ខេត្តស្វាយរៀង ៖ អ្នកសារព័ត៌មានម្នាក់ រួមនិងបក្ខពួក២នាក់ទៀត ត្រូវបានសមត្ថកិច្ចចាប់ឃាត់ខ្លួន បន្ទាប់ពីបានធ្វើសកម្មភាពផលិតវីដេអូក្លែងឯកសណ្ឋានកងទ័ព និងធ្វើឱ្យកងទ័ព បាក់ទឹកចិត្ត ផ្ទុយនឹងក្រមសីលធម៌វិជ្ជាជីវៈ។
តាមប្រភពសមត្ថកិច្ចស្រុកកំពង់រោទ៍ ខេត្តស្វាយរៀង បានបញ្ជាក់ឱ្យដឹងនៅព្រឹកថ្ងៃទី៣០ ខែឧសភា ឆ្នាំ២០២៥ ថា សមត្ថកិច្ចបានឃាត់ខ្លួនមនុស្ស ៣នាក់ ក្នុងនោះមានអ្នកកាសែតម្នាក់ ពាក់ព័ន្ធផលិតវីដេអូក្លែងឯកសណ្ឋានកងទ័ព និងធ្វើកងឱ្យទ័ពបាក់ទឹកចិត្ត។
មនុស្សទាំង៣នាក់ ដែលត្រូវបានឃាត់ខ្លួន រួមមាន ទី១-ឈ្មោះហង្ស សំណាង មុខរបរអ្នកសារព័ត៌មាន។ ទី២-ឈ្មោះរស់ អៀវ ភេទប្រុស អាយុប្រហែល៦០ឆ្នាំ មានលំនៅ ភូមិកណ្តាល ឃុំត្នោត ស្រុកកំពង់រោទ៍ និងទី៣-ឈ្មោះកុញ វាស្នា ភេទប្រុស អាយុប្រហែល៣០ឆ្នាំ រស់នៅភូមិបុណ្យ ឃុំត្នោត ស្រុកកំពង់រោទ៍។ អ្នកទាំងពីរនាក់នេះ មិនមែនជាកងទ័ព ឬជាអតីតយុទ្ធជននោះទេ។
លោកហែម សាមុត អធិការនគរបាលស្រុកកំពង់រោទ៦ ខេត្តស្វាយរៀង បានបញ្ជាក់ប្រាប់អ្នកសារព័ត៌មានថា បុគ្គលឈ្មោះហង្ស សំណាង និងបក្សពួក២នាក់ទៀត ពិតជាត្រូវបានសមត្ថកិច្ចហៅមកសួរនាំពិតប្រាកដមែន នាព្រឹកថ្ងៃទី៣០ ខែឧសភា ឆ្នាំ២០២៥នេះ ដោយសារបង្ហោះវីដេអូពាក់ព័ន្ធនឹងកងទ័ព។ ក្រោយសាកសួរ សមត្ថ កិច្ច បានសម្រេចបញ្ជូនអ្នកទាំង៣នេះ ទៅកាន់ស្នងការដ្ឋាននគរបាលរាជធានីភ្នំពេញ ដើម្បីចាត់ការបន្តតាមនីតិវិធី៕