ខេត្តព្រះសីហនុ ៖ រថយន្តដឹកប្រេង ១គ្រឿង បានអែបឈប់បូមប្រេងលក់ឱ្យម្ចាស់តូបលក់ដូរ ១កន្លែង លើចិញ្ចើមផ្លូវ ដើម្បីបូមសាំង លក់ឲ្យម្ចាស់ផ្ទះ លុះពេលកូនប្រុសម្ចាស់ផ្ទះ កំពុងបូមសាំងដាក់ប៊ីដុង ចំណែកស្ត្រីជាម្តាយ កំពុងអាំងងាវហូប នៅក្បែរនោះ ស្រាប់តែបន្តិចក្រោយមក កើតមានអណ្តាតភ្លើងឆាបឆេះរថយន្តដឹកប្រេង យ៉ាងសន្ធោសន្ធៅ និងរាលឆេះផ្ទះប្រជាពលរដ្ឋ ចំនួន២ខ្នង បណ្តាលឱ្យកូនម្ចាស់ផ្ទះលក់សាំង ចំនួន៣នាក់ (ស្រី១) ត្រូវភ្លើងឆេះស្លាប់។
ហេតុការណ៍អគ្គិភ័យ ឆេះរថយន្តដឹកប្រេង រាលឆេះផ្ទះនេះ បានកើតមានការភ្ញាក់ផ្អើលឡើង កាលពីវេលាម៉ោង ១១និង៤០នាទីយប់ ថ្ងៃទី០៧ ខែឧសភា ឆ្នាំ២០២៥ នៅត្រង់ចំណុចភូមិព្រែកប្រស់ ឃុំទឹកថ្លា ស្រុកព្រៃនប់។
រថយន្តដឹកប្រេងដែលរងការឆាបឆេះ និងបង្កជាអគ្គិភ័យឆេះទាំងផ្ទះ និងមនុស្សស្លាប់នេះ ជារបស់ក្រុមហ៊ុន CLEAN ENERGIES (CE) ពាក់ស្លាកលេខ ភ្នំពេញ 4A-2820។ ចំណែកផ្ទះទាំង២ខ្នងដែលរងការឆាបឆេះ ទី១-ផ្ទះសង់ពីឈើ ដំបូលប្រក់ស័ង្កសី មានទំហំ ៤ម៉ែត្រ គុណនឹង ៦ម៉ែត្រ (ឆេះអស់ទាំងស្រុង) មានម្ចាស់ឈ្មោះអ៊ុត ភាព ភេទស្រី អាយុ៤៩ឆ្នាំ មុខរបរកម្មការិនីរោងចក្រ។ ទី២-ផ្ទះសង់អំពីថ្ម ដំបូលប្រក់សង្ក័សី មានទំហំ៧ម៉ែត្រ គុណនឹង ១៥ម៉ែត្រ (ឆេះផ្ទះអស់ទាំងស្រុង) មានម្ចាស់ឈ្មោះ មន ភក្តី ភេទប្រុស អាយុ៤០ឆ្នាំ និងប្រពន្ធឈ្មោះបាត ស្រីមុំ អាយុ៣៥ឆ្នាំ មុខរបរលក់ដូរ បណ្តាលឱ្យស្លាប់កូន ចំនួន៣នាក់ រួមមាន ទី១-ឈ្មោះយ៉ារី សុខសិលា ភេទប្រុស អាយុ១៨ឆ្នាំ (ស្លាប់នៅនឹងកន្លែងកើតហេតុ)។ ទី២-ឈ្មោះភក្តី រីតា ភេទស្រី អាយុ១៥ឆ្នាំ (ស្លាប់នៅនឹងកន្លែងកើតហេតុ) និងទី៣-ឈ្មោះភក្តី សំមេន ភេទប្រុស អាយុ១៣ឆ្នាំ (ស្លាប់នៅនឹងកន្លែងកើតហេតុ)។
តាមការបំភ្លឺពីយុវជនម្នាក់ឈ្មោះភក្តី គារ៉ា អាយុ១៧ឆ្នាំ ត្រូវជាកូនបង្កើតម្ចាស់ផ្ទះទី២ បានរៀបរាប់ប្រាប់ថា មុនពេលកើតហេតុ រូបគេកំពុងបង្ហូរសាំង ចេញពីរថយន្តដឹកប្រេងកើតហេតុ ដែលអ្នកបើកបររថយន្តរបស់ក្រុមហ៊ុន CLEAN ENERGIES បានបង្ហូរសាំង លក់ឱ្យម្ចាស់ផ្ទះ ជាឪពុកម្តាយរបស់ខ្លួន។ លុះក្រោយពីរូបគេបង្ហូរសាំង ដាក់ប៊ីដុង បានចំនួន២ប៊ីដុង ក៏លើកយកមកទុកក្នុងផ្ទះ រួចហើយក៏បានបង្ហូរសាំង បន្ថែមទៀត ទើបតែបានកន្លះប៊ីដុង ពេលនោះម្តាយរបស់គេ កំពុងអាំងងាវហូប នៅពីមុខផ្ទះ ភ្លាមៗនោះ ស្រាប់តែឆាបឆេះ ជាអគ្គិភ័យតែម្តង។
តាមប្រភពសមត្ថកិច្ច បានឱ្យដឹងថា បន្ទាប់ពីទទួលបានព័ត៌មានថា មានហេតុការណ៍អគ្គិភ័យកើតឡើង នៅចំណុចទីតាំងខាងលើភ្លាម កម្លាំងនគរបាលបង្ការ ពន្លត់អគ្គិភ័យនិងសង្គ្រោះ បានចេញរថយន្តពន្លត់អគ្គិភ័យ សរុបចំនួន ៤គ្រឿង ចុះមកដល់ទីតាំងកើតហេតុភ្លាមៗ ដោយក្នុងនោះ រួមមាន រថយន្តពន្លត់អគ្គិភ័យរបស់អធិការដ្ឋាននគរបាលស្រុកព្រៃនប់ ចំនួន២គ្រឿង ប្រើប្រាស់ទឹកអស់ចំនួន ៣រថយន្ត ស្មើនឹង ១២ម៉ែត្រគូប និងរថយន្តពន្លត់អគ្គិភ័យរបស់ស្នងការដ្ឋាននគរបាលខេត្តកំពត ចំនួន២គ្រឿង បានប្រើប្រាស់ទឹកអស់ចំនួន ២ រថយន្ត ស្មើនឹង ៨ម៉ែត្រគូប។
សមត្ថកិច្ច បានបញ្ជាក់ថា នៅក្នុងហេតុការណ៍អគ្គិភ័យខាងលើនេះ បានបង្កឱ្យមានការខូចខាត រួមមាន ឆេះរថយន្តដឹកប្រេង ចំនួន១គ្រឿង របស់ក្រុមហ៊ុន CLEAN ENERGIES (CE) (ឆេះក្បាលរថយន្តអស់ទាំងស្រុង) និងបន្តឆេះរាលដាលដល់ផ្ទះប្រជាពលរដ្ឋ ចំនួន២ខ្នង អស់ទាំងស្រុង ម៉ូតូ ចំនួន៥គ្រឿង ព្រមទាំងទ្រព្យសម្បត្តិមួយចំនួនធំ សរុបជាទឹកប្រាក់ប្រមាណ៥ម៉ឺនដុល្លារ និងបណ្តាលឱ្យមនុស្ស ចំនួន៣នាក់ បានបាត់បង់ជីវិតថែមទៀតផង។
សពជនរងគ្រោះទាំង៣នាក់ខាងលើ ត្រូវបានសមត្ថកិច្ចធ្វើកំណត់ហេតុ ប្រគល់ឱ្យក្រុមគ្រួសារ ដើម្បីរៀបចំធ្វើបុណ្យតាមប្រពៃណី៕