បើយោងតាមមន្ត្រីនិងអ្នកវិភាគលោកខាងលិច និងអ៊ុយក្រែនកងកម្លាំងអ៊ុយក្រែនបានបើកការវាយលុកដ៏សំខាន់មួយដើម្បីបណ្តេញកងកម្លាំងរុស្ស៊ីចេញពីភាគអាគ្នេយ៍របស់ប្រទេសដែលជាផ្នែកមួយនៃការវាយលុករយៈពេលមួយសប្តាហ៍ដោយបានបញ្ជូនកងទ័ពរាប់ពាន់នាក់ទៅសមរភូមិមុខ។នេះបើយោងតាមការចេញផ្សាយរបស់ទីភ្នាក់ងារសារព័ត៌មាន AP។
មន្ត្រីលោកខាងលិចដែលសុំមិនបញ្ចេញឈ្មោះបាននិយាយកាលពីល្ងាចថ្ងៃពុធថាការកើនឡើងនៃកម្លាំងទាហាននិងកម្លាំងភ្លើងបានផ្តោតលើតំបន់ Zaporizhzhia ។
ការប្រយុទ្ធកាន់តែខ្លាំងក្នុងប៉ុន្មានសប្តាហ៍ថ្មីៗនេះ នៅតាមចំណុចជាច្រើននៅតាមខ្សែបន្ទាត់ជួរមុខ ១៥០០គីឡូម៉ែត្រនៅពេលដែលអ៊ុយក្រែនដាក់ពង្រាយសព្វាវុធទំនើបដែលផ្គត់ផ្គង់ដោយលោកខាងលិច និងកងទ័ពដែលបណ្តុះបណ្តាលដោយលោកខាងលិចប្រឆាំងនឹងកងកម្លាំងរុស្ស៊ីដែលបានចូលឈ្លានពានយ៉ាងជ្រៅ កាលពី ១៧ខែមុន។
មន្ត្រីអ៊ុយក្រែនភាគច្រើននៅស្ងៀមចំពោះការអភិវឌ្ឍន៍សមរភូមិចាប់តាំងពីពួកគេចាប់ផ្តើមប្រតិបត្តិការវាយលុកដំបូង ទោះបីជាអនុរដ្ឋមន្ត្រីការពារជាតិលោក Hanna Maliar បាននិយាយថា កងទ័ពកំពុងឆ្ពោះទៅកាន់ទីក្រុង Melitopol ក្នុងតំបន់ Zaporizhizhia ក៏ដោយ។
វិទ្យាស្ថានសិក្សាសង្គ្រាម Think Tank ដែលមានមូលដ្ឋាននៅទីក្រុងវ៉ាស៊ីនតោន បានរាយការណ៍ថា កងកម្លាំងអ៊ុយក្រែនបានចាប់ផ្តើមប្រតិបត្តិការវាយលុកដែលមានយន្តការដ៏សំខាន់មួយនៅក្នុងតំបន់ Zaporizhzhia ភាគខាងលិចកាលពីថ្ងៃពុធ ដោយបន្ថែមថាពួកគេ ហាក់ដូចជាបានទម្លុះទីតាំងការពាររុស្ស៊ីដែលបានរៀបចំទុកជាមុនមួយចំនួន។
រដ្ឋមន្ត្រីការពារជាតិអាមេរិក លោក Lloyd Austin បាននិយាយក្នុងអំឡុងដំណើរទស្សនកិច្ចទៅកាន់ប្រទេស Papua New Guinea ថាកិច្ចខិតខំប្រឹងប្រែងរបស់ទីក្រុងគៀវ ក្នុងការដណ្តើមយកទឹកដីដែលរុស្ស៊ីបានរឹបអូសតាំងពីខែកុម្ភៈ ឆ្នាំ ២០២២ មក នឹងមានភាពលំបាកនិង រយៈពេលវែង ។រដ្ឋមន្ត្រីការបរទេសអាមេរិក លោក Antony Blinken បាននិយាយថាការប្រយុទ្ធដ៏ខ្លាំងក្លាមួយកំពុងកើតឡើង ប៉ុន្តែបានបដិសេធមិនផ្តល់ព័ត៌មានលម្អិត។
លោកBlinkenបាននិយាយក្នុងអំឡុងដំណើរទស្សនកិច្ចទៅកាន់ប្រទេសនូវែលសេឡង់ថា យើងជឿជាក់ថាឧបករណ៍យោធា ការបណ្តុះបណ្តាលដំបូន្មានដែលយើងជាច្រើនបានចែករំលែកជាមួយអ៊ុយក្រែនក្នុងរយៈពេលជាច្រើនខែ ធ្វើឱ្យពួកគេស្ថិតក្នុងស្ថានភាពល្អ ដើម្បីទទួលបានជោគជ័យ ក្នុងការទាញយកទឹកដីបន្ថែមទៀតដែលរុស្ស៊ីបានយកពីអ៊ុយក្រែន៕