ក្រុមហ៊ុន ជីប ម៉ុង បានឧបត្ថម្ភថវិកាចំនួន៥០ម៉ឺនដុល្លារសហរដ្ឋអាមេរិក ជូនកាកបាទក្រហមកម្ពុជា ដើម្បីទ្រទ្រង់សកម្មភាពមនុស្សធម៌ ដែលមានសម្តេចកិត្តិព្រឹទ្ធបណ្ឌិត ប៊ុន រានី ហ៊ុន សែន ជាប្រធាន និងដើម្បីអបអរសាទខួបទី១៥៧ ទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ២០២០ ក្រោមប្រធានបទ “ខ្ញុំស្រឡាញ់សន្តិភាព និងកាកបាទក្រហមកម្ពុជា”។
កាកបាទក្រហមកម្ពុជា បានចេញលិខិតថ្លែងអំណរគុណចំពោះក្រុម ជីប ម៉ុង ដែលតែងតែរួមចំណែកក្នុងការទ្រទ្រង់សកម្មភាពមនុស្សធម៌ជាមួយកាកបាទក្រហមកម្ពុជា ដើម្បីជួយដល់ប្រជាពលរដ្ឋដែលជួបការលំបាកដោយគ្រោះធម្មជាតិ និងគ្រោះមហន្តរាយផ្សេងៗ។
ក្រុមហ៊ុន ជីប ម៉ុង តែងតែចូលរួមចំណែកយ៉ាងសកម្មជាមួយរដ្ឋាភិបាល ក្នុងសកម្មភាពមនុស្សធម៌។ កាលពីពេលថ្មីៗនេះ ក្រុមហ៊ុនជីប ម៉ុង បានបរិច្ចាគថវិកាចំនួន៥០ម៉ឺនដុល្លារ ដូចគ្នា ជូនរដ្ឋាភិបាល សម្រាប់ប្រើប្រាស់ក្នុងយុទ្ធនាការប្រយុទ្ធនឹងជំងឺកូវីដ១៩។
កាលពីឆ្នាំ២០១៩ ក្រុមហ៊ុនជីប ម៉ុង បានបរិច្ចាគជូនកាកបាទក្រហមកម្ពុជា ចំនួន៥០ម៉ឺនដុល្លារសហរដ្ឋអាមេរិក ក្នុងឱកាសអបអរសាទរខួបទី១៥៦ ទិវាពិភពលោក កាកបាទក្រហម អឌ្ឍចន្ទក្រហម, បានបរិច្ចាគជូនមូលនិធិគន្ធបុប្ផាកម្ពុជា ចំនួន៥០ម៉ឺនដុល្លារសហរដ្ឋអាមេរិក ព្រមទាំងសកម្មភាពសង្គម និងសប្បុរសធម៌ផ្សេងៗជាច្រើនទៀត៕