ភ្នំពេញ ៖ កូនស្រីអតីតតារាចម្រៀងពីជំនាន់ដើម អ្នកស្រីហួត សារ៉ាវឌី គឺអ្នកនាងជុង សារ៉ាច័ន្ទ ហាក់ត្រូវបានគេមើលឃើញថា ការងារសិល្បៈជាតារាបង្ហាញម៉ូដ និងសម្ដែង ពុំសូវកាក់កបទទួលបានជោគជ័យ ស័ក្តិសមទៅនឹងកេរ្តិ៍ឈ្មោះរបស់ម្ដាយនាងឡើយ ខណៈចាប់តាំងពីម្ដាយនិងឪពុកលាចាកលោកទៅ តារារូបនេះពុំសូវខ្វាយខ្វល់នឹងភាពល្បីល្បាញរបស់ខ្លួននោះទេ។
យ៉ាងណាមិញ កេរ្តិ៍ឈ្មោះរបស់តារាបង្ហាញម៉ូដ ជុង សារ៉ាច័ន្ទ បែរជាមកល្បីសុសសាយក្នុងជំនួញរកស៊ីលើជំនាញកែសម្រស់ និងបើកលក់ផលិតផល រហូតដល់បង្កើតម៉ាកផលិតផលខ្លួនឯង បន្ទាប់ពីអាជីពសិល្បៈលែងសូវអើពើ។
តារាបង្ហាញម៉ូដ ក្នុងក្រុម Cambodia Super Model រូបនេះ បានថ្លែងទទួលស្គាល់ថា ការងារសិល្បៈរបស់នាងនៅរយៈកាលប៉ុន្មានឆ្នាំមកនេះ គឺមិនរីកចម្រើនមែន ព្រោះតែនាងមិនសូវខ្វាយខ្វល់ និងយកចិត្តទុកដាក់រក្សាភាពល្បូល្បាញរបស់ខ្លួន។ មូលហេតុទាំងអស់នេះ គឺដោយសារតែនាងបានសម្រេចចិត្តដើរចេញពីគន្លងចាស់របស់ម្ដាយខ្លួន និងងាកមកចាប់អាជីពជាអ្នកកែសម្រស់ និងសម្រេចចិត្តចេញទៅសិក្សាជំនាញនេះនៅប្រទេសវៀតណាម អស់រយៈពេលជាច្រើនឆ្នាំ។
អ្នកនាងជុង សារ៉ាច័ន្ទ បានថ្លែងថា ជាការពិត ក្នុងនាមរូបនាងជាកូនច្បងនៅក្នុងគ្រួសារ ត្រូវទទួលរ៉ាប់រងទាំងអស់ទៅលើកម្រិតជីវភាពគ្រួសារ បន្ទាប់ពីម្ដាយរបស់ខ្លួនបានលាចាកលោកនេះទៅ។ ការងារក្នុងវិស័យសិល្បៈបង្ហាញម៉ូដ ក៏មិនសូវទទួលបានចំណូលសមរម្យសម្រាប់ផ្គត់ផ្គង់គ្រួសារ ទើបនាងសម្រេចចិត្តចាប់យកការរកស៊ី ជាមួយនឹងការលក់ផលិតផលកែសម្រស់ និងទៅរៀនជំនាញកែសម្រស់នៅប្រទេសវៀតណាម។
អ្នកនាងជុង សារ៉ាច័ន្ទ និយាយថា ចាប់ពីចាប់អាជីពនេះពីអ្នករៀនម្នាក់ តែរកចំណូលបានបន្តិចបន្តួច រហូតរៀនចប់សន្សំលុយបើកហាងដោយខ្លួនឯង។ ខ្ញុំមិនហ៊ានជួលបុគ្គលិកទេ ឈរចាក់តែម្នាក់ឯង រៀបផង ចាក់ផង សំអាតផង គិតលុយផង ទទួលភ្ញៀវផង លើកទូរសព្ទ័ផង។ ទំរាំមកដល់ថ្ងៃនេះ ខ្ញុំប្តូរកន្លែងពីមួយទៅមួយ ដោយសារគេរុកគួនជាមួយគ្នាឯងប៉ុន្មាននាក់ហ្នឹង…!។ ពីម្នាក់ឯងរហូតមានបុគ្គលិក មានសិស្សជាច្រើនចូលមកជារៀងរាល់ថ្ងៃ។ ពីហាងដែលខ្វះនេះខ្វះនោះ រហូតអាចរីកចំរើនបានដល់ថ្ងៃនេះ..!។
អ្នកនាងសារ៉ាច័ន្ទ ប្រាប់ថា “ខ្ញុំពិតជាសប្បាយចិត្តនឹងសមិទ្ធផលនេះណាស់ ព្រោះវាមិនមែនជារឿងចៃដន្យ តែវាជាការតាំងចិត្ត និងមានទទួលខុសត្រូវចំពោះភ្ញៀវជាច្រើនកន្លងមក។ អរគុណមនុស្សដែលនៅក្បែរខ្លួនខ្ញុំដែលតែងតែនៅក្បែរផ្តល់គំនិត កម្រៃ ពេលវេលា ភាពកក់ក្តៅ លើកទឹកចិត្តរហូតមក..!”។
គួរបញ្ជាក់ថា រហូតមកដល់ពេលនេះ អតីតតារាបង្ហាញម៉ូដ ជុង សារ៉ាច័ន្ទ កំពុងក្ដាប់ជំនួញក្នុងដៃ ដោយបានបើកហាងខ្លួនឯង ដែលទទួលស្គាល់ត្រឹមត្រូវ តាមប្រកាសរបស់ក្រសួងសុខាភិបាល ចំនួន៣កន្លែងមានឈ្មោះថា “N.22 Beauty Klinik”។ ទីតាំងទី១ ស្ថិតនៅក្នុងសង្កាត់បឹងកេងកង១, សាខាទី២ នៅសង្កាត់ស្ទឹងមានជ័យ និងសាខាទី៣ ស្ថិតនៅខេត្តសៀមរាប។
អ្នកនាងជុង សារ៉ាច័ន្ទ បានប្រកាសស្វែងរកអតិថិជន និងតំណាងចែកចាយតាមបណ្ដាខេត្តនានា ដើម្បីទទួលបាននូវការទិញ “ហ្វ្រេនឆាយ” យកទៅលក់បន្ត ដោយទទួលបានការបង្ហាត់ជំនាញត្រឹមត្រូវពីសំណាក់រូបនាងផ្ទាល់ មុននឹងបើកសាខាតាមខេត្តខេត្ត ឲ្យទទួលបានជោគជ័យដូចនាង៕
