ទីបំផុតសហរដ្ឋអាមេរិកបានសម្រេចបើកច្រកព្រំដែនផ្លូវគោក និងផ្លូវអាកាសឡើងវិញចាប់ពីថ្ងៃចន្ទ ទី៨ ខែវិច្ឆិកា ឆ្នាំ២០២១ ដល់ភ្ញៀវបរទេសដែលបានចាក់វ៉ាក់សាំងការពារជំងឺកូវីដ-១៩ ពេញលេញដែលជាការបញ្ចប់ការចាក់សោប្រទេសអស់រយៈពេល 20 ខែលើការធ្វើដំណើរពីជុំវិញពិភពលោក ដែលបានបំបែកសមាជិកគ្រួសារ ការរំខានទេសចរណ៍ និងទំនាក់ទំនងការទូតកាន់តែតានតឹង។នេះបើយោងតាមការចេញផ្សាយរបស់ទីភ្នាក់ងារសារព័ត៌មានបារាំង AFP។
ការចាក់សោប្រទេសធ្វើឡើងដោយអតីតប្រធានាធិបតីលោកដូណាល់ត្រាំកាលពីដើមឆ្នាំ2020និងគាំទ្រដោយអ្នកស្នងតំណែងរបស់គាត់គឺលោកចូបៃឌិន ដែលបម្រាមនេះ ត្រូវបានរិះគន់យ៉ាងខ្លាំង។
ការរឹតបន្តឹងនេះគឺមិនពេញនិយមទេជាពិសេសនៅអឺរ៉ុប និងប្រទេសជិតខាងរបស់សហរដ្ឋអាមេរិក ដូចជាប្រទេស កាណាដា និងម៉ិកស៊ិកជាដើម។
ក្នុងកិច្ចខិតខំប្រឹងប្រែងដើម្បីកាត់បន្ថយការរីករាលដាលនៃមេរោគនេះ ព្រំដែនសហរដ្ឋអាមេរិកត្រូវបានបិទតាំងពីខែមីនាឆ្នាំ 2020 សម្រាប់អ្នកធ្វើដំណើរមកពីផ្នែកជាច្រើននៃពិភពលោក រួមទាំងសហភាពអឺរ៉ុប ចក្រភពអង់គ្លេស ចិន ឥណ្ឌា និងប្រេស៊ីល។ ភ្ញៀវទេសចរតាមផ្លូវគោកមកពីម៉ិកស៊ិក និងកាណាដា ក៏ត្រូវបានហាមឃាត់ផងដែរ។
ការរឹតបន្តឹងជាច្រើនខែបានប៉ះពាល់ដល់មនុស្សរាប់រយលាននាក់ និងការខាត់បង់សេដ្ឋកិច្ចដែលបណ្តាលមកពីជំងឺរាតត្បាត កូវីដ-១៩។
លោកស្រីAlison Henry អាយុ 63 ឆ្នាំបានប្រាប់ AFP ថា វាពិបាកណាស់។ ខ្ញុំគ្រាន់តែចង់ឃើញកូនប្រុសរបស់ខ្ញុំ។ស្ត្រីជនជាតិអង់គ្លេសរូបនេះគ្រោងហោះហើរថ្ងៃចន្ទនេះតែម្តងដើម្បីទៅជួបកូនប្រុសនៅទីក្រុងញូវយ៉ក បន្ទាប់ពីបែកគ្នាអស់ ២០ ខែ។
ទោះជាយ៉ាងណាក្តីការលុបចោលបម្រាមហាមឃាត់ការធ្វើដំណើរនឹងប៉ះពាល់ដល់ប្រទេសជាង30ដែលនៅមានការរាតត្បាយខ្លាំងនិងមានភាគរយទាបក្នុងការចាក់វ៉ាក់សាំងបង្ការ។អាជ្ញាធរសហរដ្ឋអាមេរិកគ្រោងនឹងតាមដានយ៉ាងដិតដល់នូវប្រភេទវ៉ាក់សាំងរបស់អ្នកធ្វើដំណើរហើយតម្រូវឱ្យពួកគេធ្វើតេស្ដ អវិជ្ជមាន កូវីដ-១៩ ។
សហរដ្ឋអាមេរិកចាប់ពីថ្ងៃច័ន្ទនេះតទៅនឹងតម្រូវឱ្យអ្នកដំណើរតាមផ្លូវអាកាសទទួលថ្នាំបង្ការពេញលេញនិងត្រូវធ្វើតេស្តក្នុងរយៈពេលបីថ្ងៃមុនពេលធ្វើដំណើរ។ក្រុមហ៊ុនអាកាសចរណ៍នឹងតម្រូវឱ្យដាក់ប្រព័ន្ធតាមដានទំនាក់ទំនង។
ចំណែកឯការបើកព្រំដែនគោកនឹងធ្វើឡើងជាពីរដំណាក់កាល។តំណាក់កាលទីមួយចាប់ពីថ្ងៃច័ន្ទតទៅវ៉ាក់សាំងនឹងត្រូវបានទាមទារសម្រាប់ការធ្វើដំណើរមិនសំខាន់ដូចជាការទៅសួរសុខទុក្ខក្រុមគ្រួសារ ឬទេសចរណ៍ជាដើម។
ទោះជាយ៉ាងណាក្តីអ្នកធ្វើដំណើរដែលមិនបានទទួលថ្នាំបង្ការនៅតែត្រូវបានអនុញ្ញាតឱ្យចូលទៅក្នុងប្រទេសសម្រាប់ការធ្វើដំណើរសំខាន់ដូចដែលពួកគេបានធ្វើសម្រាប់មួយឆ្នាំកន្លះចុងក្រោយ។ការធ្វើដំណើរសំខាន់ដូចជាការពិនិត្យសុខភាព ជំនួញ ការទូតជាដើម។
ដំណាក់កាលទីពីរ ចាប់ផ្តើមនៅដើមខែមករា នឹងតម្រូវអោយភ្ញៀវទាំងអស់ត្រូវចាក់វ៉ាក់សាំងពេញលេញ ដើម្បីចូលសហរដ្ឋអាមេរិកតាមផ្លូវគោកមិនថាហេតុផលសម្រាប់ការធ្វើដំណើររបស់ពួកគេនោះទេ។
អាជ្ញាធរសុខាភិបាលសហរដ្ឋអាមេរិកបាននិយាយថា វ៉ាក់សាំងទាំងអស់ដែលត្រូវបានអនុម័តដោយរដ្ឋបាលចំណីអាហារ និងឱសថសហរដ្ឋអាមេរិក និងអង្គការសុខភាពពិភពលោកនឹងត្រូវបានទទួលយកសម្រាប់ការចូលតាមអាកាស។ នៅពេលនេះវ៉ាក់សាំងដែលអាចចូលអាមេរិកបានរួមមាន AstraZeneca, Johnson & Johnson, Moderna, Pfizer-BioNTech, Covaxin, Sinopharm និង Sinovac ៕
