បន្ទាប់ពីមានការបះបោររបស់ទាហានស៊ីឈ្នួលក្នុងគោលបំណងផ្តួលរំលំឧត្តមសេនីយយោធាជាន់ខ្ពស់បំផុតរបស់រុស្ស៊ីបរាជ័យកាលពីដើមសប្តាហ៍នេះបង្កើតអោយមានចម្ងល់ជាច្រើនពីសាធារណៈជនជុំវិញការបាត់មុខឧត្តមសេនីយយោធាជាន់ខ្ពស់ជាច្រើនស្របពេលដែលសារត៌មានមួយចំនួនបានផ្សាយ អំពីការចាប់ខ្លួនមន្ត្រីយោធាមួយចំនួន។
បើយោងតាមប្រភពដែលដកស្រង់ដោយកាសែត Moscow Times និងអ្នកសរសេរប្លុកយោធា បានឲ្យដឹងថាអាជ្ញាធររុស្ស៊ី បានឃុំខ្លួនឧត្តមសេនីយ៍ Sergei Surovikin អគ្គមេបញ្ជាការរងនៃប្រតិបត្តិការយោធារុស្ស៊ី។
លោក Surovikin ដែលមានឈ្មោះហៅក្រៅថា Armageddonដោយប្រព័ន្ធផ្សព្វផ្សាយរុស្ស៊ីសម្រាប់ភាពសាហាវឃោរឃៅដ៏ល្បីល្បាញរបស់គាត់ គឺជាអតីតយុទ្ធជននៃសង្គ្រាមរបស់រុស្ស៊ីនៅឆេកឆិន(Chechnya )និង Syria ដែលត្រូវបានតែងតាំងដោយប្រធានាធិបតីរុស្ស៊ី លោកវ៉្លាឌីមៀពូទីន។
ដកស្រង់ប្រភពពីរដែលជិតស្និទ្ធនឹងក្រសួងការពារជាតិរុស្ស៊ី របស់កាសែត The Moscow Times បានរាយការណ៍កាលពីថ្ងៃពុធថាលោក Surovikin ត្រូវបានចាប់ខ្លួនពីបទចូលដៃជាមួយក្រុមទាហានស៊ីឈ្នួលWagner ដឹកនាំដោយលោក Yevgeny Prigozhin ក្នុងអំឡុងពេលបះបោរ។ទោះជាយ៉ាងណាក្រសួងការពារជាតិរុស្ស៊ីមិនទាន់ធ្វើអត្ថាធិប្បាយលើរបាយការណ៍នៃការឃុំខ្លួនលោក Surovikin នៅឡើយទេ។
លោក Valery Gerasimov ឧត្តមសេនីយកំពូលរបស់រុស្ស៊ី មិនបានបង្ហាញខ្លួនជាសាធារណៈ ឬតាមទូរទស្សន៍រដ្ឋទេ ចាប់តាំងពីមានការបះបោរកាលពីថ្ងៃសៅរ៍ ២៤ មិថុនានៅពេលដែលមេទាហានស៊ីឈ្នួល Yevgeny Prigozhin ទាមទារឱ្យប្រគល់ Gerasimov ។ លោកមិនត្រូវបានគេលើកឡើងក្នុងសេចក្តីប្រកាសព័ត៌មានរបស់ក្រសួងការពារជាតិចាប់តាំងពីថ្ងៃទី ៩ ខែមិថុនាមកដែរ។
លោកGerasimovអាយុ៦៧ឆ្នាំគឺជាមេបញ្ជាការដឹកនាំសង្គ្រាមរុស្ស៊ីនៅអ៊ុយក្រែននិងជាអ្នកកាន់កាបូបយួរដៃនុយក្លេអ៊ែរមួយក្នុងចំណោមមនុស្សបីនាក់ផ្សេងទៀតរបស់រុស្ស៊ី។នេះបើយោងទៅតាមអ្នកវិភាគយោធាលោកខាងលិចមួយចំនួន៕