ក្រសួងការពារជាតិឥណ្ឌូណេស៊ីបាននិយាយកាលពីថ្ងៃអង្គារថាទីក្រុងហ្សាការាបានបញ្ជាទិញយន្តហោះគ្មានមនុស្សបើកថ្មីចំនួន ១២ គ្រឿងពីក្រុមហ៊ុនអាកាសចរណ៍តួកគី ដែលមានតម្លៃ៣០០លានដុល្លារ។នេះជាការទិញចុងក្រោយបំផុតក្នុងគោលបំណងធ្វើទំនើបកម្មឧបករណ៍យោធាដែលមានវ័យចំណាស់របស់ប្រទេស។កិច្ចព្រមព្រៀងជាមួយក្រុមហ៊ុនអាកាសចរណ៍តួកគីដែលមានមូលដ្ឋាននៅទីក្រុងអង់ការា ត្រូវបានបញ្ចប់នៅកាលពីខែកុម្ភៈ ហើយយន្តហោះគ្មានមនុស្សបើកត្រូវបានគេរំពឹងថានឹងដឹកជញ្ជូនក្នុងរយៈពេល៣២ ខែបន្ទាប់ពីការចុះហត្ថលេខា។ ក្រសួងការពារជាតិបាននិយាយនៅក្នុងសេចក្តីថ្លែងការណ៍មួយថា វារួមបញ្ចូលទាំងការហ្វឹកហាត់ និងការក្លែងធ្វើយន្តហោះផងដែរ។
កិច្ចព្រមព្រៀងនេះកើតឡើងបន្ទាប់ពីប្រធានាធិបតីឥណ្ឌូណេស៊ីលោកចូកូ វីដូដូ កាលពីខែកក្កដាបានព្រមានគណៈរដ្ឋមន្ត្រីរបស់លោកឱ្យរក្សាថវិកាមានសុខភាពល្អ ខណៈដែលលោកបានគូសបញ្ជាក់ពីការចំណាយលើសដោយភ្នាក់ងារសន្តិសុខរបស់ប្រទេសរួមទាំងក្រសួងការពារជាតិផងដែរ។
កាលពីខែមករា រដ្ឋមន្ត្រីការពារជាតិលោក Prabowo Subianto បានចុះហត្ថលេខាលើកិច្ចព្រមព្រៀងតម្លៃ ៨០០ លានដុល្លារដើម្បីទិញយន្តហោះចម្បាំង Mirage 2000-5 ចំនួន ១២គ្រឿងដែលធ្វើឲ្យមានការរិះគន់ដោយសារតែយន្តហោះទាំងនោះត្រូវបានចាត់ទុកថាចាស់ពេក។ ប្រទេសឥណ្ឌូណេស៊ីកាលពីខែកុម្ភៈក៏បានទិញយន្តហោះចម្បាំង Rafale ចំនួន ៤២ គ្រឿងក្នុងតម្លៃ៨,១ពាន់លានដុល្លារ ដែលនឹងត្រូវចំណាយជាដំណាក់កាលក្នុងរយៈពេលជាច្រើនឆ្នាំ។
នៅក្នុងទឹកប្រាក់៨,៨៩ ពាន់លានដុល្លារ ក្រសួងការពារជាតិមានការបែងចែកដ៏ធំបំផុតពីថវិកាសរុបរបស់ប្រទេសក្នុងឆ្នាំនេះ។នេះបើយោងតាមទិន្នន័យរបស់រដ្ឋាភិបាល ៕