ភ្នំពេញ ៖ បុគ្គលិកស្រីរបស់គ្រឹះស្ថានមីក្រូហិរញ្ញវត្ថុម្នាក់ ត្រូវបានប្រធានផ្នែកប្រតិបត្តិការប្តឹងសមត្ថកិច្ចឲ្យចាប់ខ្លួន បន្ទាប់ពីបុគ្គលិករូបនេះសុីដាច់លុយក្រុមហ៊ុនដល់ទៅ២មុឺនដុល្លារ។
សមត្ថកិច្ចបានឲ្យដឹងថា កម្លាំងនគរបាលបុស្តិ៍បឹងទំពុនទី២ បានឃាត់ខ្លួនបុគ្គលិកស្រីរូបនេះកាលពីវេលាម៉ោង៨យប់ ថ្ងៃទី១៤ ខែសីហា ឆ្នាំ២០១៩ ពាក់ព័ន្ធករណីរំលោភលើទំនុកចិត្ត ។
សមត្ថកិច្ចបានបន្តថា ជនសង្ស័យមានឈ្មោះស៊ង សុខុម ភេទស្រី អាយុ៣១ឆ្នាំ ជនជាតិខ្មែរ មានទីលំនៅផ្ទះគ្មានលេខ ផ្លូវលំ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ មុខរបរបុគ្គលិកគ្រឹស្ថានមីក្រូហិរញ្ញវត្ថុ L.O.L.C ផ្នែកបេឡា។
ចំណែកជនរងគ្រោះមានឈ្មោះស៊ិន សុភី ភេទប្រុស អាយុ៣៣ឆ្នាំ ជនជាតិខ្មែរ ទីលំនៅផ្ទះលេខ៤០V ផ្លូវលេខ៧ ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ មុខរបរបុគ្គលិកគ្រឹះស្ថានមីក្រូហិរញ្ញវត្ថុ L.O.L.C ផ្នែកប្រតិបត្តិការ (តំណាងនាយកគ្រឹះស្ថានមីក្រូហិរញ្ញវត្ថុ L.O.L.C ) ។
សមត្ថកិច្ចបានបញ្ជាក់ថា នៅក្នុងពាក្យបណ្តឹង ជនរងគ្រោះបានប្តឹងជនសង្ស័យ បន្លំដកយកលុយគ្រឹះស្ថានមីក្រូហិរញ្ញវត្ថុ L.O.L.C ចំនួន២០.០០០ដុល្លារ នៅចំណុចគ្រឹះស្ថានមីក្រូហិរញ្ញវត្ថុ L.O.L.C ផ្លូវលេខ២៧១ ភូមិក្បាលទំនប់១ សង្កាត់បឹងទំពន់ទី២ ខណ្ឌមានជ័យ រាជធានីភ្នំពេញ កាលពីថ្ងៃទី២៩ ខែកក្កដា ឆ្នាំ២០១៩ វេលាម៉ោង១៥ម៉ោង០១នាទី។
បច្ចុប្បន្ន ជនសង្ស័យត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌមានជ័យ ដើម្បីកសាងសំណុំរឿងចាត់ការតាមនីតិវិធី ៕