កាលពីថ្ងៃអង្គារទី ២៥ ខែកក្កដា វិមានក្រឹមឡាំងនិយាយថា សម្រាប់ពេលនេះវាមិនអាចទៅរួចទេសម្រាប់រុស្ស៊ីក្នុងការវិលត្រលប់ទៅកិច្ចព្រមព្រៀងនាំគ្រាប់ធញ្ញជាតិចេញពីសមុទ្រខ្មៅវិញបានទេ ដោយសារតែផលប្រយោជន៍របស់រុស្ស៊ី មិនត្រូវបានអនុវត្ត។
ទោះបីជាយ៉ាងណាក៏ដោយ អ្នកនាំពាក្យវិមានក្រឹមឡាំង លោក Dmitry Peskov បាននិយាយថា លោកប្រធានាធិបតី វ្ល៉ាឌីមៀពូទីនបានពន្យល់ថាកិច្ចព្រមព្រៀងអាចនឹងត្រូវបានរស់ឡើងវិញ ប្រសិនបើផ្នែកណាមួយនៃកិច្ចព្រមព្រៀងរបស់ខ្លួន ត្រូវបានគេគោរព។
កិច្ចព្រមព្រៀងដែលសម្របសម្រួលដោយអង្គការសហប្រជាជាតិ និងប្រធានាធិបតីតួកគីកាលពីខែកក្កដាកន្លងទៅ មានគោលបំណងការពារវិបត្តិស្បៀងអាហារពិភពលោក ដោយអនុញ្ញាតឱ្យគ្រាប់ធញ្ញជាតិដែលត្រូវបានរារាំងដោយសង្រ្គាមនៅក្នុងប្រទេសអ៊ុយក្រែនអាចនាំចេញដោយសុវត្ថិភាព។រុស្ស៊ីបានប្រកាសថាខ្លួនបានដកខ្លួនចេញពីកិច្ចព្រមព្រៀងកាលពីសប្តាហ៍មុន។
លោកPeskovបានបន្ថែមថាវានឹងមានសារៈសំខាន់សម្រាប់រុស្ស៊ីក្នុងការពិភាក្សាអំពីការផ្គត់ផ្គង់គ្រាប់ធញ្ញជាតិនៅក្នុងកិច្ចប្រជុំកំពូលរុស្ស៊ី-អាហ្វ្រិកនៅចុងសប្តាហ៍នេះ។ប្រជាជនជាង៤០០លាននាក់នឹងរងផល់ប៉ះពាល់ប្រសិនបើកិច្ចព្រមព្រៀងនេះមិនត្រួវបានបន្តឡើងវិញ៕