កាលពីថ្ងៃពុធវិមានក្រឹមឡាំង បាននិយាយថាការស៊ើបអង្កេតលើការធ្លាក់យន្តហោះដែល បានសម្លាប់មេដឹកនាំ ទាហានស៊ីឈ្នួល Wagner Group លោក Yevgeny Prigozhin កាលពីសប្តាហ៍មុនគឺបន្ទុកនៃការស៊ើបអង្កេតរបស់ រុស្ស៊ីហើយថាមិនអោយមានការស៊ើបអង្កេតពីអន្តរជាតិទេ។
នៅក្នុងការហៅទូរស័ព្ទជាមួយអ្នកសារព័ត៌មាន អ្នកនាំពាក្យវិមានក្រឹមឡាំង លោក ឌីមីទ្រី បាននិយាយថាការ ស៊ើបអង្កេតរបស់រុស្ស៊ីបានគិតគូរពីលទ្ធភាពដែលថាការធ្លាក់យន្តហោះនេះត្រូវបានបង្កឡើងដោយចេតនា។
សេតវិមានថា វិមានក្រឹមឡាំង នៅពីក្រោយការស្លាប់ Prigozhin
សេតវិមានកាលពីថ្ងៃអង្គារបានខិតជិតទៅដល់ការសន្និដ្ឋានមួយដើម្បីប្រកាសថាវិមានក្រឹមឡាំងគឺជាអ្នកទទួលខុសត្រូវចំពោះការស្លាប់របស់ប្រធានក្រុមទាហានស៊ីឈ្នួល Wagner លោក Yevgeny Prigozhin ដែលត្រូវបានគេ ជឿថាបានស្លាប់នៅក្នុងការធ្លាក់យន្តហោះដ៏អាថ៌កំបាំងមួយកាលពីសប្តាហ៍មុន។
អ្នកនាំពាក្យសេតវិមានលោកស្រី Karine Jean-Pierre បាននិយាយថាយើងទាំងអស់គ្នាដឹងថាវិមាន ក្រឹមឡាំង មានប្រវត្តិដ៏យូរលង់ក្នុងការសម្លាប់គូប្រជែង។វាច្បាស់ណាស់ថាមានអ្វីកើតឡើងនៅទីនេះ។ការអត្ថាធិប្បាយរបស់លោកស្រីគឺជាសេចក្តីថ្លែងការណ៍របស់សហរដ្ឋអាមេរិកដែលស្ទើរតែឈានទៅដល់ការសន្និដ្ឋានអំពីលទ្ធភាពដែលប្រធានាធិបតីរុស្ស៊ី លោក វ្ល៉ាឌីមៀ ពូទីន បានដឹកនាំការសម្លាប់លោក Prigozhin បន្ទាប់ ពីលោកបះបោរខ្លីមួយប្រឆាំងនឹងវិមានក្រឹមឡាំងកាលពីខែមិថុនា។
ប្រធានាធិបតីសហរដ្ឋអាមេរិក ចូបៃដិន បានប្រាប់អ្នកសារព័ត៌មានកាលពីសប្តាហ៍មុនថា សហរដ្ឋអាមេរិកកំពុង ធ្វើការដើម្បីឈានដល់ការសន្និដ្ឋានអំពីរបៀបដែលយន្តហោះនេះធ្លាក់។ លោកបាននិយាយកាលពីថ្ងៃសុក្រថា៖ «យើងកំពុងព្យាយាមគូសវាសយ៉ាងជាក់លាក់។
លោកក៏បាននិយាយផងដែរថា វាមិនគួរឱ្យភ្ញាក់ផ្អើលទេដែល Prigozhin ត្រូវបានសម្លាប់បន្ទាប់ពីលោកប្រឆាំង នឹងលោកពូទីន៕