កម្ពុជា ត្រូវការកម្លាំងពលកម្ម ២៥ម៉ឺនកន្លែង

ភ្នំពេញ ៖ ខណៈដែលពលរដ្ឋខ្មែរ ជាពលករចំណាកស្រុក បានសម្រុកចាកចេញមកពីប្រទេសថៃ ក្រោយកើតមានសង្គ្រាមសៀមឈ្លានពាន ក្រសួងការងារនិងបណ្តុះបណ្តាលវិជ្ជាជីវៈ បានបញ្ជាក់ថា បច្ចុប្បន្ន កម្ពុជា កំពុងមានតម្រូវការកម្លាំងពលកម្ម ប្រមាណជាង ២៥ម៉ឺនកន្លែង។

លោកស៊ុន មេសា អ្នកនាំពាក្យក្រសួងការងារនិងបណ្តុះបណ្តាលវិជ្ជាជីវៈ បានបញ្ជាក់នៅព្រលប់ថ្ងៃទី៥ ខែសីហា ឆ្នាំ២០២៥ ថា ប្រជាពលរដ្ឋ ក៏ដូចជាពលករត្រឡប់មកពីប្រទេសថៃវិញ អាចទាក់ទងទៅលេខ ១២៩៧ ដើម្បីទទួលបានការងារដ៏សម្បូរបែបនៅកម្ពុជា។

អ្នកនាំពាក្យរូបនេះ បានបញ្ជាក់ថា កម្ពុជា កំពុងមានតម្រូវការកម្លាំងពលកម្ម ប្រមាណជាង ២៥ម៉ឺនកន្លែង ខណៈដែលជារៀងរាល់សប្តាហ៍ កម្ពុជា មានលទ្ធភាពបង្កើតឱកាសការងារប្រមាណជាង ១ម៉ឺនកន្លែង សម្រាប់ពលរដ្ឋក្នុងស្រុករបស់ខ្លួន តាមរយៈកំណើនសេដ្ឋកិច្ច និងកំណើននៃការវិនិយោគ។

លោកស៊ុន មេសា បានឱ្យដឹងថា បើបូកសរុបទាំងឱកាសការងារដែលកំពុងមានស្រាប់នៅតាមក្រុមហ៊ុន រោង ចក្រ សហគ្រាស និង ឱកាសការងារដែលនឹងបន្តមានជាបន្តបន្ទាប់ តាមរយៈការវិនិយោគ ដែលបានចុះបញ្ជីនៅក្រុមប្រឹក្សាអភិវឌ្ឍន៍កម្ពុជា (CDC) កម្ពុជា មានឱកាស ការងារសរុប ជាង៥៥ម៉ឺនកន្លែង។

ជាមួយគ្នានេះ លោកអំពាវនាវឱ្យពលករខ្មែរ ដែលទើបមកពីថៃ ស្វែងរកការងារនៅគ្រប់ខេត្ត-ក្រុង ជាពិសេសរាជធានីភ្នំពេញ ខេត្តស្វាយរៀង កំពង់ស្ពឺ តាកែវ និងខេត្តព្រះសីហនុ ជាដើម៕