មន្ត្រីចារកម្មកំពូលរបស់អាមេរិកបាននិយាយកាលពីថ្ងៃព្រហស្បតិ៍ទី៤ខែឧសភាថារុស្ស៊ីទំនងជាមិនប្រើប្រាស់អាវុធនុយក្លេអ៊ែររបស់ខ្លួនទេបើទោះបីជាពេលនេះខ្លួនកំពុងខាតបង់យ៉ាងធ្ងន់ធ្ងរទាំងទាំងសេដ្ឋកិច្ចនិងយោធាដែលកំពុងស៊ូទ្រាំក្នុងការឈ្លានពានអ៊ុយក្រែនក៏ដោយ។
នាយកផ្នែកស៊ើបការណ៍សម្ងាត់ជាតិលោកស្រី Avril Haines បានប្រាប់គណៈកម្មាធិការសេវាប្រដាប់អាវុធព្រឹទ្ធ សភាថានៅក្នុងការវាយតម្លៃរបស់យើងនាពេលបច្ចុប្បន្ននេះ វាមិនទំនងទេ ដែលថារុស្ស៊ីប្រើប្រាស់អាវុធនុយក្លេអ៊ែរ។
ទោះជាយ៉ាងណាក្តីលោកស្រី Haines មិនបានបញ្ជាក់លម្អិតអំពីការវាយតម្លៃសហគមន៍ស៊ើបការណ៍សម្ងាត់របស់សហរដ្ឋអាមេរិកនោះទេ។មន្ត្រីអាមេរិកជាច្រើនខែមកនេះបាននិយាយថា ពួកគេមិនបានឃើញសញ្ញាដែលរុស្ស៊ីកំពុងរៀបចំប្រើប្រាស់អាវុធនុយក្លេអ៊ែរនោះទេប៉ុន្តែបានព្រមានថាពួកគេកំពុងបន្តការប្រុងប្រយ័ត្ន។
ភាពតានតឹងនុយក្លេអ៊ែររវាងរុស្ស៊ី និងសហរដ្ឋអាមេរិកបានកើនឡើងចាប់តាំងពីការចាប់ផ្តើមនៃជម្លោះជាមួយអ៊ុយក្រែន។លោកពូទីនបានព្រមានម្តងហើយម្តងទៀតថារុស្ស៊ីត្រៀមខ្លួនជាស្រេចក្នុងការប្រើប្រាស់ឃ្លាំងអាវុធនុយក្លេអ៊ែររបស់ខ្លួនប្រសិនបើចាំបាច់ដើម្បីការពារ បូរណភាពទឹកដីរបស់ខ្លួន។
កាលពីខែកុម្ភៈ លោកពូទីនបានប្រកាសថា រុស្ស៊ីបានផ្អាកការចូលរួមរបស់ខ្លួននៅក្នុងសន្ធិសញ្ញា New STARTដែលជាកិច្ចព្រមព្រៀងអាវុធនុយក្លេអ៊ែរចុងក្រោយដែលនៅសល់ជាមួយសហរដ្ឋអាមេរិក ដែលកំណត់ចំនួនក្បាលគ្រាប់យុទ្ធសាស្ត្រដែលភាគីនីមួយៗអាចដាក់ពង្រាយបាន៕