រដ្ឋាភិបាលមីយ៉ាន់ម៉ាបានចោទប្រកាន់អ្នកកាសែតអាមេរិកម្នាក់ដែលត្រូវបានចាប់ឃុំខ្លួនតាំងពីខែឧសភាពីបទបះបោរ និងអំពើភេរវកម្មដែលបទចោទទាំងពីរនេះត្រូវអនុវត្តទោសអតិបរមាជាប់ពន្ធនាគារអស់មួយជីវិត។ នេះបើយោងតាមមេធាវីរបស់គាត់បាននិយាយកាលពីថ្ងៃពុធ 10 ខែវិច្ឆិកា ។
លោក Than Zaw Aung មេធាវីរបស់លោក Danny Fenster បានប្រាប់AFPថាកូនក្តីរបស់ខ្ញុំត្រូវបានចាប់ខ្លួននៅពេលគាត់ ព្យាយាមចាកចេញពីប្រទេសកាលពីខែឧសភាហើយអីឡូវនេះ ត្រូវបានចោទប្រកាន់ថ្មីក្រោមច្បាប់ប្រឆាំងភេរវកម្ម និងបះបោរ។
ការផ្តន្ទាទោសក្រោមច្បាប់ប្រឆាំងអំពើភេរវកម្មត្រូវ អនុវត្តទោសអតិបរមាជាប់ពន្ធនាគារអស់មួយជីវិត។សវនាការគ្រោងនឹងចាប់ផ្តើមនៅថ្ងៃទី ១៦ ខែវិច្ឆិកា។
Fenster អាយុ 37 ឆ្នាំបានធ្វើការឱ្យកាសែតក្នុងស្រុក Frontier Myanmarប្រហែលមួយឆ្នាំហើយកំពុងធ្វើដំណើរទៅផ្ទះដើម្បីមើលគ្រួសាររបស់គាត់នៅពេលគាត់ត្រូវបានឃុំខ្លួន។
គាត់ត្រូវបានកាត់ទោសរួចហើយ សម្រាប់បទចោទប្រកាន់ថាបានលើកទឹកចិត្តឱ្យមានការប្រឆាំងប្រឆាំងនឹងយោធា សមាគមដោយខុសច្បាប់ និងការបំពានច្បាប់អន្តោប្រវេសន៍ ហើយកំពុងត្រូវបានឃុំខ្លួននៅក្នុងពន្ធនាគារ Insein ក្នុងទីក្រុង Yangon ។ លោកបានបន្ថែមថា Fenster ខកចិត្តដែលត្រូវបានរងការចោទប្រកាន់ថ្មី ដែលត្រូវបានប្តឹងកាលពីថ្ងៃអង្គារ។
ប្រទេសនៅអាស៊ីអាគ្នេយ៍មួយនេះ បានជាប់គាំងនៅក្នុងភាពវឹកវរចាប់តាំងពីរដ្ឋប្រហារខែកុម្ភៈ ដោយយោធាបានព្យាយាមកំទេចក្រុមតវ៉ាលទ្ធិប្រជាធិបតេយ្យដែលកំពុងរីករាលដាលនិងលុបបំបាត់ការប្រឆាំង។ យោងតាមក្រុមឃ្លាំមើលក្នុងតំបន់បានឲ្យដឹងថា មនុស្សជាង 1200 នាក់ត្រូវបានសម្លាប់ដោយកងកម្លាំងសន្តិសុខក្នុងការបង្ក្រាបលើក្រុមប្រឆាំង៕
