យោងតាមការសិក្សាដ៏ធំមួយដែលបានចេញផ្សាយកាលពីថ្ងៃព្រហស្បតិ៍ទី២៥ សីហា២០២២ បានរកឃើញថាថ្នាំគ្រាប់ Paxlovidប្រឆាំងកូវីដ-១៩របស់ក្រុមហ៊ុន Pfizerផ្តល់អត្ថប្រយោជន៍តិចតួចឬគ្មានទាល់តែសោះសម្រាប់មនុស្សវ័យជំទង់ខណៈពេលដែលវានៅតែអាចជួយកាត់បន្ថយហានិភ័យនៃការចូលមន្ទីរពេទ្យនិងការស្លាប់សម្រាប់មនុស្សវ័យចំណាស់ដែលមានហានិភ័យខ្ពស់។
ទោះជាយ៉ាងណាក្តីវេជ្ជបណ្ឌិត David Boulware អ្នកស្រាវជ្រាវ និងគ្រូពេទ្យនៃសាកលវិទ្យាល័យ Minnesota ដែលមិនចូលរួមក្នុងការសិក្សាបាននិយាយថា Paxlovid នឹងនៅតែមានសារៈសំខាន់សម្រាប់អ្នកដែលមានហានិភ័យខ្ពស់បំផុតនៃជំងឺកូវីដ–១៩ ធ្ងន់ធ្ងរ ដូចជាមនុស្សវ័យចំណាស់ និងអ្នកដែលមានប្រព័ន្ធភាពស៊ាំចុះខ្សោយ ប៉ុន្តែសម្រាប់ជនជាតិអាមេរិកវ័យក្មេងភាគច្រើនពិតជាមិនមានអត្ថប្រយោជន៍ច្រើនទេ។
លទ្ធផលពីការសិក្សារបស់អ៊ីស្រាអែលដែលមានអ្នកជំងឺ ១០៩០០០នាក់ទំនងជាធ្វើអោយមានសំណួរអំពីការប្រើប្រាស់ថ្នាំ Paxlovid របស់រដ្ឋាភិបាលសហរដ្ឋអាមេរិក ដែលបានដាក់អោយព្យាបាលសម្រាប់កូវីដ–១៩ ដោយសារតែវាមានភាពងាយស្រួលនៅផ្ទះ។
រដ្ឋបាលលោកចូបៃឌិនបានចំណាយប្រាក់ជាង ១០ពាន់លានដុល្លារដើម្បីទិញថ្នាំនេះ ដាក់អោយមានតាមឱសថស្ថានរាប់ពាន់កន្លែងតាមរយៈគំនិតផ្តួចផ្តើមសាកល្បងនិងព្យាបាលរបស់ខ្លួន។អ្នកស្រាវជ្រាវបានរកឃើញថាថ្នាំគ្រាប់Paxlovidបានកាត់បន្ថយការចូលមន្ទីរពេទ្យក្នុងចំនោមមនុស្សដែលមានអាយុពី៦៥ ឆ្នាំឡើងទៅប្រហែល ៧៥ភាគរយ នៅពេលផ្តល់ឱ្យភ្លាមៗ បន្ទាប់ពីការឆ្លង។ នោះគឺស្របនឹងលទ្ធផលពីមុន មុននឹងអនុញ្ញាតឱ្យប្រើថ្នាំប្រភេទនេះនៅសហរដ្ឋអាមេរិក និងប្រទេសផ្សេងទៀតប៉ុន្តែមនុស្សដែលមានអាយុពី៤០ទៅ៦៥ឆ្នាំមិនឃើញមានអត្ថប្រយោជន៍ដែលអាចវាស់វែងបាននោះទេ។នេះបើយោងតាមការវិភាគនៃកំណត់ត្រាវេជ្ជសាស្ត្រ៕