គម្រោងរថយន្តក្រុងពីម៉ាឡៃ -ប៉ោយប៉ែត របស់ថៅកែផលិតកម្ម Galaxy Navatra លោកឧកញ៉ាឡេង ណាវ៉ាត្រា បានបើកសម្ពោធហើយកាលពីចុងសប្ដាហ៍នេះ ក្រោមអធិបតីភាពឯកអភិបាលខេត្តបន្ទាយមានជ័យ ព្រមទាំងដៃគូជំនួញជាច្រើនរូបទៀត។
រថយន្តក្រុងនេះដាក់ដំណើរការជូនប្រជាពលរដ្ឋជិះដោយមិនគិតប្រាក់រយៈពេល៣ខែ ហើយបន្ទាប់មកក្រុមហ៊ុនយកត្រឹមតែ២ពាន់រៀលប៉ុណ្ណោះ ខណៈប្រជាពលរដ្ឋជិះម៉ូតូឌុបអស់មិនក្រោម២ម៉ឺនរៀលឡើយក្នុងមនុស្សម្នាក់។
នេះជាកាដូធំមួយរបស់ក្រុមហ៊ុន “ឆាយណាប៉ោយប៉ែត ស៊ែតថឺឡាយ ស៊ីធី” មានលោកឧកញ៉ាឡេង ណាវ៉ាត្រា ជាម្ចាស់ភាគហ៊ុនមួយកំពុងតែវិនិយោគលើទឹកដីខេត្តបន្ទាយមានជ័យ នេះ ធ្វើឲ្យប្រជាពលរដ្ឋ ក៏ដូចជាអាជ្ញាធរបានសម្ដែងការសប្បាយចិត្តជាខ្លាំងនៅពេលខេត្តជាប់ព្រំដែនថៃមួយនេះ មានរថយន្តក្រុងជាលើកដំបូងគេ។
តាមការលើកឡើងរបស់ឯកឧត្ដម អ៊ុំ មេត្រី អភិបាលនៃគណៈអភិបាលខេត្តបន្ទាយមានជ័យ ខ្សែរថយន្តក្រុងសាធារណៈដែលបានដាក់ឲ្យដំណើរការនេះ ផ្ដល់សេវាដឹកជញ្ជូនទៅមកក្នុងរយៈចម្ងាយ៤០គីឡូម៉ែត្រ រវាងស្រុកម៉ាឡៃ និងក្រុងប៉ោយប៉ែត មានចំនួន១៥គ្រឿង នឹងផ្លាស់គ្នាដឹកជញ្ជូនប្រជាពលរដ្ឋក្នុងរយៈពេល២០នាទីម្ដង ដោយក្នុង១គីឡូម៉ែត មានចំណងមួយ។ ប្រជាពលរដ្ឋអាចធ្វើដំណើរតាមរថយន្តក្រុងសាធារណៈនេះដោយឥតគិតថ្លៃ ក្នុងរយៈពេល៣ខែដំបូង។ បន្ទាប់ពីនោះ រថយន្តក្រុងសាធារណៈទៅមករវាងស្រុកម៉ាឡៃនិងក្រុងប៉ោយប៉ែតនេះ នឹងចាប់ផ្ដើមគិតថ្លៃ២០០០រៀល ក្នុងអ្នកដំណើរម្នាក់។
លោកអភិបាលខេត្ត សង្ឃឹមថា សេវារថយន្តក្រុងសាធារណៈនេះនឹងជួយសម្រួលដល់ការធ្វើដំណើររបស់ប្រជាពលរដ្ឋទូទៅ កាត់បន្ថយចំណាយ និងកាត់បន្ថយគ្រោះថ្នាក់ចរាចរណ៍តាមដងផ្លូវនៅកម្ពុជា។
លោកក៏បានអំពាវនាវឲ្យប្រជាពលរដ្ឋចូលរួមប្រើប្រាស់សេវារថយន្តក្រុងនេះទាំងអស់គ្នា នៅពេលត្រូវធ្វើដំណើរទៅមករវាងក្រុងប៉ោយប៉ែតនិងស្រុកម៉ាឡៃ។ ហើយឯកឧត្ដមបានសម្ដែងការគាំទ្រ និងកើតសរសើរជាខ្លាំងនៅទឹកចិត្តរបស់ក្រុមហ៊ុនដែលបានចូលរួមចំណែកជួយឲ្យមានសេវារថយន្តក្រុងបែបនេះ ប្រជាពលរដ្ឋ ក៏ដូចជាអាជ្ញាធរពិតជាសប្បាយចិត្តខ្លាំងណាស់ ។
ឯកឧត្ដមលើកឡើងថា នៅស្រុកម៉ាឡៃ ដំបូងឡើយជាទីតាំងសមរភូមិក្ដៅមួយក្នុងរបបខ្មែរក្រហមដែលមនុស្សមួយចំនួនខ្លាចរអាមិនហ៊ានមកឡើយ ប៉ុន្តែបន្ទាប់ពីប្រទេសមានសុខសន្តិភាពទីនេះក្លាយជាទីប្រជុំជនដែលស្ថិតក្នុងក្រសែភ្នែកវិនិយោគជាច្រើនទាំងជាតិនិងអន្តរជាតិ។
បច្ចុប្បន្នមាននៅស្រុកម៉ាឡៃ មានក្រុមហ៊ុនធំ២ ដែលកំពុងតែសម្រុកវិនិយោគលើទឹកដីមួយនេះ ទី១ក្រុមហ៊ុន “ឆាយណាប៉ោយប៉ែត ស៊ែតថឺឡាយ ស៊ីធី” របស់លោកឧកញ៉ាឡេង ណាវ៉ាត្រា កំពុងតែវិនិយោគលើផ្ទៃដីជាង១ពាន់ហិតានេះ ជាទីក្រុងរណបថ្មីមួយនៃខេត្តបន្ទាយមានជ័យ ដែលប្រជុំទៅដោយមជ្ឈមណ្ឌលពាណិជ្ជកម្ម ខុនដូ រីសត ផ្ទះល្វែង វីឡា ភោជនីយដ្ឋាន ជាដើម។ ទី២ ក្រុមហ៊ុនមជ្ឈិមស្ទាល អ៊ីនធើប្រាយ របស់លោកស្រីណាគ្រី ដែលវិនិយោគរោងចក្រអគ្គិសនីដើរដោយពន្លឺព្រះអាទិត្យ (សូឡា) រោងចក្រទឹកកក និងតំបន់សេដ្ឋកិច្ច។
តាមការបញ្ជាក់ពីក្រុមហ៊ុន ជាមួយការរួមចំណែកជួយដល់ប្រជាពលរដ្ឋនេះទីនេះ ក្រៅពីជួយលើសេវារថយន្តក្រោយ ដោយសារតែទីនេះ ខ្វះទឹក ក្រុមហ៊ុនគ្រោងជីកប្រឡាយទឹកជាច្រើនគីឡូម៉ែត្រ ដើម្បីស្ដុកទឹកទុកសម្រាប់ប្រើប្រាស់ នឹងបង្កើតរមណីយដ្ឋានជាច្រើនទៀត ជូនប្រជាពលរដ្ឋរស់នៅឲ្យកាន់តែមានភាពងាយស្រួល។
ជាមួយសេវារថយន្តក្រុងនេះផងដែរ ឯកឧត្ដម អ៊ុំ មេត្រី បានឲ្យដឹងបន្ថែមថា ប្រសិនបើដំណើរការនេះទទួលបានជោគជ័យ អាជ្ញាធរខេត្តនឹងពិចារណាដាក់ឲ្យដំណើរការរថយន្តក្រុងសាធារណៈជំហានបន្ទាប់ទៀត រវាងក្រុងប៉ោយប៉ែតនិងក្រុងសិរីសោភ័ណ បន្តទៀត៕
