ស្រីស្រស់ជុំ រចនាពេជ្រ ហៅបេប៊ី ដែលបាត់មុខជាច្រើនខែពោលគឺតាំងពីផ្ទុះកូវីដនោះពេលនេះនាងបានត្រៀមខ្លួនវិលរកអាជីព ចាស់នេះវិញហើយ ដែលការមកលើកនេះនាងថាខុសពីពេលណាៗទាំងអស់។បេប៊ី បានប្រាប់”នគរធំ”តាមទូរស័ព្ទកាលពីថ្ងៃទី៣ខែវិច្ឆិការ ថានាងបានត្រៀមបទថ្មីៗនិងក្បាច់រាំប្លែកជាងមុនសម្រាប់ការបង្ហាញខ្លួនឆាប់ៗនេះដោយមិនចេញមកដដែលៗនោះឡើយ។
ស្រីស្អាតរូបនេះក៍ប្រាប់បន្ថែមថាការដែលនាងផ្អាកឡើងឆាកតន្រ្ដីជាច្រើនខែកន្លងមកដោយសារតែនាងមានមុខរបរថ្មីផ្ទាល់ខ្លួន ហើយណាមួយព្រោះតែកូវីដមុននេះផ្ទុះខ្លាំងពេកទើបនាងសម្រេចចិត្តថាផ្អាកច្រៀងសម្ដែងមួយអន្លើតែម្ដងទៅ។យ៉ាងណានាងថាអំឡុងពេលដែលនាងមិនឡើងឆាកនេះមានអ្នកដឹកនាំកម្មវិធីប្រគុំតន្រ្ដីតាមប៉ុស្ដិ៍ទូរទស្សន៍ខ្លះអង្វរនាងថាឡើងច្រៀងវិញទៅ កុំឈប់ច្រៀងអីណា៎។បេប៊ី បន្ថែមថាអ្នកដឹកនាំកម្មវិធីConcerts ចង់ឲ្យនាងវិលវិញហើយនាងក៍នឹកឆាកតន្រ្ដីនិងFan តែទោះជាពេលនេះកូវីដស្ងាត់បន្ដិចមែនក៍នាងគិតថានៅតែមានការប្រុងប្រយ័ត្នខ្ពស់ដដែលអីចឹងនាងចង់ឲ្យកូវីដស្ងាត់ជាងនេះទៀតទើបចេញមុខវិញ។
ជុំ រចនាពេជ្រ បានបោះបង់អាជីពMCនៅCtn ដើម្បីចាប់អាជីពជាតារាចម្រៀងនៅថោន ដើម្បីសម្រេចក្ដីប្រាថ្នាចង់ក្លាយទៅជាអ្នកចម្រៀងអាជីពម្នាក់។ទោះជាយ៉ាងណាបេប៊ី មិនទាន់អាចធ្វើព្យុះភ្លៀងសម្រាប់អាជីពថ្មីបានទេ ហើយនាងនៅត្រូវការពេលវេលាច្រើនទៀតខណៈដែលការចុះកុងត្រាជាមួយថោន តំណាក់កាលដំបូងគឺរយៈពេលដល់ទៅ៥ឆ្នាំ។
អំឡុងពេលដែលបេប៊ី ផ្ដាច់ខ្លួនពីអាជីពចាស់មកបុកតែផ្នែកចម្រៀងនេះនាងកាន់តែមានជីវភាពហក់ឡើងដូចជានាងរចនាពេជ្រ សម្រេចក្ដីសុបិនសង់បានផ្ទះវីឡារធំស្កឹមស្កៃនៅខណ្ឌសែនសុខ ព្រមទាំងបើកហាងកាហ្វេនិងលក់អាហារតាមOnline ដោយចំណាយទុនអស់ជាច្រើនម៉ឺនដុល្លារទៀតផងទើបធ្វើឲ្យគេសង្ស័យថាតារាសាច់ដូចបណ្ដូលចេករូបនេះមានគូស្នេហ៍ជួយឧបត្ថម្ភ។
ប៉ុន្ដែអ្នកស្រីណារី ម្ដាយរបស់បេប៊ី ធ្លាប់ប្រាប់ថាកូនស្រីគាត់មានលុយធ្វើផ្ទះថ្មីដោយសារតែលក់ផ្ទះចាស់នៅទល់មុខពោចិនតុង និងដីធ្លីមួយចំនួនទៀត។យ៉ាងអ្នកស្រីណារី សារភាពថាបេប៊ី ពិតជាមានប្រុសទាំងក្នុងនិងក្រៅស្រុកតាមស្រលាញ់មែន ប៉ុន្ដែមិនទាន់ច្បាស់លាស់ឬធ្លាប់ភ្ជាប់ពាក្យជាមួយបុរសណាម្នាក់ឡើយ៕
