ភ្នំពេញ ៖ បទ «រយពាន់ឆ្នាំ» ត្រូវបានពេជ្រ សោភា រំលេចឡើងវិញ ដែលចម្រៀងនេះបង្ហាញពីប្រាសាទខ្មែរ មានរាប់ពាន់ឆ្នាំ ត្រូវចោរចង់ប្លន់យក ដែលចម្រៀងនេះ ត្រូវនឹងសកម្មភាពបច្ចុប្បន្នដែលសៀម កំពុងឈ្លានពានកម្ពុជា ។ ប៉ុន្ដែសោភា ហាក់ឈឺចាប់ខ្លាំងចំពោះពលរដ្ឋមួយចំនួន ដែលនៅនិយមផលិតផលសៀម ទាំងដែលសៀម កាន់តែឈ្លានពានកម្ពុជា យ៉ាងគឃ្លើន។
សូមបញ្ជាក់ថា ពេជ្រ សោភា បានផ្អាកការច្រៀងសម្ដែង តាំងពីផ្ទះសង្រ្គាមនៅតាមតំបន់ព្រំដែនកម្ពុជា-ថៃ ដែលបង្កដោយទាហានសៀម ដោយនាងបានលុបចោល Concerts ជាច្រើនកម្មវិធី និងពេលនេះមិនទាន់កំណត់ពេលវេលាវិលរកឆាកតន្រ្ដីវិញឡើយ ។ សោភា ក៏បានបង្កើតមូលនិធិជួយដល់កងទ័ព និងគ្រួសារភៀសសឹក នៅតាមតំបន់ព្រំដែន ហើយបានចុះចែកអំណោយច្រើនដងដែរ ។ ប៉ុន្ដែអ្វីដែលនាងឈឺចាប់ពេលនេះ គឺប្រជាជនខ្មែរ មួយចំនួននៅតែបន្ដគាំទ្រផលិតផលសៀម ពេលឃើញគេថែមរង្វាន់ ទើបនាងសួរទៅអ្នកមិនចេះឈឺចាប់ទាំងនោះថា «តើបេះដូងអ្នក សាងពីអ្វី?»។
ពេជ្រ សោភា ថ្លែងសារទៅកាន់អ្នកនៅតែគាំទ្រទំនិញសៀម ដោយភ្ជាប់ជាមួយរូបប្រាសាទព្រះវិហារ ត្រូវ សៀម បាញ់ខ្ទេចខ្ទីថា «គ្រាន់តែគេលក់ហើយមានរបស់ថែម អ្នកភ្លេចគិតដល់បងៗកងទ័ពជូរមុខ គេថាមិន ខុសមែន អ្នកឆាប់ភ្លេចការឈឺចាប់ណាស់ បេះដូង គំនិតអ្នក សាងពីអ្វី?»។
ប្រភពថា ប្រតិកម្មរបស់ពេជ្រ សោភា នាពេលនេះ កើតមានក្រោយពីនាងបានឃើញរូបភាពមានពលរដ្ឋខ្មែរ ជាច្រើន នៅខេត្តបន្ទាយមានជ័យ បានតម្រង់ជូរគ្នាបើកឡាន ម៉ូតូ ទៅចាក់សាំង នៅហ្គារ៉ាស់ Ptt មួយ ព្រោះថៅកែសាំងនោះ ឲ្យកាដូ និងថ្មីៗនេះ គេឃើញផ្សាម៉ាក្រូ នៅខណ្ឌសែនសុខ លក់ទំនិញថៃ សុទ្ធ មានអតិថិជនខ្មែរ ចូលទិញធម្មតា ។ សោភា ឈឺចិត្តហួសថ្លែង ពេលឃើញសកម្មភាពបែបនេះ ខណៈដែលរូបនាងផ្អាក ច្រៀងរាំ ចោលលុយជាច្រើនកម្មវិធី ព្រោះមិនចង់ច្រៀងរាំសប្បាយ ទាំងពេលកងទ័ពកំពុងប្រឈមគ្រោះថ្នាក់ ប៉ុន្ដែពលរដ្ឋខ្លះ បែរជាឆាប់ភ្លេចរឿងសៀម ធ្វើបាបខ្មែរ នោះទៅវិញ ។
សូមបញ្ជាក់ថា ក្រៅពីពេជ្រ សោភា តារាដែលចេញបទចម្រៀងថ្កោលទោសសៀមឈ្លានពានកម្ពុជា ថ្មីៗនេះមានដូចជា លោកព្រាប សុវត្ថិ, វណ្ណដា, ឆាយ វីរៈយុទ្ធ, អ៊ីណូ, ខេមរៈ សិរីមន្ដ, ខេម, យូ ហៃ, ល្អហួស, សុគន្ធ និសា, ឈិត សុវណ្ណបញ្ញា, អ៊ីវ៉ា, ចំរើន សុភ័ក្រ, ផន សុផារី, ទេព បូព្រឹក្ស, រ៉េត ស៊ូហ្សាណា និងឱក សុគន្ធកញ្ញា ជាដើម ។
សម្រាប់ពេជ្រ សោភា ក្រោយចាកចេញពីហង្សមាស ជាងមួយឆ្នាំ នាងផលិតបទចម្រៀងដោយខ្លួនឯង ចាយលុយផ្ទាល់ខ្លួន ។ សោភា នៅតែមានទីផ្សារចម្រៀង ព្រោះមានបទល្បីៗរាប់រយបទ បន្សល់នៅហង្សមាស ហេតុនេះគ្រាន់តែកម្មវិធីមួយ តម្រូវឲ្យនាងច្រៀងពី ៥ទៅ៦បទនោះ គ្មានបញ្ហាឡើយសម្រាប់រូបនាង ។ ប៉ុន្ដែសោភា ដែលជ្រកនៅហង្សមាស ១៩ឆ្នាំ (២០០៥-២០២៥) នោះបើគ្មានបទថ្មីៗល្បីទៀតទេ នាងក៏មិនអាចល្បីថែមទៀតដែរ ។
អ្វីដែលគួរឲ្យកត់សម្គាល់នោះ សោភា អាយុ៤១ឆ្នាំ លែងមានដំណឹងរៀបការសោះតែម្ដង នៅឆ្នាំ២០២៥ នេះ ក្រោយលុបចោលមង្គលការជាមួយលោកឆឹម សក្កដា កាលពីឆ្នាំ២០២៣ ។ ប៉ុន្ដែសោភា-សក្កដា នៅមិនទាន់ប្រកាសផ្ដាច់ពាក្យទេ បើទោះជាអតីតតារាហង្សមាស រូបនេះថា រាល់សកម្មភាពទាំងឡាយរបស់លោកសក្កដា នាងលែងដឹងឮទាំងអស់ក្ដី ។ ការបញ្ជាក់របស់សោភា បែបនេះ ដោយសាតែថ្មីៗនេះ លោកសក្កដា ព្រមានបញ្ចប់ជីវិត ដោយការធ្វើអត្តឃាត ប៉ុន្ដែមិនបានសម្រេច ហើយត្រូវគេសង្ស័យថា លោកខូចចិត្តព្រោះសោភា មានអ្នកថ្មី តែសោភា ថាអត់ដឹងរឿងទាំងនោះទៅវិញ ៕
