ប្រធានសភាលោក Wan Muhamad Noor Matha បានផ្តល់ដំបូន្មានដល់គណបក្សឆ្ពោះទៅមុខឱ្យបញ្ឈប់សំណើរបស់ខ្លួនសុំឲ្យសភាពិនិត្យមើលលើការបដិសេធកាលពីសប្តាហ៍មុននៃការតែងតាំងមេដឹកនាំរបស់ខ្លួនលោកភីតា Pita ជានាយករដ្ឋមន្ត្រីដោយរង់ចាំការសម្រេចរបស់តុលាការធម្មនុញ្ញជាមុនសិន។ប្រធានសភា បាននិយាយកាលពីថ្ងៃពុធថា MFP គួរតែរង់ចាំការសម្រេចរបស់តុលាការធម្មនុញ្ញលើញត្តិរបស់សមាគមពលរដ្ឋOmbudsmanសម្រាប់សេចក្តីសម្រេចលើដំណោះស្រាយ។លោកបន្តថា សេចក្តីសម្រេចរបស់តុលាការធម្មនុញ្ញនឹងមានឥទ្ធិពលលើសភា និងអ្នកពាក់ព័ន្ធទាំងអស់។
លោកក៏បាននិយាយផងដែរថាការសម្រេចចិត្តរបស់លោកក្នុងការពន្យារពេលដោយគ្មានកំណត់ ការបោះឆ្នោតបន្ទាប់របស់សភា ដើម្បីជ្រើសរើសនាយករដ្ឋមន្ត្រីដែលត្រូវបានកំណត់សម្រាប់ថ្ងៃព្រហស្បតិ៍គឺមិនមានហេតុផលនយោបាយណាមួយឡើយ។ការសម្រេចចិត្តបែបនេះព្រោះតុលាការធម្មនុញ្ញកំពុង ពិចារណាលើញត្តិពីការិយាល័យប្រជាពលរដ្ឋដែលសុំពន្យារពេលបោះឆ្នោត។
លោក Wan ក៏បានបញ្ជាក់ថា ប្រសិនបើតុលាការមិនទទួលយករឿងនេះមកពិចារណា លោកអាចកំណត់កាលបរិច្ឆេទសម្រាប់ការបោះឆ្នោតសភាលើកក្រោយភ្លាមៗ។រហូតមកដល់ពេលនេះគេមិនទាន់ឃើញមានចំណាត់ការយ៉ាងណាពី តុលាការធម្មនុញ្ញនៅឡើយទេ។
លោកភីតាបានបរាជ័យក្នុងការឈ្នះសំឡេងភាគច្រើនពីសភា និងព្រឹទ្ធសភា ដើម្បីក្លាយជានាយករដ្ឋមន្ត្រីនៅថ្ងៃទី១៣ ខែកក្កដាហើយបន្ទាប់មកនៅថ្ងៃទី១៩កក្កដា លោកត្រូវបានរារាំងម្តងទៀតដោយសមាជិកមួយចំនួនថាការតែងតាំងលើកទី២នេះខុសច្បាប់មាត្រា៤១ដែល ហាមឃាត់ការបញ្ជូនឡើងវិញនូវសំណើដែលខកខានក្នុងសម័យប្រជុំសភាលើកទី១។
ទោះជាយ៉ាងណាក្តីអ្នកគាំទ្រលោក ភីតានិងអ្នកសិក្សាជាច្រើនមិនយល់ស្របនឹងដំណោះស្រាយរបស់សភាកាលពីថ្ងៃទី១៩ខែកក្កដា ដោយលើកហេតុផលថាបទប្បញ្ញត្តិលេខ ៤១ អនុវត្តចំពោះអាជីវកម្មទូទៅមិនមែនជាការតែងតាំងនាយករដ្ឋមន្ត្រីទេហើយបានស្នើឱ្យតុលាការធម្មនុញ្ញពិនិត្យមើលឡើងវិញ លើភាពស្របច្បាប់នៃការតែងតាំងលោកលោកភីតា ៕