ប្រទេសកូរ៉េខាងជើងបានចោទប្រកាន់សហរដ្ឋអាមេរិកកាលពីថ្ងៃចន្ទទី១០ខែកក្កដា ពីបទរំលោភលើដែនអាកាសរបស់ខ្លួន ដោយយន្តហោះឈ្លបយកការណ៍ហើយបានព្រមានថា ខណៈដែលទីក្រុងព្យុងយ៉ាងកំពុងអនុវត្តការអត់ធ្មត់ ជើងហោះហើរបែបនេះអាចនឹងត្រូវបាញ់ទម្លាក់។
អ្នកនាំពាក្យក្រសួងការពារជាតិកូរ៉េខាងជើង បាននិយាយនៅក្នុងសេចក្តីថ្លែងការណ៍មួយ ដែលធ្វើឡើងដោយទីភ្នាក់ងារសារព័ត៌មានរដ្ឋ KCNA ថា សកម្មភាពយោធាបង្កហេតុដោយសហរដ្ឋអាមេរិក កំពុងនាំឧបទ្វីបកូរ៉េ ខិតទៅជិតជម្លោះនុយក្លេអ៊ែរ។
របាយការណ៍ក៏បានលើកឡើងពីការប្រើប្រាស់យន្តហោះឈ្លបយកការណ៍អាមេរិក និងយន្តហោះគ្មានមនុស្សបើក ហើយបាននិយាយថាទីក្រុងវ៉ាស៊ីនតោនកំពុងបង្កើនភាពតានតឹងដោយការបញ្ជូននាវាមុជទឹកនុយក្លេអ៊ែរទៅជិតឧបទ្វីប។
អ្នកនាំពាក្យបាននិយាយថា មិនមានការធានាថា ឧបទ្ទវហេតុដ៏គួរឱ្យតក់ស្លុត ដូចការធ្លាក់យន្តហោះឈ្លបយកការណ៍យុទ្ធសាស្ត្ររបស់កងទ័ពអាកាសអាមេរិកនឹងមិនកើតឡើងនោះទេនៅក្នុងដែនទឹកភាគខាងកើតនៃប្រទេសកូរ៉េ។
សេចក្តីថ្លែងការណ៍បានលើកឡើងពីឧប្បត្តិហេតុកន្លងមកនៃការបាញ់ទម្លាក់ឬស្ទាក់យន្តហោះអាមេរិកនៅព្រំដែនជាមួយកូរ៉េខាងត្បូង និងនៅឆ្នេរសមុទ្រ។ កូរ៉េខាងជើងតែងតែត្អូញត្អែរអំពីជើងហោះហើរឃ្លាំមើលរបស់អាមេរិកនៅក្បែរឧបទ្វីប។មិនមានការឆ្លើយតបភ្លាមៗពីយោធាអាមេរិកដែលឈរជើងនៅកូរ៉េខាងត្បូងចំពោះសំណើសុំការអត្ថាធិប្បាយទេ។
KCNA បាននិយាយថាចំណាត់ការរបស់សហរដ្ឋអាមេរិកក្នុងការណែនាំទ្រព្យសម្បត្តិនុយក្លេអ៊ែរជាយុទ្ធសាស្ត្រទៅកាន់ឧបទ្វីបកូរ៉េគឺជាការគំរាមកំហែងនុយក្លេអ៊ែប្រឆាំងនឹងប្រទេសកូរ៉េខាងជើងនិងបណ្តាប្រទេសក្នុងតំបន់ហើយបង្ហាញពីការគំរាមកំហែងយ៉ាងធ្ងន់ធ្ងរដល់សន្តិភាព។
កូរ៉េខាងជើងបានថ្កោលទោសផែនការរបស់សហរដ្ឋអាមេរិក ក្នុងការដាក់ពង្រាយនាវាមុជទឹកនុយក្លេអ៊ែរ ទៅកាន់ដែនទឹកក្បែរឧបទ្វីបកូរ៉េ ដោយព្រមានថា ទង្វើនេះអាចញុះញង់ឱ្យមានជម្លោះបរមាណូដ៏មហន្តរាយ៕