ភ្នំពេញ ៖ លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានដាក់បទបញ្ជាយ៉ាងម៉ឺងម៉ាត់ដល់កម្លាំងក្រោមឱវាទទាំងអស់ ត្រូវបន្តពង្រឹងវិធានការបង្ការ ទប់ស្កាត់និងបង្ក្រាបសកម្មភាពក្មេងទំនើង ឱ្យមានប្រសិទ្ធភាពខ្ពស់បំផុត និងមិនដកថយឡើយ។
យោងតាមប្រភពស្នងការដ្ឋាននគរបាលរាជធានីភ្នំពេញ បានឱ្យដឹងនៅថ្ងៃទី២៨ ខែវិច្ឆិកា ឆ្នាំ២០២៥ ថា យោងតាមបទបញ្ជានិងការណែនាំដ៏ខ្ពង់ខ្ពស់ពីប្រមុខរាជរដ្ឋាភិបាលកម្ពុជា សម្តេច នាយករដ្ឋមន្ត្រី ហ៊ុន ម៉ាណែត និងលោកបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នាយឧត្តមសេនីយ៍ ស ថេត អគ្គស្នងការនគរបាលជាតិ នាព្រឹកថ្ងៃទី២៨ ខែវិច្ឆិកា ឆ្នាំ២០២៥ លោកឧត្តម សេនីយ៍ឯក ជួន ណារិន្ទ អគ្គស្នងការរងនិងជាស្នងការនគរបាលរាជធានីភ្នំពេញ បានដាក់បទបញ្ជាឱ្យលោក-លោកស្រីស្នងការរងទទួលដឹកនាំតាមបណ្តា ខណ្ឌទាំង១៤ លោកនាយការិយាល័យជំនាញព្រហ្មទណ្ឌ ការិយាល័យជំនាញពាក់ព័ន្ធ និងលោកអធិការនគរ បាលខណ្ឌ ទាំង១៤ ត្រូវបន្តពង្រឹងលើការងារដឹកនាំ ចាត់វិធានការបង្ការ ទប់ស្កាត់ និងបង្ក្រាបក្មេងទំនើង ឱ្យមានប្រសិទ្ធភាព។
ជាមួយនេះ លោកឧត្តមសេនីយ៍ឯក ជួន ណារិន បានណែនាំឱ្យតាមបណ្តាខណ្ឌ ធ្វើបច្ចុប្បន្នភាពឡើងវិញ គ្រប់គ្រងមុខសញ្ញាក្មេងទំនើងក្នុងមូលដ្ឋាន ឱ្យបានច្បាស់លាស់ ត្រូវដឹកនាំកិច្ចប្រជុំវាយតម្លៃសភាពការណ៍ភូមិសា ស្ត្រក្នុងមូលដ្ឋាន លើបញ្ហាប្រឈមនៃបទល្មើស ក្មេងទំនើង និងរាយការណ៍សុំគោលការណ៍ជូនជំនាញ ដើម្បីសហការដោះស្រាយឱ្យទាន់ពេលវេលា។ ត្រូវប្រើប្រាស់កម្លាំងគ្រប់ជំនាញ បង្កើនយកចិត្តទុកដាក់ចេញល្បាត ត្រួតពិនិត្យនៅគោលដៅភូមិសាស្ត្រ លើបញ្ហាប្រឈម ប្រមូលផ្តុំដោយក្មេងទំនើង ដែលមានហានិភ័យបង្កបទល្មើស ដើម្បីទប់ស្កាត់និងបង្ក្រាប។
លោកឧត្តមសេនីយ៍ឯក ជួន ណារិន បានថ្លែងសង្កត់ធ្ងន់ថា បទល្មើសក្មេងទំនើង ត្រូវអនុវត្តវិធានការច្បាប់ ដោយម៉ឺងម៉ាត់ និងមិនដកថយឡើយ។ ត្រូវបន្តសហការជាមួយកម្លាំងជំនាញព្រហ្មទណ្ឌរបស់នាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ ដែលត្រូវ ចូលរួមចេញសហការទប់ស្កាត់និងបង្ក្រាបក្មេងទំនើង ឱ្យកាន់តែមានប្រសិទ្ធភាពខ្ពស់៕