ភ្នំពេញ៖នៅលើបណ្ដាញសង្គមបានចែកចាយ(Share) ទាក់ទងរឿងហ៊ិន ច័ន្ទនីរ័ត្ន ដែលមានការលើកឡើងថាមិនបានហៅការម្ដាយបង្កើតនិងប្អូនស្រីឲ្យចូលរួមពិធីអាពាហ៍ ពិពាហ៍របស់នាងនោះព្រោងព្រាត ក្រោយពីពីធីការិនីរូបស្រស់នេះបានចូលរោងការជាមួយលោកឌី ពេជ្រ កាលពីថ្ងៃទី២២ ខែធ្នូ ឆ្នាំ២០២៣ ។ប្រភពបានឲ្យដឹងថាមានអ្នកលេងហ្វេសបុកខមិនសួរទៅប្អូនស្រីរបស់ហ៊ិន ច័ន្ទនីរ័ត្ន ថាម៉េចអត់ឃើញម្ដាយនិងនាងទៅចូលរួមមង្គលការច័ន្ទនីរ័ត្ន ស្រាប់តែពេលនោះប្អូននីរ័ត្ន ឈ្មោះហ៊ិន ច័ន្ទស្រីពៅ បានតបវិញថា”គេអត់ហៅ”។ដោយឡែកកាលពីថ្ងៃទី២៣ ខែធ្នូ ពោលគឺក្រោយច័ន្ទនីរ័ត្ន រៀបការរួចមួយថ្ងៃហ្វេសបុកឈ្មោះZii Pov ដែលគេស្គាល់ថាជាប្អូនស្រីរបស់ច័ន្ទនីរ័ត្ន នោះបានបង្ហោះរូបម្ដាយនាងរួចសរសេរសារថា”ហែលទឹកភ្នែមម្ដាយខ្ញុំឲ្យរួច “ ។តែគេមិនដឹងថាសារនោះប្អូនស្រីច័ន្ទនីរ័ត្ន ចង់សំដៅដល់អ្នកណាឲ្យប្រាកដឡើយ។ក្រឡែកមកមើលហ្វេសបុករបស់ហ៊ិន ច័ន្ទនីរ័ត្ន វិញនាងគ្មានប្រតិកម្មឬតតបចំពោះរឿងនៅលើបណ្ដាញសង្គមដែលមានការវែកញែកថាហេតុអ្វីបានជានាងមិនហៅម្ដាយនិងប្អូនស្រីឲ្យចូលរួមមង្គលការនោះទេ គឺមានតែសារនាងថ្លែងអំណរគុណដល់ភ្ញៀវទាំងអស់ដែលបានចូលរួមមង្គលការរបស់នាងនិងថានាងមិនដែលគិតថារូបនាងមានភ័ព្វព្រេងវាសនារៀបការយ៉ាងធំជាមួយមនុស្សជាទីស្រលាញ់ដែលបែកគ្នាហើយជួបគ្នាម្ដងទៀតនេះទេ។
គូររំលឹកថាតាមព័តមានហ៊ិន ច័ន្ទនីរ័ត្ន ត្រូវបានម្ដាយបង្កើតយកទៅឲ្យគេចិញ្ចឹមតាំងពីនាងមានអាយុ៣ឆ្នាំម្លេះដោយសារតែពេលនោះជីវភាពក្រលំបាកខ្លាំងពេក ហើយពេលនាងមានឈ្មោះល្បីក្នុងសិល្បៈក៍លេចមុខនារីម្នាក់អះអាងថាជាប្អូនស្រីរបស់ច័ន្ទនីរ័ត្ន រៀបរាប់ពីតំណើររឿងថានីរ័ត្ន មិនទទួលស្គាល់ម្ដាយនិងរូបនាង ។ប៉ុន្ដែរហូតមកដល់ពេលនេះច័ន្ទនីរ័ត្ន មិនដែលចេញមុខបកស្រាយរឿងនេះឡើយ រួមទាំងថ្មីៗនេះដែលប្អូនស្រីនាង បានឆ្លើយតបទៅអ្នកលេងហ្វេសបុកថានាងមិនបានហៅការម្ដាយបង្កើតនិងរូបនាងនោះផងដែរ។
សូមបញ្ជាក់ថាហ៊ិន ច័ន្ទនីរ័ត្ន ជាអតីតFreshie លេខ១ឆ្នាំ២០០៧ ពោលគឺនាងបានប្រឡូកសិល្បៈរយៈពេល១៦ឆ្នាំមកហើយដោយលេចមុខតាមភាពយន្ដធំៗ ,ខារ៉ាអូខេ ,ស្ពត និងជាពិធីការិនីដែលចេញពីប៉ុស្ដិ៍លេខ៣ ទៅបាយ័ន ។មង្គលការបស់ហ៊ិន ច័ន្ទនីរ័ត្ន ជាមួយលោកឌី ពេជ្រ ដែលជាក្មួយសម្ដេចតេជោហ៊ុន សែន កាលពីថ្ងៃទី២២ ខែធ្នូ ឆ្នាំ២០២៣ នោះជាពិធីអាពាហ៍ ពិពាហ៍ ធំជាងគេសម្រាប់តារានៅឆ្នាំ២០២៣ ព្រោះជប់លៀង៣អគារបញ្ចូលគ្នាហើយភ្ញៀវខាងប្រុសភាគច្រើនជាមន្រ្ដីធំ និងអ្នកជំនួញល្បីៗ ខណៈដែលភ្ញៀវខាងនីរ័ត្ន ច្រើនតែជាតារា។ក្រោយក្លាយទៅជាក្មួយថ្លៃសម្ដេចតេជោនេះហ៊ិន ច័ន្ទនីរ័ត្ន ត្រូវបានគេចាត់ទុកថានាងជានារីដែលមានសំណាងពោលគឺទោះជានាងលែងលេងសិល្បៈតរទៅទៀតក៍មិនប្រឈមហានិភ័យសេដ្ឋកិច្ចឡើយ ដោយសារតែស្វាមីនាងជាបុរសពោះម៉ាយទ្រព្យស្ដុកម្នាក់។
តារាសម្ដែងមាន សូនីតា ដែលចូលរួមមង្គលការរបស់ហ៊ិន ច័ន្ទនីរ័ត្ន ដែរនោះបានប្រាប់អ្នកយកព័តមានយើងថានាងនិងនីរ័ត្ន រាប់អានគ្នាជាង១០ឆ្នាំមកហើយ។សូនីតា ក៍យល់ស្របតាមការលើកឡើងថាច័ន្ទនីរ័ត្ន ថាជានារីដែលមានសំណាងនោះដែរដោយនាងថាកម្រមានគូសង្សារដែលបែកគ្នាហើយបានជួបជុំគ្នាវិញរហូតដល់បានរៀបការជាមួយគ្នាបែបនេះណាស់ ហើយនោះគឺជាសំណាងរបស់នាងព្រោះបានចូលរោងការជាមួយមនុស្សជាទីស្រលាញ់។សូនីតា បន្ថែមថានីរ័ត្ន បានទាំងព្រមគឺជាមនុស្សល្អ ស្អាត និងសំណាង ។
តាមព័តមានថាហ៊ិន ច័ន្ទនីរ័ត្ន នឹងដកឃ្លាពីអាជីពសម្ដែងហើយផ្ដោតតែលើការងារជាពិធីការិនីនៅបាយ័នប៉ុណ្ណោះ បើទោះជាស្វាមីនាងមិនហួងហែងអាជីពចាស់របស់នាងក្ដី ប៉ុន្ដែនីរ័ត្ន នឹងងាកទៅធ្វើជំនួញជាមួយប្ដីនាងជាមិនខាន។ចំណែកអ្នកលេងបណ្ដាញសង្គមវិញចង់ឲ្យច័ន្ទនីរ័ត្ន ចេញមុខបំភ្លឺរឿងប្អូនស្រីនាងថារូបគេនិងម្ដាយបង្កើតច័ន្ទនីរ័ត្ន មិនបានទៅចូលរួមការនាងដោយសារតែពិធីការិនីរូបនេះអត់ហៅ …។ការចេញមុខបំភ្លឺរឿងដ៍រសើបមួយនេះឲ្យជ្រះស្រឡះនឹងធ្វើឲ្យមហាជននិងអ្នកលេងហ្វេសបុកអស់ការសង្ស័យទៅលើច័ន្ទនីរ័ត្ន តទៅទៀត ព្រោះពួកគេលើកឡើងថានីរ័ត្ន ពេលនេះនាងបានទៅដល់ត្រើយសុខសាន្ដត្រាន្ដហើយ អីចឹងមានរឿងអីដែលនាងមិនគិតគូរដល់ម្ដាយបង្កើត ?
