បាត់ដំបង៖ ស្រ្តីម្នាក់ត្រូវបានកម្លាំងសមត្ថកិច្ចធ្វើការឃាត់ខ្លួន បន្ទាប់ពីរក្សាទុក និងជួញដូរដោយខុសច្បាប់នូវសារធាតុញៀន។ ហេតុការណ៍ឃាត់ខ្លួនស្ត្រីរូបនេះ ធ្វើឡើងកាលពីវេលាម៉ោង១៦និង១០នាទី ថ្ងៃទី២៣ ខែមេសា ឆ្នាំ២០២០ ស្ថិតនៅក្រុមទី០៣ ភូមិសំពៅកើត ឃុំភ្នំសំពៅ ស្រុកបាណន់។
ស្ត្រីដែលត្រូវសមត្ថកិច្ចឃាត់ខ្លួនមានឈ្មោះ តាន់ គឹមសួរ ភេទស្រី វ័យ៤០ឆ្នាំ រស់នៅភូមិឃុំកើតហេតុខាងលើ។
ដោយអនុវត្តតាមប្រសាសន៍របស់ឯកឧត្តមឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង និងដោយបានការណែនាំពីជំនាញរបស់លោកឧត្តមសេនីយ៍ត្រី កុយ ហៀង ស្នងការរងផែនការងារប្រឆាំងគ្រឿងញៀន នៃស្នងការដ្ឋាននគរបាលខេត្តបាត់ដំបង កម្លាំងសមត្ថកិច្ចនគរបាលនៃអធិការដ្ឋាននគរបាលស្រុកបាណន់ដែលមានលោកវរសេនីយ៍ឯក ប៉ាន់ វណ្ណនី ជាអធិការនគរបាលស្រុក ដឹកនាំឲ្យធ្វើការឃាត់ខ្លួនជនសង្ស័យបានភ្លាមៗ ក្នុងបទល្មើសជាក់ស្តែង បន្ទាប់ពីស្រី្តរូបនេះប្រព្រឹត្តិករណីរក្សាទុកដឹកជញ្ជូន ឬជួញដូរដោយខុសច្បាប់នូវសារធាតុញៀនក្នុងមូលដ្ឋានខាងលើ។
ក្រោយពេលឃាត់ខ្លួន សមត្ថកិច្ចបានដកហូតវត្ថុតាង រួមមាន ៖ ថ្នាំញៀនប្រភេទមេតំហ្វេតាមីនម៉ាទឹកកក ICE ចំនួន០៣ថង់ ទម្ងន់១៣,៩៦ក្រាម
និងសម្ភារ:សម្រាប់រំលែកចែកចាយគ្រឿងញៀនមួយចំនួន។
បច្ចុប្បន្ននេះ កម្លាំងនគរបាលនៃអធិការដ្ឋាននគរបាលស្រុក បានបញ្ជូនជនសង័្សយ ព្រមទាំងវត្ថុតាងមកកាន់ការិយាល័យជំនាញនៅស្នងការដ្ឋាននគរបាលខេត្តបាត់ដំបង ចាត់ការបន្តតាមនីតិវិធី៕