ប្រធានាធិបតីអ៊ុយក្រែនលោក ហ្សេឡិន ស្គី បានអំពាវនាវឱ្យសហរដ្ឋអាមេរិកផ្តល់មូលនិធិបន្ថែមទៀតដើម្បីជួយកងកម្លាំងរបស់គាត់ប្រឆាំងនឹងប្រទេសរុស្ស៊ី និងបានអញ្ជើញអតីតប្រធានាធិបតីសហរដ្ឋអាមេរិកលោក ដូណាល់ត្រាំ មកបំពេញទស្សនកិច្ចប្រទេសអ៊ុយក្រែនដើម្បីពិនិត្យមើលស្ថានភាពសង្គ្រាមនៅទីនេះ។ប្រធានាធិបតីអ៊ុយក្រែនបាននិយាយថា ទាហានអាមេរិកនៅទីបំផុតអាចត្រូវបានទាញចូលទៅក្នុងជម្លោះអឺរ៉ុបកាន់តែខ្លាំងជាមួយរុស្ស៊ីប្រសិនបើក្រុងវ៉ាស៊ីនតោនមិនបង្កើនការគាំទ្រ។លោកបន្តថាប្រសិនបើរុស្ស៊ីនឹងសម្លាប់ពួកយើងទាំងអស់គ្នា ពួកគេនឹងវាយប្រហារប្រទេសណាតូ ហើយអ្នកនឹងបញ្ជូនកូនប្រុសស្រីរបស់អ្នកទៅប្រយុទ្ធ។ នេះបើយោងតាមបទសម្ភាសន៍របស់លោកហ្សេឡិនស្គី ជាមួយទូរទស្សន៍ NBC កាលពីថ្ងៃអាទិត្យ។
នៅក្នុងបទសម្ភាសន៍ដែលបានចាក់ផ្សាយកាលពីថ្ងៃអាទិត្យ លោកហ្សេឡិន ស្គី បានអញ្ជើញអតីតប្រធានាធិបតីអាមេរិក លោកដូណាល់ ត្រាំ ដែលជាគណបក្សសាធារណរដ្ឋទៅទស្សនកិច្ចនៅអ៊ុយក្រែន និងមើលការដួលរលំនៃជម្លោះដែលផ្តួចផ្តើមដោយប្រធានាធិបតីរុស្ស៊ីលោកវ៉្លាឌីមៀ ពូទីន កាលពីខែកុម្ភៈ ឆ្នាំ ២០២២។លោកត្រាំ ដែលកំពុងស្វែងរកការបោះឆ្នោតឡើងវិញនៅឆ្នាំ ២០២៤និងជាបេក្ខជននាំមុខគេសម្រាប់ការតែងតាំងជាប្រធានាធិបតីរបស់គណបក្សរបស់គាត់បានរិះគន់យ៉ាងខ្លាំងចំពោះការគាំទ្ររបស់សហរដ្ឋអាមេរិកមកលើទីក្រុង គៀវ ហើយបាននិយាយថាគាត់អាចបញ្ចប់សង្រ្គាមក្នុងរយៈពេល ២៤ម៉ោងប្រសិនបើជាប់ឆ្នោតឡើងវិញ។លោកហ្សឡិន ស្គី បាននិយាយថា ប្រសិនបើគាត់អាចមកទីនេះ ខ្ញុំនឹងត្រូវការ … ២៤ នាទីដើម្បីពន្យល់ដល់បេក្ខជនប្រធានាធិបតី ត្រាំថាលោកមិនអាចគ្រប់គ្រងសង្រ្គាមនេះបានទេ ។ លោកមិនអាចនាំមកនូវសន្តិភាពបានដោយសារលោក ពូទីន។
ប្រធានាធិបតីសហរដ្ឋអាមេរិក លោក ចូ បៃដិន ដែលជាអ្នកប្រជាធិបតេយ្យបានជំរុញសភាអាមេរិកឱ្យអនុម័តវិក័យប័ត្រចំណាយបន្ថែមចំនួន១០៦ ពាន់លានដុល្លារ ដោយប្រាក់ភាគច្រើននឹងជំរុញការការពាររបស់អ៊ុយក្រែន និងការបែងចែកដែលនៅសល់គឺសម្រាប់អ៊ីស្រាអែល ឥណ្ឌូប៉ាស៊ីហ្វិក និងការអនុវត្តព្រំដែន។សភាតំណាងរាស្រ្តសហរដ្ឋអាមេរិកដឹកនាំដោយគណបក្សសាធារណរដ្ឋបានដាក់ចេញនូវផែនការផ្តល់មូលនិធិរបស់ខ្លួនជំនួសវិញ។ពួកគេបានអនុម័តវិក័យប័ត្រកាលពីសប្តាហ៍មុនផ្តល់ជំនួយចំនួន១៤,៣ពាន់លានដុល្លារដល់អ៊ីស្រាអែល ប៉ុន្តែមិនរាប់បញ្ចូលការកើនឡើងនៃជំនួយសម្រាប់អ៊ុយក្រែនទេ។
សមាជិកព្រឹទ្ធសភាអាមេរិក លោក Chuck Schumer មេដឹកនាំភាគច្រើននៃព្រឹទ្ធសភាដែលគ្រប់គ្រងដោយប្រជាធិបតេយ្យបាននិយាយថាលោកនឹងមិននាំយកសេចក្តីព្រាងច្បាប់សភាទៅបោះឆ្នោតទេ ហើយលោកបៃដិន បានប្តេជ្ញាថានឹងវេតូវា៕