លោកតាន់ គឹមសួរ ដែលតែងតែធ្វើកិច្ចការសប្បុរសធម៌ជាច្រើននោះ នៅថ្ងៃនេះ បានថ្លែងសារអាណិតលោកបេន ដែលនាំប្រពន្ធកូន មករស់នៅស្រុកខ្មែរ ដើម្បីការពារ និងអភិរក្សព្រៃឈើដែលត្រូវក្រុមមួយក្តាប់តូចកំពុងបំផ្លិចបំផ្លាញនោះថា “បេនអើយ ទៅស្រុកលោកវិញទៅ លោកការពារមិនឈ្នះទេ”។
នៅថ្ងៃទី០៥ ខែកុម្ភៈ ឆ្នាំ២០២០នេះ លោកតាន់ គឹមសួរ បានបង្ហោះសារថា “អរគុណដែលខំប្រឹងដុត អរគុណដែលខំប្រឹងកាប់ទន្ទ្រាន អរគុណដែលអាជ្ញាធររុញច្រានបញ្ហាទាំងនេះដាក់គ្នាដោយគ្មានអ្នកណាទទួលខុសត្រូវ អរគុណគ្រប់យ៉ាងដែលបានផ្តល់ឲ្យភ្នំត្នោត”។
លោកគឹមសួរ បន្ថែមថា “បេនអើយ ទៅស្រុកលោកវិញទៅ! លោកតែឯងការពារមិនឈ្នះទេ គ្មានអ្នកណារវល់ជាមួយលោកទេ ប្រយ័ត្នសូម្បីតែអាយុជិវិតក៏រក្សាមិនបាន នាំប្រពន្ធកូនត្រឡប់ទៅស្រុកវិញទៅ!!! ខ្ញុំហត់ជំនួសលោកណាស់!!!”។
គួរបញ្ជាក់ថា លោកបេន (Ben Davis) គឺជាជនជាតិអាមេរិកាំង ដែលមានភរិយានិងកូន២នាក់ បានសម្រេចចិត្តមករស់នៅស្រុកខ្មែរ ដើម្បីការពារអភិរក្សព្រៃឈើនៅស្រុកខ្មែរ រយៈពេល២០ឆ្នាំមកហើយ ដោយប្រើប្រាស់ថវិកាលោកផ្ទាល់។
លោកបេន ធ្លាប់លើកឡើងថា លោកមិនស្តាយក្រោយឡើយដែលលោកជ្រើសរើសផ្លូវមួយនេះ។ លោកបានលះបង់អស់ហើយដើម្បីថែរក្សាព្រៃឈើនៅក្នុងប្រទេសកម្ពុជា។ ហើយលោកសង្ឃឹមថាប្រជាជនកម្ពុជាទាំងអស់នឹងយល់ពីតម្លៃនៃការលះបង់នេះ ហើយនាំគ្នាចូលរួមថែរក្សាព្រៃឈើរ ហើយឈប់កាប់បំផ្លាញព្រៃឈើរតទៅទៀតទៅ៕
