ប្រព័ន្ធផ្សព្វផ្សាយក្នុងស្រុកបានរាយការណ៍កាលពីថ្ងៃអង្គារទី ២៥ខែកក្កដាថាប្រធានសភារបស់ប្រទេសថៃ លោកWan Muhamad Noor Matha បានពន្យារពេលការបោះឆ្នោតជ្រើសរើសនាយករដ្ឋមន្ត្រីថ្មីរបស់ប្រទេសនេះដែលគ្រោងធ្វើនៅថ្ងៃព្រហស្បតិ៍ទី២៧ខាងមុខនេះ ខណៈដែលភាពជាប់គាំងនយោបាយអូសបន្លាយជាងពីរខែបន្ទាប់ពីការបោះឆ្នោតទូទៅកាលពីខែឧសភា។
ការពន្យារនេះដោយរង់ចាំការសម្រេចរបស់តុលាការធម្មនុញ្ញស្តីពីការបដិសេធការតែងតាំងមេដឹកនាំគណបក្សឆ្ពោះទៅមុខលោកភីតា ។
លោកWanបាននិយាយថាហេតុផលមួយទៀតសម្រាប់ការពន្យាពេលការ គឺដោយសារតែសមាជិកសភា និងសមាជិកព្រឹទ្ធសភាជាប់ឆ្នោតជាច្រើនមានការព្រួយបារម្ភថាពួកគេនឹងមិនអាចចូលរួមក្នុងព្រះរាជពិធីដើម្បីអបអរសាទរព្រះរាជពិធីបុណ្យចម្រើនព្រះជន្មរបស់ព្រះមហាក្សត្រនៅក្នុងខេត្តរៀងៗខ្លួននៅថ្ងៃសុក្រប្រសិនបើការប្រជុំសភាអូសបន្លាយពេលយូរ។
លោកWanបាននិយាយកាលពីថ្ងៃអង្គារថាលោកបានធ្វើការសម្រេចចិត្តបន្ទាប់ពីបានពិគ្រោះជាមួយមន្ត្រីច្បាប់សភាតំណាងរាស្រ្ត និងទីប្រឹក្សារបស់លោក។
ការបោះឆ្នោតនេះគ្រោងនឹងធ្វើឡើងនៅថ្ងៃទី ២៧ ខែកក្កដា បន្ទាប់ពីការប៉ុនប៉ងពីរលើកដោយមេដឹកនាំគណបក្ស ឆ្ពោះទៅមុខដែលឈ្នះការបោះឆ្នោតគឺ ភីតាត្រូវបានរារាំងដោយសមាជិកសភាអភិរក្សនិយម និងព្រឹទ្ធ សភា។
ប្រាយុទ្ធ ប្រឆាំងនឹងផែនការពន្យារកំណើតរដ្ឋាភិបាល
នាយករដ្ឋមន្ត្រីចាំផ្ទះ លោក ប្រាយុទ្ធ ចាន់អូចា បានប្រឆាំងនឹងសំណើសម្ព័ន្ធមិត្តមួយចំនួនរបស់គណបក្ស ឆ្ពោះទៅមុខឲ្យរង់ចាំរយៈពេល១០ខែទៀតក្នុងការបង្កើតរដ្ឋាភិពោលគឺរង់ចាំឲ្យសមាជិកព្រឹទ្ធសភាចប់អាណត្តិជាមុនសិន។
លោកឧត្តមសេនីយ៍ ប្រាយុទ្ធ បាន ឆ្លើយតបទៅនឹងសំណួររបស់អ្នកសារព័ត៌មានដោយនិយាយថាខ្ញុំគិតថាគំនិតនេះវាមិនសមរម្យទេ ។
គណបក្សថៃសាងថៃនិងគណបក្សយុត្តិធម៌បានស្នើឱ្យសម្ព័ន្ធមិត្តចំនួនប្រាំបីរង់ចាំសម្រាប់អាណត្តិរយៈពេលប្រាំឆ្នាំនៃព្រឹទ្ធសភាដែលត្រូវបានតែងតាំងដោយយោធាបញ្ចប់នៅក្នុងខែឧសភាឆ្នាំ២០២៤ ដូច្នេះសម្ព័ន្ធភាពរបស់ MFP អាចមានភាពងាយស្រួលក្នុងការជ្រើសរើសនាយករដ្ឋមន្ត្រីរបស់ខ្លួនដែលការជ្រើសរើសគឺធ្វើឡើងដោយសមាជិកសភាតែម្នាក់ឯង។
គណបក្ស ភឿថៃ លុបចោលកិច្ចប្រជុំបន្ទាន់
កិច្ចប្រជុំដែលបានគ្រោងទុកនៅម៉ោង ៣ រសៀលល្ងាចថ្ងៃអង្គាររបស់គណបក្សនយោបាយទាំងប្រាំបីក្នុងគោលបំណងបង្កើតរដ្ឋាភិបាលថ្មីត្រូវបានលុបចោលភ្លាមៗ។
កិច្ចប្រជុំនេះត្រូវបានកោះហៅដោយគណបក្សភឿថៃ ដើម្បីពិភាក្សាអំពីវឌ្ឍនភាពក្នុងការទទួលបានការគាំទ្របន្ថែមសម្រាប់ការតែងតាំងនាយករដ្ឋមន្ត្រីដែលពេញចិត្ត។
គណបក្សភឿថៃបានប្រកាសលុបចោលកិច្ចប្រជុំនៅក្នុងសារផ្ញើទៅកាន់អ្នកសារព័ត៌មាននៅលើកម្មវិធី LINE កាលពីព្រឹកថ្ងៃអង្គារ។
ពីដំបូងគណបក្សភឿថៃបានធ្វើការណាត់ប្រជុំនៅវេលាម៉ោង២រសៀលថ្ងៃអង្គារនៅទីស្នាក់ការកណ្តាលរបស់គណបក្សភឿថៃ។ ក្រោយមកវាបានប្តូរទៅម៉ោង ៣ រសៀល និងប្តូរកន្លែងទៅអគាររដ្ឋសភា តែចុងក្រោយត្រូវលុបចោល។
មូលហេតុនៃការលុបចោលនេះមិនត្រូវបានបក្សភឿថៃបង្ហាញឲ្យដឹងនោះទេដោយគ្រាន់តែពន្យល់ថា ភារកិច្ចដែលត្រូវបានចាត់តាំងរបស់ខ្លួន ក្នុងការស្វែងរកការគាំទ្រពីភាគីក្រៅសម្ព័ន្ធភាព និងពីសមាជិកព្រឹទ្ធសភានៅក្នុងការបោះឆ្នោតសភា ដើម្បីជ្រើសរើសនាយករដ្ឋមន្ត្រីថ្មីមិនមានដំណើរការល្អគួរជាទីពេញចិត្តនោះទេ៕