អតីតរដ្ឋមន្ត្រីទំនាក់ទំនងឥណ្ឌូណេស៊ីម្នាក់ត្រូវបានកាត់ទោសឱ្យជាប់ពន្ធនាគាររយៈពេល ១៥ ឆ្នាំកាលពីថ្ងៃពុធ ទី៨ ខែវិច្ឆិកាបន្ទាប់ពីត្រូវបានរកឃើញថាមានពិរុទ្ធពីបទពុករលួយក្នុងសំណុំរឿងដែលធ្វើឱ្យប្រទេសនេះខាតបង់ច្រើនជាង ៥០០លានដុល្លារ។នេះបើយោងតាមការចេញផ្សាយរបស់ទីភ្នាក់ងារសារព័ត៌មានAFP។តុលាការប្រឆាំងអំពើពុករលួយរបស់ប្រទេសឥណ្ឌូណេស៊ីបានរកឃើញថា អតីតរដ្ឋមន្ត្រីក្រសួងទំនាក់ទំនង និងព័ត៌មានវិទ្យា លោក Johnny Gerard Plate មានពិរុទ្ធពីបទប្រើប្រាស់តួនាទីរបស់ខ្លួនពាក់ព័ន្ធ ទៅនឹងគម្រោងទូរគមនាគមន៍។
ប្រធានចៅក្រមលោកFahzal Hendri បានប្រាប់តុលាការថា ចុងចោទត្រូវបានគេរកឃើញថាមានទោសតាមច្បាប់ ពីបទប្រព្រឹត្តអំពើពុករលួយរួមជាមួយមនុស្សផ្សេងទៀត ហើយ តុលាការកំពុងកាត់ទោសចុងចោទឱ្យជាប់គុក ១៥ ឆ្នាំ។
តុលាការក៏បានបញ្ជាឱ្យបុរសអាយុ ៦៧ ឆ្នាំរូបនេះបង់ប្រាក់ពិន័យចំនួន ១ពាន់លានរូពៀស្មើនឹង៦៣៧៥០ ដុល្លារអាមេរិក ឬដាក់ពន្ធនាគាររយៈពេលប្រាំមួយខែបន្ថែមទៀត។
គាត់ក៏ត្រូវបានបញ្ជាឱ្យបង់ប្រាក់ចំនួន ១៥,៥ ពាន់លានរូពីក្នុងសំណងឬត្រូវរឹបអូសទ្រព្យសម្បត្តិរបស់គាត់ដោយតុលាការ។តុលាការក៏បានរកឃើញថា លោកមានកំហុសក្នុងការយកប្រាក់ ១០ ពាន់លានរូពី ស្មើនឹង៦៣៨.៥០០ ដុល្លារអាមេរិក ពីគម្រោងនេះ៕
លោកPlate ត្រូវបានចាប់ខ្លួនកាលពីខែឧសភា ជុំវិញការជាប់ពាក់ព័ន្ធនៅក្នុងគម្រោងស្ថានីយ៍បញ្ជូនទិន្នន័យមូលដ្ឋាន (BTS) សំដៅផ្តល់ការចូលប្រើអ៊ីនធឺណិត 4G ទៅកាន់តំបន់ដាច់ស្រយាលនៅទូទាំងប្រជុំកោះ ដែលត្រូវបានដឹកនាំដោយភ្នាក់ងារមួយនៅក្រោមក្រសួងទំនាក់ទំនង។
ប្រទេសឥណ្ឌូណេស៊ីបានចាប់ខ្លួនមន្ត្រីសាធារណៈជាច្រើននាក់ពីបទប្រព្រឹត្តអំពើពុករលួយក្នុងរយៈពេលប៉ុន្មានឆ្នាំចុងក្រោយនេះ។ក្នុងឆ្នាំ ២០២១ អតីតរដ្ឋមន្ត្រីក្រសួងសង្គមកិច្ចម្នាក់ត្រូវបានកាត់ទោសឱ្យជាប់ពន្ធនាគាររយៈពេល ១២ ឆ្នាំបន្ទាប់ពីត្រូវបានកាត់ទោសពីបទទទួលសំណូកចំនួន ១,២លានដុល្លារអាមេរិកពាក់ព័ន្ធនឹងជំនួយស្បៀងអាហារសម្រាប់គ្រួសារក្រីក្រដែលរងគ្រោះដោយជំងឺរាតត្បាតរាតត្បាត ៕