ភ្នំពេញ ៖ អ្នកឧកញ៉ាសៀង ណាំ អ្នកតំណាងរាស្ត្រមណ្ឌលខេត្តសៀមរាប មកពីគណបក្សប្រជាជនកម្ពុជា បានបង្ហាញឲ្យឃើញថា ចំណងអាពាហ៍ពិពាហ៍របស់លោកនិងភរិយា មានរយ:ពេល ៤៥ឆ្នាំហើយ តែនៅតែផ្អែមល្ហែម។
អ្នកឧកញ៉ាសៀង ណាំ បានបង្ហោះរូបភាពផ្អែមល្ហែមជាមួយភរិយា ក្នុងថ្ងៃខួបអាពាហ៍ពិពាហ៍គម្រប់ ៤៥ឆ្នាំ ក្នុងទំព័របណ្តាញសង្គម ហ្វេសប៊ុក របស់លោក នៅថ្ងៃទី២៥ ខែឧសភា ឆ្នាំ២០២២ ជាមួយសំណេរថា «ថ្ងៃទី២៥ ខែឧសភា ឆ្នាំ២០២២ ជាថ្ងៃគម្រប់ខួបអាពាហ៍ពិពាហ៍ ៤៥ឆ្នាំ រវាងខ្ញុំ និងភរិយា។
កាលពី ៤៥ឆ្នាំមុន ពួកខ្ញុំទាំងពីរ បានចាប់ដៃប្តេជ្ញាជាប្តីប្រពន្ធនិងគ្នា ក្រោមការទទួលស្គាល់ពីអង្គការខ្មែរក្រហម នៅភូមិនរា ស្រុក៤១ ខេត្តបាត់ដំបង។
តាំងពីពេលនោះមក ប្រពន្ធខ្ញុំរួមសុខរួមទុក្ខជាមួយគ្នា និងថែរក្សាគ្នាទៅវិញមក រហូតមកដល់ពេលនេះ។
បងសូមជូនពរអូន ឲ្យមានសុខភាពល្អ សម្រស់នៅតែស្អាត និងមានអាយុយឺនយូរ»។
គួរបញ្ជាក់ថា អ្នកឧកញ៉ា សៀង ណាំ តែងបង្ហាញជារឿយៗនូវសេចក្តីស្រឡាញ់ដ៏ជ្រាលជ្រៅនិងស្មោះស្ម័គ្របំផុតរបស់លោក ចំពោះឧត្តមភរិយាលោក ជាពិសេសកាលពីកន្លងទៅនេះ ខណ:ដែលភរិយារបស់លោកបានរងរបួសបាក់ឆ្អឹងស្មា ក្នុងពេលជិះកង់ហាត់ប្រាណ ហើយត្រូវបញ្ជូនទៅព្យាបាលនៅប្រទេសថៃ ដោយលោកមិនអាចជូនភរិយាទៅបាន ដោយសារបញ្ហាកូវីដ-១៩ នេះ លោកមានការអាណិតភរិយាជាខ្លាំង រហូតហូរទឹកភ្នែកជ្រែកភក្ត្រាទៀតផង៕