សម្រាប់ការប្រជែងពានរង្វាន់កីឡាករឆ្នើម ប្រចាំឆ្នាំ ២០១៨ សហព័ន្ធបាល់ទាត់អន្តរជាតិ FIFA បានមើលរំលងទៅលើកីឡាករ ម្ចាស់ពានរង្វាន់បាល់មាស៥សម័យកាល Messi ខ្សែប្រយុទ្ធឆ្នើមចាស់វស្សារបស់ក្រុមជម្រើសជាតិអាហ្សង់ទីន និងក្លឹបអ្នកមានបុណ្យ Barcelona ដោយមិនបានបញ្ចូលឈ្មោះក្នុងបញ្ជីសម្រាំងបេក្ខភាពចុងក្រោយបីរូបនោះទេ។ ជាងនេះទៅទៀតFIFAក៏ មិនបានបញ្ចូលវត្តមានកីឡាករក្រុមជម្រើសជាតិបារាំង ដែលជាម្ចាស់ពានបាល់ទាត់ពិភពលោកណាម្នាក់ ក្នុងបញ្ជីនេះដែរ។
អ្នកឈ្នះពានរង្វាន់ខាងលើ នឹងត្រូវប្រកាសលទ្ធផលនៅថ្ងៃទី២៤ ខែកញ្ញា ខាងមុខនេះ តាមរយៈការបោះឆ្នោតចេញពីអ្នកគាំទ្រ អ្នកកាសែត គ្រូបង្វឹក និងប្រធានក្រុមជម្រើសជាតិ។
បេក្ខភាព3រូបចុងក្រោយដែលត្រូវប្រជែងគ្នាសម្រាប់ពានរង្វាន់កីឡាករល្អបំផុតរួមមាន ៖
1-កីឡាករ Cristiano Ronaldo មកពីក្លឹប Juventus
2- Luka Modric មកពីក្លឹប Real Madrid
3-Mohamed Salah មកពីក្លឹបLiverpool
សមិទ្ធផលធំៗរបស់កីឡាករទាំងបីរូប
-កីឡាករ Ronaldo ម្ចាស់ពានកីឡាករឆ្នើម២០១៦និង ២០១៧ ធ្លាប់លើកពានឆេមពានលីក៥ដង ជាមួយ Real Madrid មុនពេលផ្លាស់ទៅ សេះបង្កង់ Juventus កាលពីខែឧសភា ឆ្នាំ២០១៨ ក្នុងតម្លៃខ្លួនជាង១២៧លានដុល្លារ។
-កីឡាករខ្សែបម្រើល Luka Modric ម្ចាស់ពានកីឡាករឆ្នើមប្រចាំព្រឹត្តិការណ៍បាល់ទាត់ពិភពលោក២០១៨ នៅប្រទេសរុស្ស៊ី ដែលបានជួយឲ្យក្រុមជម្រើសជាតិក្រូអាស៊ី ឡើងដល់វគ្គផ្តាច់ព្រ័ត្តតែចាញ់បារាំងដោយលទ្ធផល ៤-២។
-ខ្សែប្រយុទ្ធឆ្នើមតែមួយគត់របស់អេហ្ស៊ីប Mohamed Salah រកគ្រាប់បាល់ឲ្យហង្សក្រហមLiverpool បាន ៤៤គ្រាប់ ក្នុងមួយរដូវកាល និងជួយឲ្យក្លឹបនេះ ឡើងដល់វគ្គផ្តាច់ព្រ័ត្រឆេមពាលលីក តែចាញ់ Real Madrid ដោយលទ្ធផល 3- 1 ។
ក្រៅពីប្រកាសពីបេក្ខភាពទាំង3រូបសម្រាប់ប្រជែងយកពានរង្វាន់កីឡាករល្អបំផុត FIFA ក៏បានបញ្ចេញបញ្ជីឈ្មោះ បេក្ខភាពពានរង្វាន់សម្រាប់អ្នកចាំទីឆ្នើម និងគ្រូបង្វឹកល្អបំផុតប្រចាំឆ្នាំផងដែរ៖
ពានរង្វាន់អ្នកចាំទីល្អបំផុត៖
១.អ្នកចាំទីសញ្ជាតិប៊ែលហ្ស៊ិក Thibaut Courtois អតីតក្លឹប Chelsea ដែលទើបផ្ទេរទៅក្លឹប Real Madrid។
២.អ្នកចាំទីបារាំង Hugo Lloris របស់ក្លឹបមាន់ខ្នាយមាស Tottenham។
៣.អ្នកចាំទីដាណឺម៉ាក Kasper Schmeichel របស់ក្លឹប Leicester ។
ពានរង្វាន់គ្រូបង្វឹកគ្រូបង្វឹកឆ្នើមបំផុត ៖
១. លោក Zlatko Dalic គ្រូបង្វឹកក្រុមជម្រើសជាតិក្រូអាស៊ី។
២. លោក Didier Deschamps គ្រូបង្វឹកក្រុមជម្រើសជាតិបារាំង។
៣. លោក Zinedine Zidane អតីតគ្រូបង្វឹកក្លឹប Real Madrid។