេក៏បានប្រទះឃើញវត្តមានរបស់វាផងដែរ ជាពិសេស គឺតំបន់ដែលមានព្រំប្រទល់ជាប់នឹងព្រំដែនវៀតណាម ដោយទីនោះ គេបានរកឃើញមានសំបុករបស់វាមួយចំនួន។
សត្វកេងកង គឺជាបក្សីដែលចូលចិត្តរស់នៅ និងមានសំបុកពងកូននៅព្រៃ ដែលមានដើមឈើធំៗ និងជាប្រភេទបក្សីស៊ីផ្លែឈើធំៗ ជាអាហារ។ ក្រៅពីកម្ពុជា វាគឺជាបក្សីដែលរស់នៅក្នុងព្រៃនៃតំបន់ត្រូពិកនានា នៅក្នុងតំបន់អាស៊ីអាគ្នេយ៍ ប៉ុន្តែវាកំពុងតែប្រឈមមុខនឹងការធ្លាក់ចុះនៅប្រទេសឡាវ និងនៅប្រទេសថៃ។ រហូតមកដល់ពេលនេះ វាគឺជាបក្សីមានបង្គួរ ដោយសារតែការបាត់បង់ដែនជម្រក បណ្តាលមកពីការបាត់បង់ព្រៃឈើ និងការប្រមាញ់ខុសច្បាប់នានា៕