ប្រទេសឥណ្ឌាបាននិយាយកាលពីថ្ងៃអង្គារថា ខ្លួនបានបណ្តេញអ្នកការទូតកាណាដាម្នាក់ដោយទុកពេលឲ្យ ប្រាំថ្ងៃដើម្បីចាកចេញពីប្រទេសនេះ។ការសងសឹកនេះបានធ្វើឡើងត្រឹមតែប៉ុន្មានម៉ោងបន្ទាប់ពីទីក្រុងOttawaបានបណ្តេញភ្នាក់ងារស៊ើបការណ៍សម្ងាត់កំពូលរបស់ប្រទេសអាស៊ីខាងត្បូងមួយនេះក្រោមបទចោទប្រកាន់ថាមានតួនាទីក្នុងការសម្លាប់មេដឹកនាំផ្តាច់ខ្លួនសហគមន៍ Sikh ។ ក្រសួងការបរទេសឥណ្ឌាបាននិយាយនៅក្នុងសេចក្តីថ្លែងការណ៍មួយថាស្នងការជាន់ខ្ពស់កាណាដាឬឯកអគ្គរដ្ឋទូតនៅទីក្រុងញូវដែលីត្រូវបានកោះហៅនិងប្រាប់អំពីការសម្រេចចិត្តបណ្តេញចេញ។ក្រសួងបានបន្ថែមថាការសម្រេចចិត្តនេះឆ្លុះបញ្ចាំងពីការព្រួយបារម្ភកាន់តែខ្លាំងឡើងរបស់រដ្ឋាភិបាលឥណ្ឌាចំពោះការជ្រៀតជ្រែករបស់អ្នកការទូតកាណាដានៅក្នុងបញ្ហាផ្ទៃក្នុងរបស់យើង និងការចូលរួមរបស់ពួកគេនៅក្នុងសកម្មភាពប្រឆាំងនឹងឥណ្ឌា។
ប្រទេសកាណាដាកាលពីថ្ងៃចន្ទ ទី ១៨ ខែកញ្ញាបានចោទប្រកាន់រដ្ឋាភិបាលរបស់ប្រទេសឥណ្ឌាថាមានការជាប់ពាក់ព័ន្ធក្នុងការសម្លាប់មេដឹកនាំ Sikh គឺលោក Nijjar ជិតទីក្រុង Vancouver កាលពីខែមិថុនាឆ្នាំមុន។ទង្វើសងសឹកនេះបានធ្វើឲ្យជម្លោះកាន់តែកើនឡើងរវាងប្រទេសទាំងពីរដោយប្រទេសកាណាដាបាននិយាយកាលពីថ្ងៃចន្ទថាខ្លួនកំពុងបន្តការចោទប្រកាន់ដ៏គួរឱ្យទុកចិត្តដែលភ្ជាប់ភ្នាក់ងាររដ្ឋាភិបាលឥណ្ឌាទៅនឹងឃាតកម្មនៅ British Columbia កាលពីខែមិថុនា។
ក្រសួងការបរទេសឥណ្ឌាកាលពីថ្ងៃអង្គារបានច្រានចោលការអះអាងនៃការជាប់ពាក់ព័ន្ធក្នុងការស្លាប់របស់លោក Nijjar ហើយបាននិយាយថាខ្លួនបានបញ្ជាឱ្យអ្នកការទូតជាន់ខ្ពស់កាណាដាម្នាក់ដែលមិនបញ្ចេញឈ្មោះឱ្យចាកចេញពីប្រទេសក្នុងរយៈពេលប្រាំថ្ងៃ។
គួររំឭកថាលោកNijjar ដែលឥណ្ឌាបានប្រកាសថាជាភេរវករដែលខ្លួនចង់បាននោះត្រូវបានខ្មាន់កាំភ្លើងបាញ់សម្លាប់កាលពីថ្ងៃទី១៨ ខែមិថុនា នៅទីក្រុង Surrey ជាយក្រុង Vancouver ដែលជាផ្ទះរបស់សហគមន៍ Sikh ដ៏ធំមួយ។
ប្រទេសកាណាដាមានជនជាតិ Sikhs ច្រើនជាងគេនៅទូទាំងពិភពលោកក្រៅពីប្រទេសឥណ្ឌា។Nijjar បានតស៊ូមតិសម្រាប់ការបង្កើតរដ្ឋ Sikh ឯករាជ្យមួយដែលត្រូវបានផ្តាច់ចេញពីផ្នែកខ្លះនៃភាគខាងជើងនៃប្រទេសឥណ្ឌានិងប្រហែលជាជាផ្នែកមួយនៃប្រទេសប៉ាគីស្ថាន។
ទីក្រុង ញូវដែលីបានចោទប្រកាន់លោក Nijjar ថាបានធ្វើការវាយប្រហារភេរវកម្មនៅក្នុងប្រទេសឥណ្ឌា ដែលជាការចោទប្រកាន់ដែលគាត់បានបដិសេធ៕